¹ Yaave wakamwaambila Mozesi, wakaamba ati, ² "Baambile bantu Baizilaili kwaamba ati bapiluke bamana bazake matente kufwaafwi u Pihahiloti, akati ka Migido u lwaatele, kabatana kushika ku Baala Zifoni. ³ Falawo ulakaamba bolya kubantu Bailaili ati, 'Balaya buzhiilika munshi yangu bapotana. Lukula lwakabamuma.' ⁴ Ndakoozumya mozo waka Falawo, amana ulakabatobela. Ndakakwata bulemu ukaambo ka Falawo alimwi ubashikalumamba bakwe boonse. Bantu Baijpiti balakazhiba ati Ndime Yaave." Ubobo Baizilaili bashimpa matente mbubona mbubakalaililwa. ⁵ Lelyo mwami wa Ijipiti naakashimwinwa kwaamba ati bantu Baizilaili baya, mizeezo yaka Falawo ubasebezhi bakwe bakabasandukila bantu. Bakamba ati, "Anu twachita buti? Twamuleka Izilaili kuleka kutusebezela." ⁶ Inzho Falawo wakabweza shikochi alimwi u bashikalumamba bakwe. ⁷ Wakabweza shikochi shili myaanda chisambonwi nshibakasala alimwi ushikochi shimwi shoonse Shaijipiti, ubasheezha aali shoonse. ⁸ Yaave wakoozumya monzo waka Falawo, mwami wa Ijipiti, amane mwami wakabachilila bantu Baizilaili. Inzho bantu Baizilaili bakeenda iinsana. ⁹ Pele Baijipti bakabachilila, antoomwi uba shimbizhi ushikochi boonse, ubaliza imbizhi, alimwi ubashikalumamba bakwe. Bakabayitilila Baizilaili kabazakile ku lwaatele kufwaafwi u Pi Hahiloti, kabatana kushika ku Baala Zefoni. ¹⁰ Lelyo Falawo naakashika afwaafwi, Bantu Baizilaili bakalyaalala mwizeulu ukuzoowa. Baijipiti bakabatandila, bamane bakakwata bukandu. Bantu Baizilaili bakalilila kwa Yaave. ¹¹ Bakaamba kwa Mozesi ati, "Saa kakwiina shuumbwe Mwiijipiti, kutuleta mono mulukula kwaamba tufhwe? Kaamboonzhi watuchita bolya, kutukusha Mwiijipiti? ¹² Saa imbo bolya mbutwakakushimwina Mwiijipiti? Twakaamba kwako ati, 'Tuleke tubeni, kwaamba tubasebezele Baijipiti.' Kachili kabotu nkutubele kubasebezela kubaala kwaamba ati tufhwile mulukula ." ¹³ Mozesi wakabaambila bantu ati, "Mutatiyi. Amuzhime nchi mubone mbwaakatuhwuna Yaave koko nkwaakachita bwasunu. Kwiina nimukakababona linji alimwi Baijipiti baba mbumwabona bwasunu. ¹⁴ Yaave ulamulwila umwe, mulyeelele bulyo kuzhima nchi." ¹⁵ Amane Yaave wakamwaambila Mozesi ati, 'Kaamboonzhi, Mozesi, nchuubukwete koompolola kwangu? Bashimwine bantu Baizilaili bahwile ambele kuya. ¹⁶ Tandabika musako wako, utandabike itashi lyako alwaatele kwaamba ulwaandaanye mushipanzha shobile, kwaamba bantu Baizilaili beende ukwiita mulwaatele anshi inzumu. ¹⁷ Mulizhi kwaamba ati ndakeezumya myonzo ya Baijipiti kwaamba bakabachilile. Ndakakwata bulemu ukaambo ka Falawo alimwi ubashikalumba bakwe, bashishichikochi, alimwi ubakuliza imbizhi. ¹⁸ Ngoonaawo Baijipiti balakazhiba ati Ndime Yaave lelyo ndakayana bulemu ukaambo ka Falawo, bashishichikochi, alimwi ubashikuliza imbizhi." ¹⁹ Angelo waka Leza, wakaakuyaabo Baizilaili, kaya bweenda kabachilile. Ikumbi kalyeenda kumbele kwabo alimwi kaliya kuzhima kumanumaabo. ²⁰ Ikumbi lyakazhiza akati Ka Baijipiti u Baizilaili. Kalili ikumbi lishiya ku Baijipiti, pele kalipa mumuni mashiku ku Baizilaili, ubobo lumwi luya kalutashika kufwaafwi kuli lumwi mashiku woonse. ²¹ Mozesi wakatandabika itashi lyakwe alwaatele. Yaave wakatonka lwaatele munshi umuuwo wa kwiwe mashiku azo woonse amane wakachita lwaateele kuba inshi inzumu. Muli chechi meenzhi akaandaana. ²² Bantu Baizilaili bakanjila akati ka lwaatele anshi inzumu. Meenzhi akalyaanga kuluya lwabo lwa kuchilyo alimwi ukuchimonsho. ²³ Baijipiti bakabachilila. Bakabachilila kuya kushika akati kalwaatele--imbizhi shoonse shaka Falawo, shikochi, ubashikuliza imbizhi. ²⁴ Pele nibwakacha chifhwumo, Yaave wakalangilila anshi abashikalumamba Baijipiti kwiita mwikumbi lya mulilo. Baijipiti wakabanyonganya. ²⁵ Mahwili abo ashikochi akabila muntimba, amana bashimbizhi bakakakilwa kweenda kabotu. Ubobo Baijipiti bakaamba ati,"Atubaleke Baizilaili, kaambo Yaave wabalwila kuhwa nkutubele." ²⁶ Yaave wakamwaambila Mozesi ati, "Tambika itashi lyako alwaatele kwaamba ati meenzhi azhoke abahwumbe Baijipiti, shikochi shabo, alimwi ubalombwana bashimbizhi." ²⁷ Ubobo Mozesi wakatambika itashi lyakwe alwaatele, amane lwakazhoka mbubona mbulubele nichakaba chifwumo. Baijipiti bakanjila mukati mulwaatele, amane Yaave wakabanjizha Baijipiti akati kalwaatele. ²⁸ Meenzhi akapiluka abahwumba ushikochi shaka Falawo, balombwana bashimbizhi, alimwi ubashikalumamba boonse babo bakaakuchilila shikochi mulwaatele. Kwiina wakafwutuka naaba womwi pe. ²⁹ Ubobo, bantu Baizilaili bakeenda anshi inzumu akati kati kalwaatele. Meenzhi kabuli bwaanda bwabo kuluya lwachilyo alimwi ulwa chimonsho. ³⁰ Yaave wakabafwutula Baizilaili mubuzuba bobo kuhwa kwitashi lya Baijipiti, amana Baizilaili bakababona bafwu amuuma. ³¹ Lelyo Baizilaili nibakashibona insana inkando shesho Yaave nshaakasebezha ku Baijipiti, bantu bakamutiya Yaave, amana bakamushoma Yaave alimwi umusebezhi wakwe Mozesi.