¹ Vizeniwuko mɔko, mɔ shãng viɓe waaye ɓatata ni manteni ɓee wuko nungoko. ² Mɔ mante shɔngɓɔrɔyi yi wɔ̃ng shɔngyiniyu, shɔngɓeyi aa yii yuɓɔrɔ, shɔng kpɛ̃ɛni, ɓɔɔ shɔngɓe yii gnshĩngni ani vɛ̃ɛni, a vusu kaseni, ɓɔɔ a vusu maanign. ³ A dɔ̃rɔng gorongko, mɔ mante sooyeɓoroyi yii wɔ̃ng shɔngzaanilaa a yii dɔɔkĩnni, ɓa shɔng lesenishɔng rĩng ɓa kɔ yii wɔng jepũngsaa, vizeniwuko yii wɔ̃ng shɔngvimanteniyi tɔ̃ɔving, ⁴ yii sɔɔ mante yii jaasooye yii kaseni yii jereyi yii sɔɔ kaseyi jaayi, ⁵ yii wɔng shɔng kpɛ̃ɛni, yii kpelengkpe, shɔngyiseni yee tɔ̃ɔving, yii sɔɔ wɔ̃ng shɔng dũngni yi jere yãa, aruɓe shɔng daa shãng ruunangka ɓa a yuu Laa ruu ɓa. ⁶ A dɔ̃rɔng gorongko, mɔ aa jesangyi kaakagn wɔ̃ngni shɔng tɔ̃ɔving. ⁷ A dɔ̃rɔng walikãng mɔ tase mɔ yuu shɔng vipeleni tɔ̃ɔving, a mɔ manteni, mɔ shãng ruunungoko, mɔ tase yiniyu, ⁸ ɓɔɔ ruu ɓee nungoko ɓe shɔng daa zenung ɓɛ̃ɛni ɓa, aruɓe shɔngɓe na ɓɛ̃ɛ mɔ yãashãngniye ng tãa yusɛ̃ aruviya yii ruunangka ɓɔɔ ɓaniɓa ɓe yii daa shãng a wo yuu ɓa. ⁹ Fooyi rɔɔreyu a yii shɔngyee bii a vusu viyi walkãng, yii pele viɓe yii kase ɓe yii naa kɔngseyãa ɓa ni yini, ¹⁰ yii na ɓɔɔyi vii ɓa, viɓe yii da pele wukɔ yii tase gnshĩngni tɔ̃ɔving, aruɓe kɔ amɔngɓeweya walikãng yii daa ɛse vidɔɔni a manteni vii aru Laa wo shɔng Kpengseni. ¹¹ Aruviya Laa pãnti keye aru kpengseni shɔngzengyi walikãng. ¹² Mante wo ni wo bɛ̃ɛ ruvĩni ɓɔɔ kaseni vii koodangayi, wo sɔɔ wɔ̃ng shɔng yiseniuu, shɔng ɓatata, ɓɔɔ wɔ̃ngni zaani Laa a koodanga ɓemi, ¹³ alaɓe wong shĩngnung atĩng wo tee wo zuuku tenignign, keni bongni ɓee wo bɔrɔ Laa ɓɔɔ wo shɔng kpengseni Yeso Kirisi. ¹⁴ Yeso aa wuy uu aru woni aruɓe daa raawo a yuu bɛ̃ɛni rudangni wu sɔɔ riise wo kpelengkpe aru wu yuu gbangbang shɔngzeng ɓe yii kase yii pele shoni tɔ̃ɔving ɓanijangɓaseniɓa. ¹⁵ Mɔ shãngyãa a yuu viɓemiyii walikãng, mɔ sɔɔ aa yii kaakagn peleni, mɔ sɔɔ ɓooreyi yoori ni kaakanaa ani. Mɔ na yaa ɓa shɔngɓɔɔ wu zee mɔke ana shɔng nangka ɓa.