¹ Yaahwe wakamwaambila Mozesi ati, "Koya kwa Falawo, ndoozumya monzo wakwe alimwi u myonzo ya basebezhi bakwe. Ndakachita bolya kwaamba ati mbatondezhe shitondezho shansana shangu akati kabo. ² Alimwi ndakachita bolya kwaamba ati mukabashimwine banenu alimwi u bazhikuzhi benu shintu shesho nshindakachita, mbuli mbundakabachita cha lusunsu bantu ba Ijipiti, alimwi mbuli mbundakabapa shitondezho shishiyene shiyene shansana shangu akati kabo. Muli chechi mulakazhiba ati ndime Yaahwe." ³ Inzho Mozesi u Aloni bakaya kwa Falawo bashike bakaamba ati, "Yaahwe, Leza waba Hebulu, u laamba bolya: 'Anu u lakalibonzha liliye kwangu? Baleke bantu bangu baakuya kwaamba ati bakampayile. ⁴ Pele kuti u tahwumina kubaleka bantu bangu baye, teelela, uzona mabala ndakaleta chikwikwi mu chishi chako. ⁵ Chikwikwi chilakahwumba inshi yoonse kwiina u kaalozha kwiibona inshi. Chilakalya shoonse chakashaala ku chihwula mabwe. Alimwi chilakalya masamu enu woonse ngu mwakashanga ali mu myuunda. ⁶ Chilakazula mu maanda ako, u basebezhi bako, alimwi u bantu ba Ijipiti boonse---chintu checho bauso nibaba bankambo yako nchibatana bwene, tabana chibwene kuhwa nibakaba anshi ano kushika u bwasunu bolya.''' Ngoonaawo Mozesi wakakuhwa kwa Falawo. ⁷ Inzho basebezhi baka Falawo bakaamba ati, "Nchilafwu buti chiindi nchaakatupenzha wezu muntu? Baleke bantu ba Izilaili baakuya bakamukombe Yaahwe Leza wabo. Saa uwe tukonzha kuzhiba kwaamba ati Ijipiti wazonauka?" ⁸ Mozesi u Aloni bakabatola alimwi kwa Falawo, wakabaambila ati, "Kamuya mukamukombe Yaahwe Leza wenu. Pele mbubani beelele kuya?" ⁹ Mozesi wakamwiingula ati, "Tulaya u bashoonto besu antoomwi u bakando boonse, banesu beembezhi u bashimbi. Tulabweza matanga ambelele alimwi ing'ombe, kaambo tulyeelele kuya kuchita ipobwe lyaka Yaahwe." ¹⁰ Pele Falawo wakabaambila ati, "Yaahwe naabe amwe, naakuti ndamuhwumizha kuti muukuya antoomwi u banenu bashoonto kwaamba baakuya. Bona, chilalibonya ati mulikwete makanze mabiyabi mu mizeezo yenu. ¹¹ Pe pe! kamuya, naakuti checho nchimuzanda a kuye bulyo balombwana akati kenu, bakamukombe Yaahwe." Ngoonaawo Mozesi u Aloni bakakushiwa ku bushu bwaka Falawo. ¹² Inzho Yaahwe wakamwaambila Mozesi ati, "Tandabika itashi lyako anshi ya Ijipiti kwaamba chikwikwi chizhize, kwaamba ati chilye inshi yoonse ya Ijipiti chilye kufwumbwa chisamu chilimo, checho choonse chakashaala ku chihwula mabwe." ¹³ Mozesi wakatandabika musako wakwe anshi ya Ijipiti, amane Yaahwe wakaleta iwuwo kuhwa kwiwe inshi yoonse muunza u mashiku. Nibwakacha chifwumo fwumo, iwuwo lyakahwa kwiwe lyakaleta chikwikwi. ¹⁴ Chikwikwi chakaya inshi yoonse ya Ijipiti chakaazulizha masena woonse. Takunabele makamu makamu a chikwikwi aali bolya mu chishi, alimwi kwiina linji chilibolya chikakazhiza pe. ¹⁵ Chikwikwi chakeehwumba inshi yoonse chakuti ya kashiya chaloolona. Chakalya shisamu shoonse inshi yoonse alimwi u michelo ya shisamu yezho yakashaala ku chihwula mabwe. Inshi yoonse ya Ijipiti, kwiina chisamu chisonsele chakashaala pe, nichiba chisamu nikuba chishango chilibuti mu myuunda. ¹⁶ Ngoonaawo Falawo waketa Mozesi u Aloni wabaambila ati, "Ndabishizha Yaahwe Leza wenu alimwi amwe. ¹⁷ Inzho, amundekelele ku chibi changu ku cheno chiindi, amukombe kwa Yaahwe Leza wenu kwaamba ati alukushe lufwu kwangu." ¹⁸ U bobo Mozesi wakakuhwa kwa Falawo waya kukomba kwa Yaahwe. ¹⁹ U bobo Yaahwe wakaleta iwuwo ikando kuhwa kumbo lyalo lya kabweza chikwikwi kuya kuchizumbila mu lwaatele lwa mabu; kwiina nichiba chomwi chikwikwi chakashaala inshi yoonse ya Ijipiti. ²⁰ Pele Yaahwe wakoozumya alimwi monzo waka Falawo, wiina naakabaleka bantu ba Izilaili kwaamba baakuya. ²¹ Ngoonaawo Yaahwe wakamwaambila Mozesi ati, "Tandabika itashi lyako mwizeulu, kwaamba kube mushinze inshi yoonse ya Ijipiti, mushinze u tizha." ²² Mozesi wakatambika itashi lyakwe mwizeulu, kumane kwakaba mushinze u shiya mbi inshi yoonse ya Ijipiti kwa mazuba otatwe. ²³ Kwiina wakaakulozha kubona uumwi; kwiina wakaakulozha kwaahwa ang'anda yakwe kwa mazuba otatwe. Nikuba bobo, balo bantu ba Izilaili ka bakwete mumuni ku busena nkubaakukala. ²⁴ Falawo wakamwita Mozesi wakaamba ati, "Kamuya mukamupayile Yaahwe. Kamuya u banenu boonse, pele matanga a mbelele a ng'ombe mulyeelele kwaashiya." ²⁵ Pele Mozesi wakaamba ati, "Tuhwumizhe tukape shipo alimwi u shipayizho sha kutenta kwaamba ati tukashipe kwa Yaahwe Leza wesu. ²⁶ Ing'ombe shesu tulyeelele kuya asho; kwiina niluba lufwumba lomwi lwasho lweelele kushaala, kaambo tulyeelele kuya asho kuya kupayila Yaahwe Leza wesu. Kaambo tatuchizhi nchituya kumupayizha Yaahwe kushikila tukashike nkutuya." ²⁷ Pele Yaahwe wakoozumya monzo waka Falawo, alimwi wiina kubahwumizha kuya. ²⁸ Falawo wakamwaambila Mozesi ati, "Ahwe awa! pele uzhingashile chintu chomwi, kwaamba ati u takazhoka linji kwiza kumbona, ku buzuba mbuuya kububona bushu bwangu, ulakayayiwa." ²⁹ Mozesi wakaamba ati, "Uwe u mwini waamba kale. nshikabuboni linji bushu bwako pe."