¹ Yaahwe wakaambila Mozesi u Aloni munshi ya Ijipiti. Wakaamba ati, ² "Wezu mweezhi, ulaba mweezhi mutaanzhi, mweezhi mutaanzhi kumwaka wenu. ³ Shimwina mubungano wa Izilaili, 'Mubuzuba bweekumi bwa mweezhi weno balyeelele kutola umwi wuumwi kana kambelele na kana kampongo kabo beni, mukowa umukowa uchite bobo, mwana wambelele ing'anda iing'anda. ⁴ Naakuti bang'anda mbashoonto kumwana wambelele, wezo mulombwana u shimukobonina batole mwana wambelele naa buzani bwa kana kampongo bobo bukwana mweelwe wabantu babo. Bulyeelele kuba bunji bunji bulozha kulya banji banji, ubobo balyeelele kutola bukwana kwaamba balye boonse. ⁵ Mwana wambelele na mwana wampongo balyeelele kuba bayina kampenda, kachende ka mwaka womwi. Ulakonzha kutola kabelele na kapongo. ⁶ Ukakwabilile kwa mazuba ikumi u mazuba one mumwezhi wezo. Kwamana bobo boonse Baizilaili balyeelele kuyaya banyama babo mangolezha. ⁷ Mulyeelele kubweza bulowa muye mubike kumasena obile kushisamu shaakulyango alimwi ezeulu a shimasamu shaamulyango shamaanda azo ngumuya kulila buzani. ⁸ Mulyeelele kubulya buzani mashiku azo, mwamana kubuzocha amulilo. mukabulye uchinkwa chiina bumena, kulisha uchishu chilula. ⁹ Mutabi nimulya bubishi na bwiishe meenzhi, pele mu buzoche amulilo antoomwi umutwi, matende, alimwi utwamukati. ¹⁰ Tamweelele kushiya nichiba chomwi kushika chifwumo. Mulyeelele kutenta shoonse shiyakushaala chifwumo fwumo. ¹¹ Bolya mbumweelele kuya kubulya: kamulyaangile intambo shenu, makatulo kumaulu enu, alimwi umusako mwitashi. Mulyeelele kuya kubulya chakufhwambaana. Leli ndikubi lyaka Yaahwe lyakwiitilila. ¹² Yaahwe waamba ati: Ndayita mashiku inshi yoonse ya Ijipiti kuyaya boonse bana balombwana bakutaanguna abe muntu na munyama munshi ya Ijipiti. Ndakasubula baleza boonse ba Ijipiti bakupanga. Ndime Yaahwe. ¹³ Bulowa chilakaba chitondezho amaanda enu ndazhiza kwenu. Ndakabona bulowa, Ndakayitilila ndakazhiza kulwisha inshi ya Ijipiti. Wezu mwiika tookazhiza aali umwe kwiza kumuyaya pe. ¹⁴ Bobu buzuba chilakaba chizhibalusho chenu, bobo mbumweelele kuzhibaluka lyoonse kuba ipobwe lyaka Yaahwe; ku mazhalane woonse--chibe chizhibalusho chepobwe kwa lyoonse. ¹⁵ Kwamazuba aali chiloba mulyeelele kulya chinkwa chiina bumena. Mubuzuba bwakutaanguna mulyeelele kuya kubukusha bumena mu maanda enu. Woonse wezo uya kulya chinkwa chikwete bumena kuhwa mubuzuba butaanzhi kushikila mubuzuba bwa chiloba, ulakaandaanyiwa kuhwa ku Baizilaili. ¹⁶ Mubuzuba butaanzhi kulakaba muswaangano ngumukaamambila, alimwi mubuzuba bwa chiloba kulakaba alimwi kuswaangana kuli bolya. Kwiina mulimo uya kusebezwa ku mazuba azo, chita bulyo kwiikila muntu woonse kuti alye. Wezo ngu mulimo bulyo ngumweelele kuya kusebeza. ¹⁷ Mulyeelele kulibamba noonse leli ipobwe lya chinkwa chiina bumena kaambo mubuzuba bobu ninkakeekusha mishobo yenu kuhwa munshi ya Ijipiti. Ubobo mulyeelele kububamba buzuba bobu mu mazhalane abantu benu mbuli mulawo chakutaleka kwa lyoonse. ¹⁸ Mulyeelele kulya chinkwa chiina bumena kuhwa mangolezha mubuzuba bwekumi umazuba one mu mwezhi mutaanzhi mu mwaka kushikila mangolezha a buzuba bwa makumi obile u buzuba bomwi mumwezhi. ¹⁹ Ku mazuba azo ali chiloba, kwiina bumena bweelele kuyanwa mu maanda enu pe. Kufwumbwa wezo uya kulya chinkwa chikwete bunena ulakaandaanyiwa kuhwa ku Baizilaili, naatewa ati wezo muntu mweenzu naaba muzhale. ²⁰ Tamweelele kulya chinkwa chikwete bumena pe. Kufwumbwa koko nkumukala, mulyeelele kulya chinkwa chiina bumena.''' ²¹ Ngoonaawo Mozesi wakoompolola bakando kando boonse Baizilaili amane wakabaambila ati, ''Kamuya mukasale kana kambelele kumukonzha kukwana kusanina mikwashi yenu yoonse mwamana mukakayaye kabe kepobwe lyakwiitilila. ²² Mwamana mubweze inkama ya hisopu mwiitobe mubulowa buli mumutiba. Musansaile bulowa buli mu mutiba ezeulu ashitendele shenu alimwi amaanda ashitendelele. Kwiina uyeelele kuhwa ansengwe ya ng'anda yakwe kushikila buche chifwumo fwumo. ²³ Ubobo Yaahwe ayita kuyaya Baizilaili. Abubona bulowa ezeulu ashitendele alimwi a shaanda shashitendele, ulooyitilila mulyango wenu takahwumizha shikuzonauna kwaamba azhize mung'anda yenu kwiza kumuyaya. ²⁴ Mulyeelele kuchibambilila chechi. Wezu ulakaba mulawo wenu lyoonse alimwi u balunungu lwenu. ²⁵ Lelyo mwakanjila munshi yezho Yaahwe njaakamupa, mbubona mbwaakamushomezha, mulyeelele chechi kuchibambilila chilengwa chakupayila. ²⁶ Lelyo banenu bakamubuzha ati, 'No chechi chilengwa chakupayila chilaambaanzhi?' ²⁷ mulyeelele kubayingula ati, 'Chechi nchipayizho chaka Yaahwe chakwiitilila, kaambo Yaahwe wakaayitilila maanda abantu Baizilaili Mwiijipiti lelyo naakaakuyaya bantu Baijipiti. Wakashiya wiina kuyaya mu maandeesu.''' Bantu bakamukotamina ukumukomba Yaahwe. ²⁸ Bantu Baizilaili bakachita mbubona Yaahwe mbwaakabalailila Mozesi u Aloni. ²⁹ Chakachitika akati kamashiku Yaahwe naakabayaya boonse bana bataanzhi munshi ya Ijipiti, kutalikila kumwanakwe Falawo mutaanzhi, wakaakushite chakwe chabwami, ubana babantu baange bali muntolongo alimwi ubana bataanzhi bashinyama. ³⁰ Falawo wakabuka mashiku--walo, ubasebezhi bakwe, alimwi ubantu Baijipti boonse. Kakuli kukwiila kukando Mwiijipiti, kaambo kakwiina ing'anda yakaakwiina muntu ufhwile. ³¹ Falawo wakoompolola Mozesi u Aloni mashiku wabaambila ati, "Kamuya, amwaahwe akati kabantu bangu, umwe alimwi ubantu Baizilaili. Kamuya, mukamukombe Yaahwe mbubona mbumwakaamba ati mukamukombe. ³² Amubweze matanga