¹ Bulusi, jaashoni ɓee Laa ɓɔɔ jaarɔɔni ɓee Yeso Kirisi aru gnshĩngni a Laa shɔng rɔɔniyi ɓɔɔ zeni ɓee nungɔkɔ ɓe ɓaase ni zaani Laa. ² Ni tenign a surubi ɓee sɔ̃ɔyãɓa ɓee Laa, ɓe jĩngyãɓa, vaase tɛ̃tɛ̃ alaɓe de loo kodanga ɓa. ³ A la tɔ̃ɔving kese wu ruu akaati ni waaniyãa ɓee shɔ̃ng ang aru Laa rudangni ɓee wo Kpengseni. ⁴ Shɔng waare Titusi, jaa nungɔkɔ a wo gnshĩng goro. Pãnti ɓɔɔ wɔ̃ngni ɓatata ɓe ke a Laa ɓɔɔ wo Kirisi Yeso wo shɔ̃ng kpengseni Daa. ⁵ Aruviɓemiko N yaa mɔ a Karita, aruɓe mɔ daa shing viɓe likɔtɔ ɓe ɓatata mɔ sɔɔ shĩngshe yuɓɔrɔyi naa a ɓundang walikãng anaɓe N gãalemɔ mɔ pele ɓe. ⁶ Shɔngɓɔrɔ wu wɔ̃ng shɔngɓe wu ruvini ɓa, Shɔngɓe wu sooye goro, wu jaayi yii wɔ̃ng shɔng gnshingniyi ɓa ɓe shɔng leseni shɔng ɓa kↄ shɔngɓe yii dũngyãa ɓa. ⁷ Liikↄtↄ shɔngɓɔrɔ jaakalaa, ɓe gaa Laa jaayi, wu wɔ̃ng ɓani ruvini ɓa. Wu na wɔ̃ng ɓa shɔng tɔseniyu ɓa, ɓa shɔng leseni yatɔ kↄvɛ̃ ɓa, ɓa shɔngɓe ɓɔɔsaa ɓa, kɔ shɔngɓeniɓang ɓa, kɔ shɔng gnkaani. ⁸ Viɓe da pele wukɔ, wu wɔ̃ng shɔng teni shɔngzangti, shɔng kaseni vitɔ̃ɔving, shɔngɓe bɛɛ yãa ɓa, shɔng tɔ̃ɔving, shɔng wɔ̃ngni ɓɔlɔngɓɔ, ɓɔɔ shɔngyiseniyu. ⁹ Wu yise ruu Laa ɓatata anaɓe shɔng mante wu ɓe, aruɓe daa zenungke wu aa shɔng gãasiyi kaakagn ni manteni nungoko wu sɔɔ gɔnte wu shɔngpongyi. ¹⁰ Aruviya shɔng ɓangeyi ani vɛ̃ɛni. Shɔngɓeyi ruu ɓa yãaniɓa ɓɔɔ shɔng jĩngniyãa, yãagbangbang shɔng shadingliyi. ¹¹ Liikↄtↄ nɔ zãare yii. Yii wũnte shɔngyeeyi walikãng ang sɔɔ mante shɔng viɓe de liiɓa yii mante shɔng ɓa aru kpaani vii yusɛ̃. ¹² Yii gɔrɔ shɔngzeni shãngni, "Shɔng Karitayi yii ɓi shɔng jĩngni yãa, yĩngva vijĩngtiyi, shɔng shaani viyi kɔvɛ̃." ¹³ Ru shãngniɓemi wɔ̃ngye nungoko. Arugoko, nɔ gɔ̃ɔyi yushɔɔ tɔ̃ɔving, aruɓe yii daa wɔng shɔng peleni vii nungoko a vusu gnshĩngni. ¹⁴ Yii naa weshoo ɓa a shɔng Yahudayii ɓɛri ɓa kↄ rudangni ɓee shɔngɓeyi daa peleni vii nungoko. ¹⁵ Aru shɔngɓe yii kpelengkpe, viyi walikang kpelengkpe a yii bii. Vizeniwuko aru shɔngɓe yii leseye ɓɔɔ shɔngɓe yii anizɔng ɓa, viɓɔɔ ɓa kpelengkpe ɓa, vizeniwuko yii lereni sĩngsĩng ɓɔɔ ruusĩngsĩng leseye zĩngzini. ¹⁶ Yii shãngni yii zee Laa ye, vizeniwuko yii ɓɛ̃ɛ wu ye ni yii vipeleni. Yii ɓi vi nugnzani, shɔngɓe yii dũngyãa ɓa, yii shɔngnangka amɔng vitɔ̃ɔving vipeleni.