¹ Kumanizha, nu bakwesu bangu, a mubotelwe mu Mwami. Ume kulemba sheshi shintu shikozhene alimwi kwenu taluli lumamba kwangu, alimwi chilamubamba kabotu. ² Amubalangishe babwa. Amubalangishe babo basebezhi babiyabi. a mulangishe babo bapalule ku mubili. ³ Kaambo uswe ndiswe babo bapalule---ndiswe nitupaila kwiita mu Moza waka Leza, alimwi a mulikankayizhe mwa Kilisito Jeso, amana ndiina lushomo mu mubili. ⁴ Alimwi bobo, Ume lwangu ndakonzha kushoma mu mubili. Naakuti umwi ulatelaika ati ulikwete lushomo mu mubili, Ume ndalozha kubaazha kushoma. ⁵ Ume ndakapalulwa mubuzuba bwa lusele, bwa bantu ba Izilaili, uwa mushobo wachi Benjamini, mu Hebulu waba Hebulu; kwiingayina u mulawo, mu ndaakuli ukoya mu Falisi. ⁶ Ndakaakuzandisha mulawo, Ume ndakapenzha chikombelo; kubululami kwiita mu mulawo, Ume ndakaakwiina kampenda. ⁷ Pele kufwumbwa chintu kachili impindu kwangu, Ume ndakaakuzunga ati nshampindu u kaambo ka Kilisito. ⁸ Chini chini, Ume ndashizhiba shintu shoonse kuti tashili shampindu u kaambo ka luzhibo lunji lunji lubaala lwaka Kilisito Jeso Mwami wangu. U kaambo kakwe Ume ndashileka shoonse shintu shinji shinji---alimwi ndashibika kuba shabulyo---kwaamba Ume njane Kilisito ⁹ amana u kuyanwa mwakwe, kutayana bululami bwangu ndimwini kuhwa ku mulawo, pele chalo checho kwiita mulushomo mwa Kilisito---bululami kuhwa kwa Leza kwalo kwiita mulushomo. ¹⁰ Inzho bolya Ume ndazanda kumuzhiba alimwi insana shabubuke bwakwe kuhwa kubafwu alimwi u kwaabana mapenzhi akwe, kwaamba tukozhane aze kwiita mulufwu lwakwe, ¹¹ ambweni Ame ndakayanwa kububuke butaanzhi kuhwa kubafwu. ¹² Kutali ati Ume ndakashibweza kale sheshi shintu, naakuti ume ndakaba kale mwini mwini, pele Ume ndasoleka chansana kukwatisha kuli checho Ume nchindakabikwa kwa Kilisito Jeso. ¹³ Nu bakwesu, Ume nshitelaiki kwaamba Ume lwangu ndishikwete kale sheshi. Pele chintu chomwi checho nchichita: Nkuluba checho chili munshi alimwi u kutatanana kuya kumbele kuli checho chili ambele, ¹⁴ Ume ndatatanana kuya kuchikwankwani u kuzandisha bulumbu chakoompololwa kwa Leza mwa Kilisito Jeso. ¹⁵ U kuli uswe toonse nitwakashima, atutelaike munzhila ya bolya; naakuti mulatelaika bwaandeene kuli shimwi, Leza aze ulakashizubulula shesho kuli umwe. ¹⁶ Nikuba bobo, atupone kuli checho nchitwakayana kale. ¹⁷ Amunjiye mbwinchita,nubakwesu. A mubalangishe babo balo beenda muchinkozha chesu checho nchitwakamushiila. ¹⁸ Banji banji baleenda---babo balo Ume mbundakamushimwina, amana ninzho Ume ndamushimwina mu misozhi---ukoya bashikondo ba chichinkano chaka Kilisito. ¹⁹ Mamanino abo nkuzonaunwa. Kaambo leza wabo ndifwu lyabo, amana bulemu bwabo buli munsoni shabo. Balatelaika bulyo shintu shaanshi yeno. ²⁰ Pele munzhi wesu uli kwizeulu, kuhwa koko aswe nkutulindila mufwutuli, Mwami Jeso Kilisito. ²¹ Ulakaichincha yezhi mibili yesu kuba mibili mibambe ukoya mubili wakwe wabulemu, mubambe kwiita munsana shakwe kuya kushibika shoonse shintu kwakwe mwini.