¹ Ubobo wiina mbuukonzha kulilekelele, uwe u muntu, uwe nuubeteka, kaambo mu shintu shesho nshuubeteka bantu bamwi, ulalibeteka u mwini. Uwe nuubeteka ulachita chintu chomwi mbubona. ² Pele tulizhi ati kubeteka kwaka Leza ku bantu bali bobo kuliluleme chashika kuli babo balo bashichita sheshi shintu shili bolya. ³ Pele uzhibe chechi, uwe u muntu, uwe nuubeteka babo bashichita sheshi nikuba bobo aze ulashichita nshishona shikozhene. Saa ulakafwutuka buti ku lubeta lwaka Leza? ⁴ Saa ulaubausha luse lwa Leza lunji lunji, u kuchelwa kwa lubeta lwakwe, alimwi u bushichamba bwakwe? Saa twizhi kwaamba ati luse lwakwe ndwakututola ku kusanduka? ⁵ Pele chili kuli uwe u mupamyu alimwi uuli monzo utazanda kusanduka ulalizobwela u mukamwini bukali ku buzuba bwa bukali, nkukuti, mbuzuba bwa buzubuluzhi bwa lubeta lwakwe Leza lwa bululami. ⁶ Ulakabeteka u kupilusha ku muntu u muntu kwiingayina u michito yakwe: ⁷ kuli babo balo bakakatila kuchita michito mibotu balaliyanina bulemu, balakalemekwa, alimwi u bushichamba, ulakabapa bumi butamana. ⁸ Pele kuli babo bashikalifwune, babo bakaka bwini pele balemeka shitali sha bululami, bukali alimwi u kubalemanina kulakabawila. ⁹ Leza ulakaleta kupenga alimwi u kuusa a bumi bwa muntu woonse wezo wakachita bubiyabi, kutaanguna kuba Juda, amana uku ba Giliki abo. ¹⁰ Pele bulemu, u kulemekwa, alimwi u luumuno lulakaba kuli woonse wezo uchita bubotu, kutaanguna kuba Juda,amana kuba Giliki. ¹¹ Leza wiina lusalululo. ¹² U kuti banji banji babisha bwiina mulawo balakazonaunwa bwiina mulawo, alimwi mbukuli ati banji banji babisha kuli u mulawo balakabetekwa u mulawo. ¹³ Kaambo tabali bashikupupulala mulawo mbuba balulami ku bushu bwaka Leza, pele mbababo bashikuchita mulawo mbubaya kululamikwa. ¹⁴ Kaambo bahwamashi, balo bayina mulawo, balachita mbubona mbushibele shintu sha mulawo, lwabo beni mbuba shimulawo, nikuba kwaamba ati bayina mulawo. ¹⁵ Muli chechi balatondezha kwaamba ati buchite bwaamba mulawo bulilembelwe mu myonzo yabo. Matelaishi abo awo alapa bumboni, alimwi u mizeezo yabo ilabapa mulandu naa kubazhiminina ¹⁶ ku buzuba bobo Leza naaya kubeteka masoseke a muntu woonse, kwiingayina u mulumbe wangu, kwiita mwa Jeso Kilisito. ¹⁷ Pele naakuti ulaamba ati uli mu Juda alimwi ulashoma mulawo u kulyeensheensha mwa Leza, ¹⁸ alimwi ulilwizhi luzando lwakwe u kuzhiba shili kabotu u kaambo kakuti wakayiishiwa kuhwa ku mulawo; ¹⁹ pele kuti wazhiba lwako umwini kuti ndiwe usololela boofwu, mumuni wa babo balo bali mu mushinze, ²⁰ shikulayilila balimbushi, mwiiyi wa bana bashoonto, u kukwata luzhibo lwa mulawo alimwi ulwa bwini, inzho chechi chilabubamba buti bumi bwako. ²¹ Saa uwe nuuyiisha bamwi, tuliyiisha lwako u mwini? Uwe nuukambaukila bamwi kwaamba batebi, saa uwe uleba? ²² Saa uwe nuuwamba ati kwiina uyezhi kuchita bumambe, saa uwe ulachita bumambe? Uwe uswile shibumba, saa uleba mushikombelo? ²³ Uwe nuulyeensheensha ku makani aa mulawo, saa tuubaula Leza mukusotoka mulawo? ²⁴ Kaambo "izhina lyaka Leza lilasampualwa ku bahwamashi u kaambo kako," mbubona mbuchakalembwa. ²⁵ Kupalulwa kulikwete impindu kwako naakuti woochilila mulawo, pele naakuti ulasotoka mulawo, kupalulwa kwako kulaba kwa bulyo. ²⁶ Inzho naakuti muntu utapalulilwe wabamba shizanda mulawo, saa kutapalulwa kwakwe takukabikwa kuba ukoya mupalule? ²⁷ Alimwi saa wezo utali mupalule mbwaakabela wamubisha bisha kuti wootobela mulawo? chili bobo kaambo ulikwte mulawo mulembe alimwi u kupalulwa, kwamana uwe uli shikusotoka mulawo! ²⁸ Tabuli bu Juda bweezeulu bulyo; naa kupalulwa koko kweezeulu wamubili bulyo. ²⁹ Pele mu Juda nguwezo wa mukati, alimwi kupalulwa nku koko kwa mukati ka monzo, u mu moza, kutali mu lukalata pe. Kutembaula kwa muntu uuli bobo takuhwi ku bantu pele kulahwa kwa Leza.