¹ Inzho Yaahwe wakamwaambila Mozesi ati, " Koya kwa Falawo u kamwaambile ati, 'Mbubolya mbwaamba Yaahwe: "Baleke bantu bangu baakuya kwaamba ati bakalozhe kumpayila. ² Naakuti wabakasha kwaamba baakuya, ndachizuzha chishi chako choonse u ba kabombwe. ³ Lweenje lulakazula ba kabombwe. Balakeza kunjila mung'anda yako, u kubulo nkuuwona, alimwi a bulo bwako. Balakanjila mu maanda a basebezhi bako. Balakaya ku bantu bako, u muma oveni a yikila, alimwi u mushibiya shikandila shinkwa. ⁴ Bakabombwe balakamupezha, u bantu bako, alimwi u basebezhi bako boonse.''''' ⁵ Yaahwe wakamwaambila Mozesi bolya, Aamba kwa Aloni ati, 'Tandabika itashi lyako u musako wako a nyenje, u tulonga, alimwi u tuzhiba, u chite bobo kwaamba ba kabombwe bazule inshi yoonse ya Ijipiti.''' ⁶ Aloni wakatandabika itashi lyakwe a meenzhi a Ijipiti, kumane kwakahwa bakabombwe bakeezuzha inshi ya Ijipiti. ⁷ Pele bashimabibo bakachita mbubona u mabibo abo; bakahuzha bakabombwe bakeezuzha inshi ya Ijipiti. ⁸ Ngoonaawo Falawo wakaboompolola Mozesi u Aloni waamba ati, "Amukombe kwa Yaahwe kwaamba a bakushe bakabombwe kuhwa kulyuume alimwi u ku bantu bangu. Ndamana ndabaleka bantu baakuya, kwaamba bakamuchitile chipayizho." ⁹ Mozesi wakaamba kwa Falawo ati, "Upe bulemu alyuume. Ndililiye ninjaku kukombela, basebezhi, alimwi u bantu bako, kwaamba ati bakabombwe bakakushiwe kuhwa kulyuuwe umu maanda enu bakashaale bulyo mu lweenje?" ¹⁰ Falawo wakaamba ati, "Uzona bolya." Mozesi wakaamba ati, "Akube mbubona mbuwaamba, kwaamba uzhibe kwaamba ati kwiina uumwi uuli ukoya Yaahwe, Leza wesu. ¹¹ Bakabombwe balakakuhwa kwako, ku maanda enu, ku basebezhi bako, alimwi u bantu bako. Balakashaala bulyo mu lweenje." ¹² Mozesi u Aloni bakakuhwa kwa Falawo. Ngoonaawo Mozesi wakalilila kwa Yaahwe ku kaambo kaba kabombwe babo mbaakaleta kwa Falawo. ¹³ Yaahwe wakachita mbubona Mozesi mbwaakakumbila: Bakabombwe bakafwa baakuli mu maanda, mu lubanza, alimwi umu myuunda. ¹⁴ Bantu bakababungika ba kabombwe antoomwi milwi milwi, inshi yoonse ya kanunka. ¹⁵ Pele lelyo Falawo naakabona kwaamba ati waubilwa ipenzhi lyamana, wakoozumya monzo alimwi wiina naakamuteelela linji Mozesi u Aloni, mbubona Yaahwe mbwaakaamba ati ulakachita. ¹⁶ Yaahwe wakaambila Mozesi ati, "Aamba kwa Aloni, 'Tandabika musako wako anshi kuhwe lufwuko lwaanshi, kwaamba ati lusanduke kuba injina inshi yoonse ya Ijipiti.''' ¹⁷ Bakachita bobo. Lelyo Aloni naakatandabika itashi lyakwe lili u musako amane wauma lufwuko lwaanshi, injina shakaba a bantu u banyama. Lufwuko loonse lwaanshi lwakaba injina inshi yoonse ya Ijipiti. ¹⁸ Bashi mabibo bakasoleka u mabibo abo kwaamba bapange injina, pele bakakakilwa. Ubobo kwakaba injina a bantu alimwi a banyama. ¹⁹ Inzho ba shimabibo bakamwaambila Falawo ati, "Sheshi ninsana shaka Leza." Pele wakazuma monzo waka Falawo, ubobo wakakaka kubateelela. Chakaba mbubona Yaahwe mbwaakaamba ati Falawo ulakachita. ²⁰ Yaahwe wakamwaambila Mozesi ati, "Bwacha chifwumo fwumo u kazhime kumbele kwa Falawo a kaakuya ku lweenje. U kaambe kwakwe ati, 'Yaahwe waamba ati: "Baleke bantu bangu baakuya kwaamba ati bakampayile. ²¹ Pele naakuti utabaleka bantu bangu kuti bakuuya, Ndakatuma inzhi shinji shinji aali uwe, basebezhi bako, u bantu bako, alimwi umu maanda enu. Maanda a bantu ba Ijipiti alakazula inzhi shinji shinji, alimwi aanshi ngu baya kuzhima alakazula inzhi. ²² Pele ku buzuba bobo kwiina chiya kushika ku Geshomu, inshi yezho bantu bangu mu bakala, kwaamba ati takukabi inzhi shiya kushika ko. Chechi chilakachitika kwaamba ati mukazhibe kuti Ndime Yaahwe akati kanshi yezhi. ²³ Ndakaandaanya bantu bangu u bantu bako. Chechi chitondezho chansana shangu chilakachitika zona.''''' ²⁴ Yaahwe wakachita bobo, makata makata anzhi akanjila mung'anda yaka Falawo u maanda a basebezhi bakwe. Inshi yoonse ya Ijipiti, yakachakana chini chini u kaambo kanzhi shinji shinji. ²⁵ Falawo waketa Mozesi u Aloni amane wakaamba ati, "Kamuya, mukape shipayizho kwa Leza wenu mono mumona munshi yesu." ²⁶ Mozesi wakaamba ati, "Tachili kabotu kulyuuswe kuchita bobo pe, kaambo shipayizho nshituchita kwa Yaahwe Leza wesu nchintu chilozha kubabiila bantu bamu Ijipiti. Kuti twachita shipayizho shesu a bushu bwabo shesho shilozha kubabiila bantu ba Ijipiti, saa tabakatuyasi mabwe? ²⁷ Tulyeelele, kuya kwa mazuba otatwe mulukula, kwaamba ati tukape chipayizho kwa Yaahwe Leza wesu, mbubona mbwaakatulailila." ²⁸ Falawo wakaamba ati, "Ndakamuhwuminya kuya kupa chipayizho kwa Yaahwe Leza wenu mulukula. Pele bulyo tamweelele kuya kulaale. Amukankombele ame." ²⁹ Mozesi wakaamba ati, "Ngoonaawa ndakuhwa bulyo kwako, Ndakakomba kwa Yaahwe kwaamba ati inzhi sheshi shinji shinji shikamuleke, u Falawo, u bantu bako. Pele tweelele kutuchenga linji pe kukasha bantu besu kwaamba baye kupa chipayizho kwa Yaahwe." ³⁰ Mozesi wakakuhwa kwa Falawo amane wakakomba kwa Yaahwe. ³¹ Yaahwe wakachita mbubona Mozesi mbwaakakumbila; wakashikusha inzhi shoonse kuhwa kwa Falawo, u basebezhi bakwe, alimwi u bantu bakwe. Kwiina inzhi yakashaala niiba yomwi. ³² Pele Falawo wakoozumya alimwi monzo wakwe, wakabakasha alimwi bantu kwaamba baakuya.