¹ Arugoko hãmi shɔng lese shɔngɓe yii a Kirisi Yeso ɓa, ² Aruviya rudangni ɓee Suru ɓee kpengseni a Kirisi Yeso yanɔ naa ye a rudangni ɓee ruvĩni ɓɔɔ vɔɔni. ³ Viɓe ruudani de zenung ɓa aru wu kaaka ɓa ani ɓa, aru wu a bii, Laa pele ye. Shong wu Jaa ni wu kaseni ɓe ruvĩni bii a wu wɔ̃ng vijeni ɓee ruvĩni, wu nung ruvĩni vɔɔ a bii. ⁴ Pele viɓemi ke aruɓe viɓe ruudani shãng ke daa tise awo bii ɓe, wo bibi wo kn ɓa aru bii ɓa, wo kn a dɔɔ Suru. ⁵ Shɔng ɓe yii wɔ̃ng a ruu yii ruu bii yii dũng viɓe yii yato kase ɓe, shɔng ɓe ying wɔ̃ng anaa ɓe Suru kase ke ɓe yii tegn a vi Suru. ⁶ Aru shĩngni yato a gigiribi ɓi vɔɔ, shĩngni yato a Suru Laa ɓi kpengseni ɓɔɔ wɔ̃ngni ɓatata. ⁷ Shĩngni yato a gigiribi ese yãgã ni Laa, aru teere Laa shoo ɓa awu ruudani ɓa, kɔ wu pele vi tɔ̃ving ɓa, ⁸ Shɔngɓe yii a gigiribi yii roore Laa sĩngsĩng ɓa. ⁹ Aruviya nɔ ɓa a gigiribi ɓa, nɔ a Suru, na ananko Laa Suru wɔ̃ng ni nɔni. Aruviya shɔngɓe wu Suru Kirisi na ɓa ani ɓa, wuɓa wu ɓee ɓa. ¹⁰ Kirisi na a nɔni, gigiribi vɔɔye aru ruvĩni, aru suru ani ɓe vɔɔ ɓe aru ruu tɔ̃ving. ¹¹ Suru shɔng ɓe yuuse Yeso paa a yuusa na ni nɔni, shɔngɓe yuuse Kirisi mi a yuusa ng anɔ surubi anɔ bii vɔɔni aru wu Suru, ɓe anɔ bii mi. ¹² Arugoko mazungyi, wo shɔng shaani kɔpɔ, ɓa ɓe bii ɓa, ɓe wo daa wɔ̃ng anaa bii kase ɓe. ¹³ Aru nɔ na dũng viɓe kase ɓe ye, nɔ kpaye nɔ vɔyi, nɔ na wɔ̃ng ye ni Suru nɔ nung bii vɔɔ ye, nɔng vɔɔ ɓa. ¹⁴ Aru shɔng vɛ̃ɛni ɓe yii na wɔ̃ng ye ni Suru ɓee Laa, ɓi yiko Laa jaayi, ¹⁵ Nɔ de te Suru kpãareni ɓa a nɔ wɔ̃ng ni zaani vɔɔ tɔɓa; Nɔ temi Suru ɓee ani, ɓe wo kaa ni, "Abba, Daaǃ" ¹⁶ Suru ni wu yuu a yãa ni wo suru ni wo ɓi Laa jaayi, ¹⁷ Wo na ɓi jaayi, woko wo wɔ̃ng jaa roonikoo, jaa roonikoo ɓee Laa. Wo ɓase roonikoo ni Kirisi ni, wo na kpãare ni wuni jɔ ananko wong bɔngseni ni wuni. ¹⁸ Aru N mile kpãareni ɓe hãmi shɔng daa tiseyi ɓa ni bɔngseni ɓe daa tase a woni ɓa. ¹⁹ Aru viɓe wo kase wo zeke aɓe shɔng take koo ɓe wɔ̃ng gaani taseni ɓee Laa jaayi. ²⁰ Aru takeni ɓe ese, ɓa wu viɓe kase ɓa, aru shɔngɓe ese shĩngnign ɓe, ²¹ Ni takeni wu yuu ke kɔtɔ a kpãare ni a pũng kɔtɔ, a ese yaseni a bɔngseni ɓee Laa jaayii. ²² Aruviya wo zeye viɓe shɔng take ɓe walikãng yii ɓoo kpãareni, ni kɔni a yãawe a e anaa hãmi. ²³ Ɓa wuko shee ɓa, kɔ wo yuu, ɓe wo jaa renila ɓee tĩng a Suru, jɔ̃ɔ lem lem anaa ɓe wong gaa ni zakeni bii, a dɔ̃rɔng ɓe wo daa kpaa kpenseni wo yuu ke ɓe. ²⁴ Aru gnshĩni wo kpaa kpenseni. Gnshĩni ɓe wong ze ni nung hãmi ɓa gnshĩngni ɓa. Aruviya shɔng daa shĩngn a viɓe shɔng ze ya? ²⁵ Aru wona shĩngn ye a viɓe wo de ze ɓa, wo gaye ni lemɓa. ²⁶ Jɔ ananko, Suru ng yise wo naa a mɔngɓe wo na de zenung ɓa. Aru wo de zenung gɔ̃ɔreni ɓa, Suru ni wu yuu gɔ̃ɔre aru woni. ²⁷ Shɔngɓe bee shɔng ruu yato ze wo ruu sĩngsĩng ɓee Suru ye, aru wuko ng yise wo naa a yuu Laa shɔng ɓolongɓoyi anaa ɓe Laa kase ɓe. ²⁸ Wo ze ye shɔngɓe yii kase Laa, yii walikãng kn tĩng anaaɓe kaseɓe, aru shɔngɓe shɔng ɓayi yãa aru wu kaseni. ²⁹ Aru shɔng ɓe yii ze wu ye yii daa zavɔɔ ɓa aru wu jaa, ɓe wukɔ wung wɔ̃ng jaa tĩng a titi mazungyi. ³⁰ Shɔngɓe sii shĩngshe yii, wuko ɓayi yãa. Shɔngɓe ɓayi yãa, shɔng ayi kpengseni, shɔngɓe na kpeng ye, wuko bɔngseye jɔ. ³¹ Wo daa shãng ki vi aru viɓemi viya? Laa na ni woni ɓi we daa wɔng shɔngpong ni woni weya? ³² De zãare wu Jaa ɓa awu ke aru woni walikãng, na pele nukovi ɓe yaa ni wuni daa awo viyi ɓa kɔvɛ̃ ɓa viya? ³³ We daa ese yãa yengti a Laa shɔng ɓe rɔɔ weya? Laa ko goro pele vi tɔ̃ving. ³⁴ Ɓi wee goro shɔng leseni weya? Kirisi Yeso wuko vɔɔyi-ɓe jãa gãasi, asɔɔ yuupa a Laa kaa naashang, ɓe shii aru woni. ³⁵ Ɓi we daa vase wo ni kaseni Kirisi weya? Yɔɔreni yuu ya, kɔ kpãareni, kɔ yãgã, kɔ wɔ̃ko, vituseni, kɔ a yãato vɔɔ, kɔ yeewa ya? ³⁶ Anaaɓe shɔng binke ɓe, "Aru nɔko shɔng nungwu vɔɔ, shɔng mile wo anaa mɛrɛ yeeni." ³⁷ A viɓemi walikãng wo jãa shɔng shaani sii kɔtɔ aru shɔngɓe kase wo ɓe. ³⁸ N azɔng ye ni kɔ vɔɔ, kɔ surubi, kɔ Laa jaashoniyi, kɔ gomnatiyi, kɔ viɓe yii hãmi, kɔ viɓe yidaa e a tĩng, kɔ vi kaakayi, ³⁹ kɔ bɔngni vɛ̃ɛni, kɔ bini, kɔ gãasi viɓe shɔng take ɓe, yidaa zenung vaseni wo ni ɓa ni Laa kaseni ni ɓa, ɓe a vusu Kirisi Yeso wo Daayere.