¹ Mozesi wakayingula ati, "No kuti batakanshomi naa nkuteelela nshinjakwaamba pele bakaambe ati, 'Yaahwe wiina naakakubulikila'?" ² Yaahwe wakaamba kwakwe ati, "Nchiiyi checho chili mwitashi lyako?"Mozesi wakayingula ati, Musako." ³ Yaahwe wakaamba ati, "Uwaale anshi." Mozesi wakauwaala anshi musako, umane wakasanduka kuba muzoka. Abone bobo Mozesi wakasesuluka. ⁴ Yaahwe wakaamba kwa Mozesi ati, "Tambika itashi mukwate nkwaali ku muchila." Ubobo wakatambika itashi wakamukwata muzoka nkwaali ku muchila. Umane wakaba musako alimwi mwitashi lyakwe. ⁵ "Chechi chilakaba bolya kwaamba ati bakashome kuti Yaahwe, Leza waba shaakale babo, Leza waka Abulahamu, Leza waka Ayizeki, alimwi u Leza waka Jakobo, wakalibonya kulyuuwe." ⁶ Yaahwe wakamwaambila Mozesi alimwi ati, "Inzho bika itashi lyako mukati muchikobelo chako." Mozesi wakalibika itashi muchikobelo. Naakalikusha, limane, itashi lyakakwata chinsenda, lya katuba bu ukoya lukobo. ⁷ Yaahwe wakaamba ati, "Libike itashi alimwi muchikobelo." Mozesi wakalibika alimwi itashi muchikobelo chakwe, inzho naakalikusha , wakayana kwaamba ati lyapona lyaba kabotu alimwi, lyakaba mbubona mbuwakaakubele mubili wakwe. ⁸ Yaahwe wakaamba ati, "Naakuti batakakushomi--batakabikili muzeezo ku chitondezho chitaanzhi chansana shangu nikuba kutachishoma, nkukuti balakashoma ku chitondezho chabili. ⁹ U bobo naakuti batakashomi ku shitondezho sheshi shobile shansana shangu, nikuba kuteelela nchuuti u kaambe, u kabweze meenzhi kuhwa mu lweenge wamana u kaatile anshi inzumu. Meenzhi azo alakaba bulowa." ¹⁰ Inzho Mozesi wakamwaambila Yaahwe ati, "Mwami, Ume nshichilonzha kwaamba kabotu, nchili mbubona kuhwa nuwakatalika kwaamba u musebezhi wako. Ndakakamizha alimwi mulaka wangu mulemu." ¹¹ Yaahwe wakaamba kwakwe ati, "Saa nguni wakapanga mulomo wa muntu? Nguni upa muntu kutaamba naa bu chimpama naa kubona nikuba kuba moofwu? Saa nshili Ume, ndi Yaahwe? ¹² Inzho ubobo koya, ndakakuyohwa kwaamba alimwi ndakakuyiisha checho nchuuya kwaamba." ¹³ Pele Mozesi wakaamba ati, "Mwami, akaka tuma umwi, kufwumbwa wezo nguuzanda kutuma." ¹⁴ Inzho Yaahwe wakamulemanina Mozesi. Wakaamba ati, "No mbuti Aloni, munyoko, mu Levi? Ndizhi kwaamba ati ulalozha kubandika kabotu. Inzho bolya, uli munzhila kwiza kwaamba ati muswaangane, amana a kubona, ulabotelwa chini chini mu monzo wakwe. ¹⁵ Ulakamwaambila mazwi ngaati a kaambe, ndakamwaambila cha kwaamba, alimwi ndakamuyiisha chakuya kuchita. ¹⁶ Walo ulakaakukwaambilila ku bantu. Ulakaba ngu mupanduluzhi wako, alimwi ulakaba ukoya ndiwe Leza wakwe. ¹⁷ Ukootolelele musako wezu mwitashi lyako, nguukaachisha shitondezho." ¹⁸ Inzho Mozesi wakabweela kwa Jetulo mukwaakwe waya kumwaambila ati, "Ndakumbila unhwumizhe nje mbweele ku bakwesu babo bali ku Ijipiti kwaamba nkabone naa bachipona." Jetulo wakaamba kwa Mozesi ati, "Koya mu luumuno." ¹⁹ Yaahwe kamwaambilile Mozesi naakaakuchili mu Midiyani ati, "Koya, piluka ku Ijipiti, kaambo boonse bakaakuzanda kukuyaya bakafwa." ²⁰ Ubobo Mozesi wakabweza mwinakwe u banakwe beembezhi amane wabalizika ambongolo. wakabweela kwi Ijipiti, wakoobweza u musako waka Leza mwitashi lyakwe. ²¹ Yaahwe wakamwaambila Mozesi ati, "Bolya mbuwabweela kwi Ijipiti, u kachite shizoosha shoonse kwa Falawo shesho shindakupa munsana shako. Pele ndakoozumya monzo wakwe, takabaleka bantu kwaamba baye. ²² Ulyeelele kuya kwaamba kwa Falawo ati, 'Mbubolya mbwaamba Yaahwe ati, Izilaili ngu mwanangu, mutaanzhi, ²³ ubobo Ume ndaamba kwako ati, "Muleke mwanangu aye, kwaamba a kalozhe kumpayila." Pele mbuwakaka kwaamba ati aye, ndamuyaya mwanako mweembezhi wako, mutaanzhi.''' ²⁴ Inzho nibakaakuya bweenda, lelyo nibakakala mashiku, Yaahwe naakamuswaanganya Mozesi kakanza kumuyaya. ²⁵ Inzho Zipola muka Mozesi wakabweza ibwe ikwange u koya intipa amane wakakosola lushoti lwa mwanakwe mweembezhi, amane kakanda wakakabika ku matende wakwe. Amane wakaamba ati, "Chini chini uli shibwinga wa bulowa kulyuume." ²⁶ Ubobo Yaaahwe wakamuleka Mozesi. Zipola wakaamba ati, "Uli shibwinga wa bulowa" u kaambo ka kupalulwa. ²⁷ Yaahwe wakaamba kwa Aloni ati, "Koya mulukula u kaswaangane u Mozesi." Ubobo wakaya, bakaswaanganina ku lupili lwa Leza, ashike wakamushonta. ²⁸ Mozesi wakamushimwina woonse mazwi ngaakaamba Yaahwe a kuti wakamutuma kuya kwaamba alimwi u shitondezho shoonse shansana shaka Yaahwe shesho nshaakamulailila kuya a kachite. ²⁹ Ngoonaawo Mozesi u Aloni bakaya kuswaanganya bakando kando ba bantu ba Izilaili. ³⁰ Aloni wakaamba woonse mazwi azo Yaahwe ngaakaamba kwa Mozesi. Amane wakachita shitondezho shansana shaka Yaahwe a bushu bwa bantu. ³¹ Bantu bakashoma. Lelyo nibakateelela ati Yaahwe wababona bantu ba Izilaili kwaamba waabona mapenzhi abo, bamane bakakotamika mashu abo u kumukomba.