ambelele alimwi ang'ombe shenu shoonse, mbubona mbumwakaamba, kamuya, amana ame munongezhe." ³³ Bantu Baijipiti kababindeene chini chini kubatanda kuhwa munshi yabo, kabaamba ati, tulaba nitukafhwa toonse." ³⁴ Bantu bakabweza bufhwu bwabo bukande bwiina bumena. Mitiba yabo yakukandila keeli myaange kale mushiputu shabo alimwi kashili kale ashifhwunzhi shabo. ³⁵ Inzho bantu Baizilaili bakachita mbubona Mozesi mbwaakabaambila. Bakabakumbila bantu Baijipiti shintu sha siliva, usha goludi, alimwi ushakusama. ³⁶ Yaahwe wakachita Baijipiti kwaamba bazandishe kubotezha Baizilaili. Ubobo Baijipiti bakapa kufhwumbwa checho nchibakakumbila. Munzhila yezhi, Baizilaili bakabasaala bantu Baijipiti. ³⁷ Bantu Baizilaili bakeenda kuhwa ku Lamusesi kushika ku Sukoti. Mweelwe wabalombwana baakweenda anshi kabashika shuulu shili myaanda chisambomwi, antoomwi ubana bashoonto. ³⁸ Kakuli alimwi bantu bamwi banji banji mbubakayaabo, antoomwi umatanga ambelele a ng'ombe, umweelwe mukando washinyama. ³⁹ Bakapanga shinkwa shiina bumena kuhwa kubufhwu bukande mbubakabweza kuhwa Kwiijipiti. Kachiina bumena kaambo bakatandwa kuhwa Mwiijipiti alimwi bayina kuchelwa kubamba chakulya. ⁴⁰ Bantu Baizilaili bakakala Mwiijipiti myaka iili myaanda yone u makumi otatwe. ⁴¹ Niyakashika myaka myaanda yone u makumi otatwe, mubuzuba bobo mbubona, boonse bantu baka Yaahwe mumakamu makamu abo bakamuhwa munshi ya Ijipiti. ⁴² Aza kaali mashiku akukala bulanga, kwaamba Yaahwe abakushe kuhwa munshi ya Ijipiti. Kabuli bushiku bwaka Yaahwe kwaamba bantu Baizilaili baakubuzhibaluka kubantu boonse bamazhalane azhiza kumbele. ⁴³ Yaahwe wakaambila Mozesi u Aloni ati, "Ngaaza malailile epobwe lyakwiitilila: Kwiina muhwamashi uyeelele kulilya ipobwe pe. ⁴⁴ Nikuba bobo, woonse Mwiizilaili uli muzhike, wakaulwa umali, ulalilya mwamana kumupalula. ⁴⁵ Muhwamashi naaba musebezhi mulete bulyo teelele kulya chakulya nichiba buti pe. ⁴⁶ Chakulya chilyeelele kuya kulilwa mung'anda yomwi. Tamweelele kuya kubweza buzani kuhwa mung'anda pe, alimwi tamweelele kuya kukonona chifhwuwa pe. ⁴⁷ Boonse buleya bwa Izilaili bulyeelele kuya kulibamba ipobwe leli. ⁴⁸ Naakuti muhwamashi ngumupona abo ulazanda kulibamba ipobwe lyakwiitilila lya Yaahwe, boonse beembezhi bakwe banina balyeelele kupalulwa. Amana ulazhiza kwiza kulibamba. Ulaba ukoya muntu wezo wakazhalwa munshi yezho. Ubobo, kwiina muntu utali mupalule u kalya kufhwubwa chakulya. ⁴⁹ Mulawo wezu nguwena ulakwatilizha kumuzhale muchishi alimwi u muhwamashi wezo upona akati kenu." ⁵⁰ Ubobo bantu boonse Baizilaili bakachita mbubona Yaahwe mbwaakalailila Mozesi u Aloni. ⁵¹ Mubuzuba bobo mbubona Yaahwe wakabakusha ba Izilaili munshi ya Ijipiti mu makamu makamu abo.