¹ Nikwakamana kuchitika sheshi, Mozesi u Aloni bakaya kwa Falawo baamba ati, "Mbubolya Yaahwe, Leza wa Izilaili, mbwaamba: 'Baleke bantu bangu baye, bakanchitile ipobwe mulukula.''' ² Falawo wakaamba ati, "Nguni anu Yaahwe? Kaambooyi nchinkonzha kupupulala kwizwi lyakwe alimwi u kuleka ba Izilaili kwaamba baye? Ume nshimwizhi wezo Yaahwe; nikuba bobo, Nshibaleka ba Izilaili kwaamba baye." ³ Bakaamba ati, "Leza waba Hebulu wakatuswaanganya. Inzho tuleke tweende mushinzo wa mazuba otatwe kuya mulukula kwaamba tukachite chipayizho kwa Yaahwe Leza wesu kwaamba ati atakabi naatuma luuwo lubiyabi niliba icheba." ⁴ Pele mwami wa Ijipiti wakaamba kwa Mozesi u Aloni ati, "Kaambooyi mulazanda kubatola bantu baba u kubalesha kusebeza milimo yabo? Amubweele ku milimo yenu." ⁵ Alimwi Falawo wakaamba ati, "Baba bantu bahwulisha kubaala uswe mono muchishi chesu, mwamana mulazanda kubalesha kusebeza." ⁶ Mu buzuba bobo mbubona, Falawo wakalayilila babo baakusebezha bantu alimwi u balangilizhi boonse. wakaamba ati, ⁷ "Kuleka mbuli mbumwaakuchita lyoonse, Inzho mulyeelele kuleka kubapa bantu baba bwizu bwa kutesha chitina. Amubaleke baakubungika bwizu lwabo beni. ⁸ U bobo, mulyeelele kubona kwaamba ati bachuuma mweelwe welya nguwena wa chitina ngubaakuuma lyoonse. Mutabi nimuhwumina kwaamba baakuuma chitina chongaana pe, ati kaambo mbakata. Nkukaambo kako nchibaambila ati, 'Amutuleke tuukuya tukape chipayizho kwa Leza wesu.' ⁹ Amubasebezhe baba balombwana chibaala mubone kwaamba ati balyuukwatishe mulimo wezo lyoonse alimwi mutaateeleli linji mazwi abo a bubeshi pe." ¹⁰ Ngoonaawo bashikubasebezha alimwi u balangilizhi bakaya kubaambila bantu. Bakaamba ati, "Mbubolya mbwaamba Falawo: 'Ndiina ninkaamupa linji bwizu. ¹¹ Umwe lwenu nubeni mulyeelele kuya kulanga bwizu kufwumbwa koko nkumuya kubuyana, pele busebeze bwenu tabuchincha pe.''' ¹² U bobo bantu bakamwaala chishi choonse cha Ijipiti kuya bubungika bwizu. ¹³ Bashikubasebezha kababukwete kubashinikizha kabaamba ati, "Amumanizhe mulimo wenu, mbubona mbumwakaakusebeza chiindi nitwakaakumupa bwizu." ¹⁴ Bantu baka Falawo bashikubasebezha kabauma balangilizhi, babo bakaakuli baba bantu ba Izilaili, mbubona balombwana babo mbubakabika kusololela basebezhi. Bashikubasebezha kabataleka kubabuzha ati, "Kaambooyi mwiina nimwauma matina ngu mweelele kuuma, uzona lyayita naaba bwasunu, u koya mbumwaakuuma lyoonse kunshi koku?" ¹⁵ Inzho balangilizhi, bakaakuli baba bantu ba Izilaili, bakaya kwa Falawo kuya kutongauka. bakaamba ati, "No kaambooyi watuchita bolya tubasebezhi bako? ¹⁶ Kwiina linji bwizu buchipewa kubasebezhi bako, pele bachibukwete kutushinikizha ati, 'Amuume chitina!' Uswe, tubasebezhi bako, tulaumwa kwa ninzho, pele nkubisha kwa bantu bako beni." ¹⁷ Pele Falawo wakaamba ati, "Muli bakata umwe! Muli bakata umwe! Mulaamba ati, 'Tuhwumizhe tukuya tukape chipayizho kwa Yaahwe.' ¹⁸ Uninzho bolya kamubweele ku mulimo. Kwiina linji nikukaapewa bwizu nkumubele, Pele mulyeelele mbubona kuuma mweelwe nguwena wa chitina." ¹⁹ Balangilizhi, babo bakaakuli baba bantu ba Izilaili, nibakaambilwa bobo bakabona kwaamba ati ninzho baba mwipenzhi ikando, "Tamweelele kuuzhola munshi mweelwe wa chitina pe." ²⁰ Bakabaswaanganya ba Mozesi u Aloni, balo bakaakuzhimine ansengwe, chiindi nibakaakuhwa kwa Falawo. ²¹ Bakaamba bolya kwa Mozesi u Aloni ati, "Yaahwe naamubone alimwi amupe chisubulo, kaambo mwatuchita kuba babiyabi kubushu bwaka Falawo alimwi u basebezhi bakwe. Mwabika icheba mu matashi abo kwaamba ati batuyaye." ²² Mozesi wakabweela alimwi kwa Yaahwe waamba ati, "Mwami, kaambooyi waleta ipenzhi ku bantu baba? No wakantuminaanzhi? ²³ Choonse chiindi ndaya kwa Falawo kuya kwaamba aze mwizhina lyako, watalika kubapenzha bantu baba, amana wiina kubahwuna bantu bako."