¹ Wong daa shãng tɔti ni viya? Wo watĩng tani pele ni ruvĩni aru ɓe pãnti daa shang ya? ² Daa wɔng ɓa ananko ɓa. Wo ɓe wo vɔɔ a ruvĩni, wo daa sɔɔ kpeng nuko vii ani viya? ³ Nɔ de ze ɓa ni anaa ɓe shɔng vɛ̃ɛni ɓe yii pele batizima a vusu Kirisi Yeso yii pele batizima a wu vusu vɔɔni ɓa ya? ⁴ Shɔng gbãwo ye, tɔni, wuni aru wu batizima a vusu vɔɔni. Ɓemi waatĩng ke aru ɓe anaa ɓe Kirisi yuupa a vɔɔni ni bɔngseni ɓee Daa, jɔ ananko aru ɓe wo daa kn a vusu polo surubi. ⁵ Wo na wɔ̃ng ye mɔng goro ni wu ni a wu vusu vɔɔni, wong sɔɔ wɔ̃ng mɔng goro ni wu yuni pa a yuusa. ⁶ Wo ze vĩɓemi ye, ni shɔng ɓaa wo shɔngbɔrɔ naa a la ni wuni aru ɓe bii ɓee ruvĩni daa lese ɓe. Ɓemi waatĩng aru ɓe wo daa wɔ̃ng foo tɔɓa aru ruvĩni ɓa. ⁷ Shɔngɓe vɔɔ ye shɔng rise wu ye shɔng tɔ̃ving aru wu ruvĩni. ⁸ Wo na vɔɔ ye ni Kirisi, wo azɔng ye wong sɔɔ wɔ̃ng a yãawe ni wu ni. ⁹ Wo ze ye a laɓe Kirisi yuupa a yuusa, ng vɔɔ tɔɓa; vɔɔ wu kaaka tɔɓa a wu yuu ɓa. ¹⁰ Aru vɔɔni ɓe vɔɔ aru ruvĩini ɓe, vɔɔ ya goro aru shɔng walikãng. Aruviya, wu wɔ̃ngni ɓe wɔ̃ng ɓe, wɔ̃ng aru Laa. ¹¹ A dɔ̃rɔng goro mi ko, nɔ bibi nɔ mile nɔ yuu anaa shɔng ɓe yii vɔɔ aru ruvĩni, wo tɔti ni surubi a Laa bii a vusu Kirisi Yeso. ¹² Arugoko nɔ na yaa ruvĩni ɓa wu roo kpanti a nɔ vusu bii vɔɔni ɓa aru ɓe yãa daa siinɔ ɓa aru vi nanka ɓa. ¹³ Nɔ na anɔ bii ɓa a peleni ruvĩni ɓa, wu rii vipeleni aru ruvĩni ɓa. Nɔ anɔ bii a Laa anaa shɔng ɓe shɔng keseyi a vɔɔ yii kpaa surubi, yii sɔɔ ayi bii mɔng goro anaa Laa vipeleni ɓe daa pele vi tɔ̃ving ni ɓe. ¹⁴ Nɔ na yaa ruvĩni ɓa wu roo kpanti anɔ yuu ɓa. Aruviya nɔ tɔɓa a vusu ruudani ɓa, nɔ a vusu pãnti. ¹⁵ Ɓi tɔti viya? Wo pele ruvĩni aru wo tɔɓa a vusu ruudani ɓa ya, aru wo a vusu pãnti ya? Daa wɔ̃ng ɓa ananko ɓa. ¹⁶ Nɔ de zeɓa ni nɔng anɔ yuu wu wɔ̃ng anaa foo, nɔ ɓi foo a shɔngɓe nɔ tãawu yãa ɓa ya? Kɔ nɔ ɓi foo ɓee ruvĩni, ɓe ese vɔɔni, kɔ foo ɓee yãa tãani, ɓe ese wɔ̃ni tɔ̃ving. ¹⁷ Aruviya dɔɔreni ɓi Laa ɓeeǃ Aru nɔ sii foo ruvĩni, nɔ sɔɔ dũng ye ni nɔ sĩngsĩng dɔ̃rɔng manteni ɓe shɔng anɔ ɓe. ¹⁸ Shɔng kesenɔ ye a peleni ruvĩni, shɔng sɔɔ rise nɔ ye foo ