¹ U bobo, nubakwesu bazandika babo Ume mbwinzhimbile, mukubotelwa alimwi u mushini, munzhila yezhi a muzhime mulukamantano mu Mwami, nimuzandika nubeezuma. ² Ume ndakumbila kwa Ewudiya, alimwi ndakumbila Sinteki, bakwate muzeezo womwi mu Mwami. ³ Ee ye, Ume ndamukumbila, nubeenzuma beni beni, mubayohwe baba bakaintu balo mbutusebeza abo kumwaya mulumbe, antoomwi u Kilementi alimwi u babo boonse basebezhima, bali mazhina abo Mwibuka lya Bumi. ⁴ A mubotelwe mu Mwami lyoonse. Alimwi Ume ndaamba ati, amubotelwe. ⁵ Kulibonzha kwenu a kuzhibwe ku bantu boonse. Mwami uli afwaafwi. ⁶ Mutabi nimusukamina kufwumbwa chintu. Pele, muli shoonse kwiita mukukomba chakulifwiinsha u kupa kulumba, shesho nshimuzanda a shizhibwe kwa Leza, ⁷ alimwi u luumuno lwaka Leza, lulabaala busongo boonse, lulakeebamba myonzo yenu alimwi u matelaishi enu mwa Kilisito Jeso. ⁸ Kumanizha, nubakwesu, kufwumbwa shintu nshabwini, kufwumbwa shintu shilikwete bulemu, kufwumbwa shintu shililuleme, kufwumbwa shintu nshilondoshi, kufwumbwa shintu shileebeka, kufwumbwa shintu shilikwete mulumbe mubotu, naakuli chintu chili kabotusha, naakuti kuli chintu checho chizandika kulumbaizha, a mushitelaike shintu sheshi. ⁹ Shintu shesho umwe nshimwakayiya u kushitambula u kushiteelela alimwi u nshimwakabona mwangu, a mushichite shintu sheshi, ati Leza waluumuno ulakaba amwe. ¹⁰ Ume ndabotelwa chini chini mu Mwami kaambo ninzho kumamanino mwakanka alimwi kuntelaika. Mwakaakuntelaika chini chini, pele kakwiina chiindi kwenu kwaamba munjohwe. ¹¹ Nshaamba bobo kwaamba Ume kuli nchizanda. Ume ndakayiya kuba muli checho kuli shesho shoonse nshizhila. ¹² Ume ndichizhi kuba mupushi, alimwi Ume ndichizhi mbuchibele waakukwete shinji shinji. Munzhila shoonse alimwi u mushintu shoonse Ume ndakayiya maseseke mbwinjelele kuchizhiba kulya naaba kufwa inzala, amana mbwinkonzha kukwata shinji shinji naa kuli shizandika. ¹³ Ume ndakonzha kushichita shoonse shintu kwiita muli wezo walo unzumya nzumya. ¹⁴ Nikuba bobo, mwakachita kabotu kwaabana ame mu mukatazho angu. ¹⁵ Umwe nuba Filipo mulizhi kwaamba ati kumatalikilo a mulumbe, lelyo nindakakuhwa ku Masedoniya, kwiina chikombelo chakanjohwa mu kaambo kakupa alimwi u kutambula chita bulyo umwe nubeni. ¹⁶ Nikuba lelyo nindakaakuli mu Tesalonika, mwakatuma buyohwi muli nshindakaakuzanda kwashiindi shinji shinji. ¹⁷ Takuli kuti Ume ndakapula shipo. Pele, ndakapula muchelo wezo walo uya bulizungila kuli checho chizandika. ¹⁸ Ume ndakashitambula shoonse buzulile, alimwi shibaala. Ume ndakatambula shoonse nshizanda uninzho bolya Ume ndakatambula kuhwa kwa Epafulodikasi shintu nshimwakatuma. Shintu shinukila kabotu kabotu, mulumbo utambulika alimwi u botezha Leza. ¹⁹ Leza wangu ulakamupa shoonse nshimuzanda kwiingayina u buhubi bwakwe mubulemu kwiita mwa Kilisito Jeso. ²⁰ Inzho kwa Leza ushesu a kube bulemu kwa lyoonse u lyoonse. Ameni. ²¹ A mubaazhe boonse bantu basalala baka Leza umwa Kilisito Jeso. Bakwesu balo mbutuli abo bamwaanzha. ²² Boonse bantu basalala baka Leza balikono bamwaanzha, a kandosha babo baka Kayizala bang'anda yakwe. ²³ Luse lwa Mwami Jeso Kilisito lube amwe mu moza wenu.