¹ Naakuti kuli checho chimuzumya zumya muli Kilisito, naakuti kuli checho chimuumbulizha kwiita mulufwuno, naakuti kuli luswaangano mu Moza, naakuti kuli bali intenda alimwi inkumbu, ² nkukuti akuzulile kubotelwa kwangu kuba bakwete muzeezo womwi, bakwete lufwuno lomwi, kukwatana antoomwi mu moza, alimwi u kukwata chakuchita chomwi. ³ Bula nchuuchita kuhwa kuli nchuuzanda naaba kulisumpula kwiina mulimo. Pele a mulizhole anshi u kubona kwaamba ati bamwi balabaala aali umwe. ⁴ Umwi umwi wenu a bone kwaamba ati tachiti bulyo nchaazanda lwakwe mwini, pele u nshibazanda bamwi. ⁵ A mukwate muzeezo wezu mukati kenu wezo walo wakaakuli mwa Kilisito Jeso, ⁶ walo, nikuba kuti kakwete chimo cha Leza, wiina naakalibika kuliingayinya u Leza kwaamba a likwatililile ngawo. ⁷ Pele, wakalyuubaula lwakwe mwini, kubweza chimo cha musebezhi, amana wakazhalwa mbubona buzhalwa bantu boonse. Awo mukuyanwa kwaamba ati wakaba muchiimo cha buntu, ⁸ wakalifwiinsha lwakwe mwini alimwi u kuchilila kushikila ku lufwu, ku lufwu a chinchinkano. ⁹ U bobo aze Leza wakamusumpulisha amane wakamupa izhina lelyo libaala a mazhina woonse, ¹⁰ kwaamba ati kwizhina lyaka Jeso woonse mahwi a kafwukame, mwizeulu alimwi anshi alimwi u kunshi yanshi, ¹¹ alimwi u mulaka woonse ulakazubulula kwaamba ati Jeso Kilisito ngu Mwami, kubulemu bwa Leza Tatesu. ¹² Inzho bobo, nubafwunwa bangu, mbubona lyoonse mbumwaakuchilila, kutali bulyo a bushu bwangu pele ninzho mukwatishe lelyo nintali amwe, a musebeze kulufwutuko lwenu chabukandu alimwi u kuzhangama. ¹³ Kaambo ngu Leza nguukaakusebeza mukati kenu antoomwi u checho nchimuzanda kuchita u kuchita bubotu bobo bumubotezha. ¹⁴ A muchite shoonse shintu chakubula kutongauka nikuba kukazhanya ¹⁵ kwaamba ati mube bayina kampenda alimwi basalalisha, banakwe Leza bayina shibiyabi akati kabo bapilingene alimwi u bashikupenzha musela,momo mwalo mu mumweka ukoya mumuni wa muluundu. ¹⁶ Amukwatishe kwizwi lyabumi kwaamba ati mubuzuba bwaka Kilisito Ume nkalisumpule kwaamba ati Ume ndiina indakalukanka chabulyo nikuba kusebeza chabulyo. ¹⁷ Pele nikuba kuti Ume ndabikwa u koya mulumbo a chipayizho alimwi u kumulimo wa lushomo lwenu, Ume ndabotelwa alimwi u kusekelela amwe noonse. ¹⁸ Munzhila yomwi njiyona mulyeelele amwe kubotelwa alimwi u kusekelela ame ¹⁹ Pele Ume ndazanda kwiita mu Mwami Jeso kumutuma Timoti kwenu chakufwambaana, kwaamba ati Ame nkayane kuzumishiwa lelyo ndakazhiba mbumupona. ²⁰ Kaambo kwiina naaba womwi uuli u koya nguwe, wezo walo mubwini u mubikile ku monzo umwe. ²¹ Kaambo bamwi boonse balakapula bulyo nshibazanda lwabo beni, kutali shintu shaka Jeso Kilisito. ²² Pele amwe mulibwizhi bumi bwakwe mbububele, u koya mbwaali mwana alimwi u baushi, twakasebeza aze mu mulimo wa mulumbe. ²³ U bobo Ume ndashoma kuti ndamutuma ndamana kubona shintu mbushikanyendela. ²⁴ Pele Ame ndashomesha mu Mwami kwaamba Ame lwangu ndimwini ndakazhiza chakufwambaana. ²⁵ Pele Ume ndatelaika kuti kulazandika kutuma Ipafuloditasi azhoke kwenu. Walo mukwesu shimulimoma alimwi mushilikani ma, amana mutumwa alimwi musebezhi muli nshizanda. ²⁶ Kaambo kapengele, alimwi kazandisha kuba amwe noonse, mwakateelela kuti kali mulwazhi. ²⁷ Chini chini kasatile chakuti kazanda kufwa. Pele Leza wakamweetelela, kutali nguwe bulyo pe, pele ame mbubona wakanjetelela, kwaamba ati Ame intabi ninkwata mapenzhi a mapenzhinina. ²⁸ U bobo nchichecho nchizandila kumupilusha kwenu, kwaamba ati mwakamubona alimwi mukabotelwe, kwaamba kupenga kwangu kukacheye. ²⁹ Ubobo, amu mutambule mu Mwami chakubotelwa. A mubalemeke bantu bali ukoya wezu. ³⁰ Kaambo kooli mulimo waka Kilisito uuti u kamulete kufwaafwi u lufwu. Wakaaba bumi bwakwe kwaamba ati a manizhe mulimo ngumwataakulozha kuchita.