¹ Ngoonaawo Yaahwe wakaamba kwa Mozesi, waamba ati, ² "Amubike amabali kufhwumbwa mwana mweembezhi muzhale mutaanzhi, woonse mutaanzhi kuzhalwa akati kabantu Baizilaili, kube muntu naa muyama. boonse mbangu." ³ Mozesi wakabaambila ati, "Amubutelaike buzuba bobo, mbubuzuba bobo mbumwakamuhwa Mwiijipiti, kuhwa mung'anda ya buzhike, kwiita mwitashi lyansana lyaka Yaahwe ndilyakamukusha kuhwa mu busena bolya. Kwiina chinkwa chibike bumena cheelele kuliwa pe. ⁴ Ubwasunu mulamuhwa Mwiijipiti, mumwezhi wa Avivi. ⁵ Awo Yaahwe akamutola munshi ya Bakenani, Bahiti, Baamoni,Bahiviti, alimwi uBajebusiti, inshi yezho njaakashomezha bashaakale benu kumupa, inshi ikunka mukupa ubuchi--ubobo mulyeelele kubambilila chilengwa chakupayila mumwezhi wezu nguwena. ⁶ Kwa mazuba ali chiloba mulyeelele kulya chinkwa chiina bumena; mubuzuba bwachiloba kulaba ipobwe lyakulemeka Yaahwe. ⁷ Mulyeelele kulya chinkwa chiina bumena woonse mazuba azo aali chiloba; kwiina chinkwa chibike bumena cheelele kubonwa akati kenu. Kwiina bumena bweelele kulibonya aali umwe umuminyinza yanshi yenu. ⁸ Mubuzuba bobo mukabapandululile banenu ati, 'Ukaambo kachecho nchaakatuchitila Yaahwe lelyo nitwakamuhwa Mwiijipiti.' ⁹ Chechi chilakaba chizhibalusho chenu etashi lyako, alimwi nchizhibalusho ankumu yako. Chechi chilibolya kwaamba ati mulawo waka Yaahwe ukabe mumulomo wenu, ukaambo kansana ketashi lyaka Yaahwe wakamukusha Mwiijipiti. ¹⁰ Ubobo mulyeelele kubambilila mulawo wezu achiindi checho nchichona mwaka umwaka. ¹¹ Lelyo Yaave akamuleta munshi ya Kenani, mbubona mbwaakapinga nkumubele alimwi ukubashaakale benu kuchita, alimwi akamupa inshi, ¹² mulyeelele kubika amabali shaka Yaahwe shoonse shitaanzhi kuzhala kufhwumbwa ifhwu. Shoonse shitaanzhi kuzhalwa kushifwiiwa shenu shilombwana, shilakaba shaka Yaave. ¹³ Woonse mwana mutaanzhi wambongolo ulyeelele kumunununa umwana wambelele. Naakuti wiina kwiiula alimwi, nkukuti ulyeelele kwiikonona inshingo. Pele kubanako boonse bataanzhi beembezhi ulyeelele kubanununa. ¹⁴ Awo mwanako akakubuzha ati, 'Chechi chilaambaanzhi?' ulakamushimwina ati, 'Kalili itashi lyansana lelyo Yaave naakatukusha kuhwa Mwiijipiti, kuhwa mung'anda ya buzhike. ¹⁵ Lelyo Falawo naakazuma zuma kutukasha kuya, Yaave wakayaya bana bataanzhi boonse Mwiijipiti, antoomwi ubana batanzhi babantu uba banyama. Nkukaambo kako nchimpela chipayizho kwa Yaave shoonse shitaanzhi shilombwana ku kuzhalwa, pele boonse banangu beembezhi bataanzhi ndabanununa.' ¹⁶ Chechi chilakaba chizhibalusho amatasheenu, alimwi nchizhibalusho ankumu shenu, kaambo kakuli kwiita mwitashi lyansana lyaka Yaave lyakatukusha Mwiijipiti." ¹⁷ Lelyo Falawo naakabaleka bantu kwaamba baakuya, Leza wiina naakabasololela munshi yaba Filisiti, nikuba kuti inshi yezho keeli afhwaafhwi. Leza wakaamba ati, "Ambweni bantu balaba nibakachincha mizeezo yabo bakalwishiwa bamana bakapiluke Kwiijipiti." ¹⁸ Ubobo Leza wakabasololela bantu ukubazhingulusha mulukula kuya ku lwaatele lwa mabu. Bantu Baizilaili bakamuhwa munshi ya Ijipiti kabali ushilwisho shabo shankondo. ¹⁹ Mozesi wakaabwezelezha mafhuwa aka Jozefhu, kaambo Jozefhu wakapinga ku bana beembezhi ba Izilaili wakaambila ati, "Nchobeni Leza Ulakamuyohwa, amana mulyeelele kuya kushibweza shifwuwa shangu." ²⁰ Baizilaili bakeenda kuhwa ku Sukoti bamane bakazaka shifwutu ku Etam kumanina lukula. ²¹ Yaave wakabasololela muunza mwikumbi kuya bubatondezha inzhila. Mashiku kabasololela umuzenge wamulilo kubapa mumuni. Muli chechi bakalozha kweenda muunza umashiku. ²² Yaave wiina naakaleka kubasololela bantu chiindi chamuunza keendela mwikumbi mashiku keendela mumuzenge wamulilo.