¹ '' Tamulingile ukupanga utulubi , kabili tamulingile ukulimikila akakubasa nangu lupanda lwa libwe lya kubasa , nangu libwe lyakubasa mu kyalo kyenu umo mukafukama panshi , pakuti ninemo Yawe Lesa wenu . ² Mukalukusunga ama sabata angi ne kukinjika umupunda wangi . Nine Yawe . ³ Kana mwaenda mu mishilo yangi ne kusunga amafunde angi ne ku anakiila , ⁴ elo nkamipela imfula mu mpindi yayo ; ne kyalo kikafusha ifyakumena mumishila ne fichi fya mu mabala fikapanga ifisepo . ⁵ Ukupuma kwenu ku katwalilila na ku kufika ku mpindi ya kubungisha ifinsabwansabwa ne mpindi ya kubungisha ifinsabwansabwa ukatwalilila ukufika kumpindi ya ku byalilamo . Mukalukulya umukate ukutwalilila ne kwikala bwino uko mu ka sompa amananda enu mu kyalo. ⁶ Nkapana umutende mu kyalo ; mukalala panshi tapalipo ifikamichinya . Nkafumya ifinama ifikali mu kyalo , ne mupanga taakapite mu kyalo kyenu . ⁷ Mukabutusha abalwani benu , na bo ba kapona pantashi yenu kumupaanga . ⁸ Basanu pali mwebo bakabutusha umwaanda , ne mwaanda umo pali mwebo ukabutusha amasausande ikumi ; abalwani benu bakapona pantanshi yenu no mupaanga . ⁹ Nkamikebeni mwebo ne nkumbu nekumi lengeni ukupanga ifisepo ifingi ne kumifusha mwebo ; Nkabika ukulayana kwangi namwebo . ¹⁰ Mukalya ifyakulya ifyasungilwe impindi itali . Mukalu ku fumya ifyakulya ifyasungwa impindi itali pantu mukaluku fwaya inanda umwakubika ifyakulya fyabukumo . ¹¹ Nkabika ikilonganino kyangi muli mwe bo , kabili nshakamifichilwe . ¹² Nkalukwenda mukati muli mwebo no kuba ni Lesa wenu , na mwebo mu kaba abantu bangi . ¹³ Ninemo Yawe Lesa wenu , uwamifumishe mu kyalo kya Ijipiti , pakwebati mukabule ukuba basha baabo . Nalimokawile ifya kukakilako ifya ku kikonkoli ne kumulengeni mwebo ukwenda kamolokele bwino . ¹⁴ Pano kani tamukomfwa kuli nemo , ne kubula ukunakila onse aya mafunde , ¹⁵ kabili kana mwalengulula amalamuna ne kusula imishilo yangi , pakwebati mukabule uku nakila amafunde angi onse , pano nekutoba ukulayana kwangi - ¹⁶ Kani mukakite fino fyonse , elo nkakita fino kuli mwebo : nkekalika umwenso pali mwebo , amalwele ne mpepo iyakonaula amenso ne kufumya ubumi muli mwebo . Mukabyala imbuto shenu apaafye , pantu abalwani benu bakalya ifika fyalwako . ¹⁷ Nkafumya ikilungi kyangi kuli mwebo , kabili bakamikimfya kuba lwani benu . Abantu abamipachile bakaba no bukulu pali mwebo , kabili mukabutuka , nangu tapali uulemibutusha mwebo . ¹⁸ Kani panuma yafyonse fino tamung'amfwile nemo , nkamupanikeni mwebo imikwi isanu na ibili makosa pabubi bwenu . ¹⁹ Nkamokaula ukulitota kobe mu makosa obe . Nkalenga iulu peulu yenu kwati kyeela kya kapotwe ne kyalo kyenu koti kyeela kya lubemba . ²⁰ Amakosa enu akabomfeshiwa apalukoso , pantu imishili yenu taikafumyapo ifya kupaulako , ne fichi fyenu mu kyalo tafika panga ifisepo . ²¹ Kani tamwendele munshila shangi ne kubula ukumfwa kuli nemo , nkaleta imikwi isanu na ibili ukufula iyakupuupa palimwebo , ukulingana no bubi bwenu . ²² Nkatuma ifinama fya mumpanga pali mwebo ifikamipokololeni abana benu , ukonaula ifitekwa fyenu , no kumukepesheni mumpendwa ati imisebo yenu ikonaulwa . ²³ Kani pakuti pali fi fintu tamusumine ukololwa kwangi ne kutwalilila ukwenda mukundengulula nemo , ²⁴ elo nanemo mkenda mukumilengulula , kabili nemo nemwine nkapanika mwebo imikwi isanu na ibili pakuti pa bubi bwenu . ²⁵ Nkaleta umupanga palimwebo ukukaleta ukushinkanya pakutoba ukulayana . Baka mileteni pamo mukachi ka mishi yenu , kabili nkatuma ubulwele mukachi kenu uko , elo kabili bakamifisheni mumaboko abalwani benu . ²⁶ Ulo nkamifumyeniko kufyakulya fyenu , bainefwe ikumi bakalukaba no mu nkosha uwa kokya imikate mukyakokelapo kimo , kabili bakalukwabanya imikate mukulema . Mukalu kulya pano tamwakekute . ²⁷ Kana tamwakomfwe kuli nemo pali fifintu kabili ne kutwalilila ukwenda mukundengulula , ²⁸ lyena nanemo nkenda mukumilengulula mubukali bwangi , kabili nkamipanika ilili lisanu natubili no kukilapo pakuti pakubifya kwenu . ²⁹ Mukalukulya inama sha baana benu abalalume : mukalukulya inama sha ba benu abanakashi . ³⁰ Nkonaula ifi fulo fyenu fya peulu , ne kuponya ifyakokelapo ifyakufutu mu ne fye lambu , no kuposa ifitumbi fyenu pafitumbi fya tulubi twenu , nanemo ne mwine nkamipata mwebo . ³¹ Nkalula imishi yenu mu fyonaikile ne konaula umwa kulonganina kwenu . Nshakasekelepo namu kufya kununkila fyenu fyelambu . ³² Penka nkonaula ikyalo . Abalwani benu abakekalamo mulya bakakumya pakuti pakonaulwa uku . ³³ Nkamipalang'anyeni mwebo mu fyalo , nekumisomweneni , umupanga ne kumi konkeleni mwebo . Ikyalo kyenu kikonaulwa , ne mishi yenu ikaba ya lukoso . ³⁴ Elo , ikyalo kikaba no kusekela kwama sabata akyo impindi ya kulaala kwa kyo ukwalukoso kabili kamuli mu fyalo fyaba wani benu . Muli iyo mpindi , ikyalo kikatusha ne kusekela pa masabata akiko . ³⁵ Pakuti pa mpindi ikyalo kyalele lukoso , kikaba no kutusha , uko kukaba kutusha uko kyakwetepo ne masabata enu , ulo mwaikelemo . ³⁶ Pakuti palibabo muli mwebo abakashala mu fyalo fyabalwani benu , nkatuma umwenso mumichima yenu pakwebati nangu kululuma kwe buula pakupupa kwa mweela kukamutinyeni mwebo mwalukufyuka pakuchina umupanga . Mukapona panshi nangu tapalipo abalu kumitamfyeni . ³⁷ Mukalukulinyanta mwe bene na bene kwati mwalukubutuka ukuchina umupanga nangu tapalipo uulemibutusha . Tamwakabepo na makosa aakwimakana pantashiya balwani benu . ³⁸ Mukafwila mufyaolo , ne fyalo fyabalwani benu , ne kyalo kyabalwani benu ikiine kikamumineni mwebo . ³⁹ Abo abakashalapo pali mwebo bakafwa abene mububi bwabo , mulya mufyalo fyabalwani benu , kabili pakuti pakubifya kwaba wishibo nabo bakafwa fyenkefyo . ⁴⁰ Penka kani bakasolole ukubifya kwabo ne kwaba wishibo , ne kupondoka pakubula ukuba bakishinka kuli nemo , kabili ne kwenda kwabo ukwakundengululanemo - ⁴¹ ukwandengele nemo ukubalukilamo bena kabili nalibaletele mu kyalo kya balwani babo - kani imichima yabo iya kubula bu mukanda ikaichefye , kabili kani basumina ukupanikwa pa bubi bwabo , ⁴² elo nkanuka ukulayana kwangi na Yakobo , ukulayana na Isaki , ne kulayana kwangi na Abulamu ; kabili nkaanuka ikyalo mumuchima wangi . ⁴³ Ikyalo kikekala kyaabo , elo kikaba sekela na masabata aiko apo kwalele ukwakubula o . Bakakulipila ifyelelwe pabubi bwabo pantu bo abene ba likene amafunde ne kulengulula imishilo yangi . ⁴⁴ Penka pali fifyonse kana baluluka , kani bali mukyalo kyabalwani babo , nshaka bapose , nangu kubakana nangaba achi ukubonaula bonse ne konaula ukulayana kwangi na bo , pakuti nemo ne Yawe ndi Lesa wabo . ⁴⁵ Pakuti pali bo nkanuka ukulayana kwaba shakulu abo nafumishe mu kyalo kya Ijipiti ku menso a fyaalo ,pakwebati mbe Lesa wabo . Nine Yawe . '' ⁴⁶ Ano emafunde , ne malamuna ne Mishilo ayo ba Yawe bapangile pakati pali bo na bantu aba Isilaeli kulupili lwa Sinai ukupichila muli Mose .