¹ Kɔ nɔ de ze ɓa, mazũngyi (N shãng yãa aru shɔngɓe yii ze ruudani ye ɓe), ni ruudani roo kpanti a shɔngzeng yuu wu waa diki ɓe wu dong ni nungpaa ɓa ya? ² Aru ruudani ani a sooye yuu wu jere na dong nungpaa, wu jere na vɔɔ ye, ruudani tɔɓa a wu yuu ɓa. ³ Arugoko, alaɓe wu jere dong nungpaa, na yawu jere ye waa te jere ɓɔɔ ye, shɔng ɓaa wu ni soo kɔng. Wu jere na vɔɔ ye, ruudani tɔɓa a wu yuu ɓa, arugoko shɔng ɓaa wu tɔɓa ni soo kɔng ɓa na wɔ̃ng ye ni veeye ɓɔɔ ni. ⁴ Arugoko, mazũngyi, shɔng rise nɔ ye vɔɔ a titi ruudani aru Kirisi bii. Viɓemi aruɓe shɔng daa ɓase nɔ ni shɔngɓɔɔ ɓe, wuko, shɔng ɓe shɔng yuse wu paa a yuusa, aruɓe wo daa kese vi renila aru Laa. ⁵ Aru alaɓe wo dong a gigiribi, kaseni ruvĩni, ɓe ruudani yuuse wu paa, yii a mɔng nungni bang a wo vusu bii aru yii ese renila aru vɔɔni. ⁶ Hãmi shɔng yaa wo naaye a yuu ruudani. Wo vɔɔ ye aru viɓe sii maa wo ɓe. Viɓemi wɔ̃ng aruɓe wo daa gbãare a vusu polo bii ɓee Suru, ɓa aru wo gbenti binkeni ɓa. ⁷ Wong shãng tɔti ni viya?ː Ruudani ni wu yuu ɓi ruvĩni ya? Na wɔ̃ng ɓa ananko ɓa. Na ananko, N na de ze ruvĩni ɓa, na ɓa aru ruudani ɓa. Aru viya nang de ze ɓa beeni shɔng vi ni kaaka bii de lii ɓa ɓa ruudani na de shãng ɓa ananko ɓa, "Mɔ na kase shɔng ɓɔɔ viɓa ni kaaka bii ɓa." ⁸ Aruviya ruvĩni sɔɔ kpaa dɔ̃rɔng ɓemi a kese zɔng kaseni shɔng vi a N bii ni kaaka. Aruviya ruudani na ɓa, ruvĩni vɔɔ ye jɔ. ⁹ Alaɓɔɔ N ni surubi ɓa ni ruudani ɓɔɔ ɓa, alaɓe ruudani e ye ɓe ko, ruvĩni sɔɔ kpaa surubi ¹⁰ N sɔɔ vɔɔ ke. Ruudani ɓe sii daa eseng surubi sɔɔ wɔ̃ng vɔɔ aru mini. ¹¹ Aru ruvĩni sɔɔ kpaa dɔ̃rɔng ɓemi a aru ruudani a lakeng ke. Ni ruudani nung vɔɔ. ¹² Na ananko ruudani ɓi kpelengkpe, waani yãa jɔ kpelengkpe, ɓolongɓo, ɓɔɔ tɔ̃ving. ¹³ Na ananko viɓe tɔ̃ving sɔɔ eseng vɔɔni ya? Na wɔ̃ng ɓa ananko ɓa. Ɓi ruvĩni, aruɓe shɔng daa tase ke wuko ruvĩni, ese vɔɔni ang bii ni viɓe sii lii kɔtɔ ɓe, ɓɔɔ tɔti aru waani yãa ruvĩni daa rii ruvĩni ɓe jãa gãani kɔtɔ. ¹⁴ Aru wo zeye ni ruudani ɓi vi suru, N bibi N ɓi shɔng gigiribi. Shɔng maleng ye anaa foo ɓee ruvĩni. ¹⁵ Aru viɓe N pele ɓe, N de ze wu ɓa gbang ɓa. Aruviya viɓe N kase peleni, N pele ɓa wuko ɓa, viɓe N bɛ̃ɛ ɓe, N pele wuko. ¹⁶ Nang pele viɓe N de kase ɓa, N kase ruudani ye ni ruudani lii kɔtɔ. ¹⁷ Hãmi wɔ̃ng ye ni ɓa miko N pele ɓa, ɓi ruvĩni ɓe wɔ̃ng ang bii ɓe. ¹⁸ Aru N ze ye ang bii, wuko ang gigiribi, vi tɔ̃ving ɓɔɔ ɓa. Aru kase ni peleni vi tɔ̃ving ni mini, N daa zenung peleni ɓa. ¹⁹ Aruviya vi tɔ̃ving ɓe N kase ke N pele, N pele ɓa, ɓi vi nanka ɓe N de kase ɓa ɓe, wuko N pele ke. ²⁰ Hãmi N na pele viɓe N de kase peleni ɓa ye, tase ye ni ɓa miko N pele ɓa, ɓi ruvĩni ɓe ang bii ɓe. ²¹ Arugoko, N kpaa ruudani ɓemiː Alaɓe N kase peleni vi tɔ̃ving, ruu nanka maani ni mini. ²² Aruviya N pele puru yato ye ni ruudani ɓee Laa ɓe ang vusu bii. ²³ Vileseni wuko N sɔɔ ze ruudani ɓɔɔ ye tok ang vusu bii. Nung bang ni polo ruudani ɓe ang lereni. Tong ye ni kaaka ni ruudani ɓee ruvĩni ɓe ang vusu bii. ²⁴ N ɓi vi nugn kɔngniǃ Ɓiwe daa kpengseng a gigiribi ɓe vɔɔ kɔtɔ mi weya? ²⁵ Dɔɔreni ɓi Laa ɓee aru Yeso Kirisi wo Daayereǃ Arugoko, N bibi N gbãare ruudani ɓee Laa ang vusu lereni. Ni kaɓɔ, N gigiribi N gbãare ruudani ruvĩni.