¹ Ndita ye ozyu a jobora, kubona bulyo ye mwance, afwana mbwe mwika, nanga nali mwine we chifumu chonshe. ² Kono ena mwinshi lyo muyendisi naba basepiwa mbita zyuba eli niba bika beshi. ³ Mi hape, aha katuli bance, katu shuminitwe ku mirawo ye fasi. ⁴ Kono o kuzyulilira kwe nako shikwa huli, Nyambe na tuma Mwane, ku kuretwa ku muketu, ozyu na reterwa mu murawo. ⁵ Natenda zi kute ahaze bena bena mwinshi yo murawo, o kutiye tu añuliwa neswe mbwe mbana. ⁶ Kakuli muli bana, Nyambe na tuma Oruho rwa Mwane mu myozyo yetu, ozyu akuwa, "Abba, Tata." ⁷ Cware koshili mwika, kono mwana, mi ati mwana,newe rwaho oli mujoboli ka Nyambe. ⁸ Kono mweyina nako, aha kali ka muzyi Nyambe, ni mwa tendwa beka kwabena, bena manta o buntu, kali a bazimu. ⁹ Kono hanu shimwakezyi kuzyiba Nyambe, nali hanu shana mizyibi Nyambe, mbuti shemushaka kuzoka kuboora ku bufokoli bo murawo we fasi waazya entuso? Mushaka ye mube mu bwika hape? ¹⁰ Mu kutika mazyuba ne myezi miya ne nako ye myaka ne myaka! ¹¹ Nditiya ye ke njira i munya o musebezi wangu nenwe neuna ba wabulyo. ¹² Ndimi kumbira, bakwangu, mube mbwe ndime, kakuli neme ndabi shina ndinwe. Kwazya bumango obu mwandi tendi. ¹³ Kono muzyi ye kaili butuku bo mubili nibwareta ye ndiwambe ezywi lya Nyambe kwenu ku matatikizo. ¹⁴ Nokuti ye mazyimo o mubili wangu ami yereka, kali nimwandi zimba kapa kundi kana. Kono nimwa ndi tambura mbwe ndili ngiroyi lya Nyambe, mani shina ndime kandili Jeso Kiresite ye mwini. ¹⁵ Kwi, cware, oku kwina e nfuyauzi zenu hanu? Kakuli ndimita ye, nali kuworeseka, ne muna zwisi mensho enu no ku andiha. ¹⁶ Cware mpaho, shindazoki chira chenu kakuli ndamisumwini e niti? ¹⁷ Ba lyoherezwa okumi koma, kono ni kwaazya e zirotu. Bashaka kumi ntontoza, o kutiye mu lyoherezwa ku zabo. ¹⁸ Mburotu oku lyohereza ke baka erotu, kali ye mbita nendi kere nenwe bulyo. ¹⁹ Banangu banini, hape ndimishuwira kukubaza koku reta mwanche mbita Kiresite shaka na be kwenu. ²⁰ Ndi tabera ye nali ndiba nenwe hanu no ku zora omu ambiro wangu, kakuli ndi lyanganiswa kuamana nenwe. ²¹ Mundi sumwine, enwe mu shilira kuba munkotera yo murawo, kamu teezi ku murawo? ²² Kakuli kuñoretwa ye Abburahama kena bana bechikwame bo bire, zyumunya ku mwika we chikazana mi zyumunya ku mukentu arukuruhite. ²³ Kono ozyu naretwa ku mukazana wo mwika kokuya cho mubili, kono zyumunya naretwa ku mukentu a rukuruhite ke nsepiso. ²⁴ Ezi zintu mbozi torokiwe mbwe zi zyimanina zintu, kakuli aba bakentu bazyimanina e ntumererano zo bire. Zyumunya azwa ku rundu lya Sinai mi nareta bana ba beka. Ozyu ndi Hagare. ²⁵ Cware Hagare azyimanina e rundu lya Sinai lina mwa Arabiya; mi a zyimanina Jerusarema yahanu, kakuli ena mu bwika na bane. ²⁶ Kono Jerusarema ina kuwiru i rukuruhite, mi ndinyinetu. ²⁷ Kakuli kuñoretwa, "Muboterwa, enwe mu bawumba. Mulyolyonteze noku shumpura ke mboterwa, enwe kamushuwi kukubaza ko kuzara mwana. Kakuli a bana bomukentu narekiwa mbangi kuhita bo mukentu akwesi mukwame wakwe." ²⁸ Kono nwe, bakwangu, mbwe Isaka, muli bana be nsepiso. ²⁹ Mweiyo nako ozyo naretwa ko mubili na shandisa ozyu naretwa ko Ruho. Mbobulyaho kufwana nahanu. ³⁰ Cware zinji ata mañoro? "Tande o mwika wo mukazana ne mwane. Kakuli o mwana wo mwika mukazana kali shaka nali tahire e chifumu choku jobora no mwana wo mukentu wozyu a rukuruhite." ³¹ Kabulyaho, bakwangu, katuli bana bo mukazana wo mwika, kono wo mukentu a rukuruhite.