¹ Yaahwe wakamwaambila Mozesi ati, "Bona, ndakakuchita uwe kuba ukoya leza kwa Falawo. Aloni munyoko ulakaba mushinshimi wako. ² Uwe ulakaamba shoonse shesho nshinkaakulailila kuya kwaamba. Aloni munyoko ulakamushimwina Falawo kwaamba ati a baleke bantu ba Izilaili kuhwa mu chishi chakwe. ³ Pele ndakoozumya monzo waka Falawo, amana ndakachita shitondezho shinji shinji shansana shangu, u shizoosha shinji shinji, mu chishi cha Ijipiti. ⁴ Pele Falawo takakuteeleli uwe pe, ubobo ndakabika itashi lyangu mu Ijipiti u kukusha balemu, bantu bangu, bantu ba Izilaili, kuhwa munshi ya Ijipiti kwiita munsana sha bubeteshi. ⁵ Bana Ijipiti balakanzhiba ati ndime Yaahwe ndakachita insana shangu mu Ijipiti a kukusha bantu ba Izilaili a kati kabo." ⁶ Mozesi u Aloni bakachita bobo; bakachita mbubona Yaahwe mbwaakabalailila. ⁷ Mozesi kakwete myaka makumi lusele ya kuzhalwa, aze Aloni kakwete myaka makumi lusele u myaka yotatwe ya kuzhalwa nibakaakwaamba u Falawo. ⁸ Yaahwe wakaamba kwa Mozesi u Aloni ati, ⁹ "Naakuti Falawo a kaambe kulyuumwe ati, 'Amuchite maleele,' u kamwaambile Aloni ati, 'Bweza musako wako u waale anshi ku bushu bwaka Falawo, kwaamba abe muzoka.''' ¹⁰ U bobo Mozesi u Aloni bakaya kwa Falawo, bakachita mbubona Yaahwe mbwaakalailila. Aloni wa koowaala musako wakwe ku bushu bwaka Falawo u basebezhi bakwe, ngoonaawo wakaba muzoka. ¹¹ Inzho Falawo aze wakoompolola bantu bakwe basongo u bang'anga. Bakachita mbubona kwiita mu mabibo abo. ¹² Umwi uumwi wakakoowaala musako wakwe anshi, misako yakaba bazoka. Pele musako waka Aloni wakabamina bazoka babo. ¹³ Falawo wakoozumya monzo wakwe, wiina naakabateelela pe, mbubona Yaahwe mbwaakaamba. ¹⁴ Yaahwe wakamwaambila Mozesi ati, "Monzo waka Falawo muzumu, wakaka kubaleka bantu kwaamba baye. ¹⁵ U kaye kwa Falawo chifwumo fwumo a kaya ku lweenje. U kazhime a lukonka lwa lweenje kwaamba u kamuswaanganye, u kabweze u musako wako mwitashi lyako wezo wakasandukile kuba muzoka. ¹⁶ U kaambe kwakwe ati, 'Yaahwe, Leza waba Hebulu, wantuma kwako kwaamba ati, "U baleke bantu bangu, kwaamba ati bakampayile mulukula. Kushika uninzho tuteeleli pe." ¹⁷ Yaahwe u laamba bolya: "Muli chechi mulakazhiba ati ndime Yaahwe. Ndakauma meenzhi a mu lweenje lwa Nailo u musako wangu wezo uuli mwitashi lyangu, lweenje lulakasanduka kuba bulowa. ¹⁸ Inswi shoonse shili mu lweenje shilakafwa, lweenje loonse lulakanunka. Bantu ba Ijipiti tabakachilozha kwaanwa meenzhi kuhwa mu lweenje lolu.''''' ¹⁹ Alimwi Yaahwe wakaamba kwa Mozesi ati, "Mwaambile Aloni ati, 'Bweza musako wako utambike itashi lyako a meenzhi amu Ijipiti, a nyenje, milonga, alimwi u tuzhiba twabo, kwaamba ati meenzhi abo abe bulowa. U kachite bobo kwaamba ati kukabe bulowa inshi yoonse ya Ijipiti, u mushitesho sha shisamu alimwi u mabwe. ²⁰ Mozesi u Aloni bakachita mbubona mbwaakabalailila Yaahwe. Aloni wakatandabika musako wakwe amane wakaauma meenzhi a mu lweenje, a bushu bwaka Falawo u basebezhi bakwe. Woonse meenzhi aali mu lweenje a kasanduka kuba bulowa. ²¹ Inswi mu lweenje shakafwa, alimwi alo lweenje lwakatalika kununka. Bantu bamu Ijipiti bakakakilwa kwaanwa meenzhi kuhwa mu lweenje, alimwi bulowa bwakaba mu masena woonse a mu chishi cha Ijipiti. ²² Pele ba shimabibo bamu Ijipiti abo bakachita mbubona u mabibo abo. Ubobo monzo waka Falawo wakazuma, wakakaka kubateelela ba Mozesi u Aloni, mbubona Yaahwe mbwaakaamba ati chilakaba. ²³ Ngoonaawo Falawo wakachinduluka wabweela mung'anda yakwe. Wiina naakachibika ku monzo chechi. ²⁴ Bana Ijipiti boonse bakasha mikalo kumbali ku lweenje kulanga meenzhi a kunwa, pele kabataalozha kwaanwa meenzhi amu lweenje mwini. ²⁵ Kwakayita mazuba aali chiloba kuhwa Yaahwe naakauma lweenje lwa Nailo.