¹ Ngoonaawo Mozesi u bantu Baizilaili bakayimba lwiimbo lolu kwa Yaave. Bakayimba ati, "Ndakayimba kwa Yaave, kaambo wazunda ukuzunda bukando; imbizhi ubashiliza wakabawaala mulwaatele. ² Yaave nshiinsana ulwiimbo lwangu, alimwi waba ngu lufhwutuko lwangu. Ngu Leza wangu, alimwi ndamutembaula, Leza ushi bataata, alimwi ndakamusumpula. ³ Yaave ngushikalumamba; Yaave ndiziihina lyakwe. ⁴ Wakashisowa shikochi shaka Falawo ubashikalumamba mulwaatele. Ubasale sale basololi baka Falawo boonse bakafwila mulwaatele lwa mabu. ⁵ Bulondo bwakabahwumba; bakaya anshi mukati mubulondo ukoya ibwe. ⁶ Itashi lyako lyachilyo, Yaave, ninsana shabulemu; itashi lyachilyo, Yaave, wabazonauna bashikondo. ⁷ Bushinsana bwako wakabazunda babo bakakubukila. Wakatuma bukali bwako bukandosha; bakamaninina ukoya ikwishi kwishi. ⁸ Kufwula bulyo kwenango lyako meenzhi woonse akalihwunga antoomwi; Meenzhi akunka akazhima bumulwi; bulondo bwameenzhi bwakaangana anshi alwaatele. ⁹ Ushikondo wakaamba ati, 'Ndabachilila, Ndakabeenzha, Ndakaabanya shakusaala; kuzandisha kwangu kulakazuzukizhiwa ngubabele; Ndakakusha icheba lyangu; itashi lyangu lilakabazonauna.' ¹⁰ Pele wakafwula bulyo muuwo wako, amana lwaatele lwa kabahwumba; bakebila ukoya chibulo mumeenzhi manji manji. ¹¹ Nguni uuli ukoya uwe, shinsana ikando mukusalala, utembaulwa ukulemekwa, uchita maleele? ¹² Wakatambika itashi lyako lyachilyo, imane inshi yakabamina. ¹³ Chihwuminano chako chiluleme wakasololela bantu babo mbuwakahwuna. Munsana shako wakabasololela kuya kubusena busalala koko nkuukala. ¹⁴ Bantu balakateelela, bamana balakazhangama; bukandu bulakabakwata bakala mu Filisitiya. ¹⁵ Bamana bami ba Edomu balakatiya; bashikalumamba ba Mowabu bakatenkema; boonse bakala mu Kenani bakazhangama chakuwizuka. ¹⁶ Bukandu alimwi ukutiya kulakabawila. Ukaambo kansana shaba shikalumamba bako, balakaba ukoya mabwe aliinzile mpaka bantu bako bakayite, Yaave--mpaka bantu mbuwakahwuna bakayite. ¹⁷ Ulakabaleta ukubashanga alupili lwa lukono lwako, busena, Yaave, bobo mbuwakabamba mwakukala, busena busalala, u Mwami wesu, bobo matashi ako ngaakabamba. ¹⁸ Yaave ulakalela kwa lyoonse ulyoonse." ¹⁹ Imbizhi shaka Falawo shakaya ushikochi shakwe ubashiliza mulwaatele. Yaave wakaazhola meenzhi amulwaatele akabahwumba. Pele Bantu Baizilaili bakeenda anshi inzumu mukati kati mulwaatele. ²⁰ Miliyamu mushinshimi mukaintu, Munina Aloni, wakabweza kooma, amane boonse bakaintu bakabweza tooma abo, kabaya buzhana aze. ²¹ Miliyamu wakabayimbila ati: "Amwiimbile Yaave, kaambo wazunda chabulemu. Bashikuliza imbizhi bakawalwa mukati mulwaatele." ²² Mozesi wakabasololela bantu Baizilaili kuhwa kulwaatele lwa mabu, Bakeenda bakaya kunjila mulukula lwa Shu. Bakeenda kwa mazuba otatwe mulukula bayina ngubakayana meenzhi. ²³ Bamane bakashika ku Mala, pele bayina nibakaanwa meenzhi akoko kaambo meenzhi azo kaalula. Ubobo bakabuulika bobo busena ati Mala. ²⁴ Ubobo bantu bakamutongaukila Mozesi bakaamba ati, "Nchiinzhi nchitukanwa?" ²⁵ Mozesi wakapayila kwa Yaave, amane Yaave wakamutondezha isamu. Mozesi wakaliwaala mumeenzhi, amane meenzhi akabota kunwa. Ngaawo Yaave ngaakabapela mulawo muzumu, alimwi inkuko koko nkwaakabasunka. ²⁶ Wakabaambila ati, "Naakuti mwapupulala kabotu kabotu kwizwi lyaka Yaave Leza wenu, mwamana mwachita chiluleme kumenso akwe, ukubika kutwi kumalailile akwe alimwi ukwiibamba milawo yakwe--Kwiina ninkaaleta malwazhi aali umwe ukoya azo ngundakapa Bantu Baijipiti, kaambo ndime Yaave wezo umuponya." ²⁷ Inzho bantu bakashika ku Elimu, koko kwakaakuli tuzhiba tuli ikumi utuzhiba tobile twameenzhi alimwi utulala tuli chiloba. Bakazaka awo kumbali kumeenzhi.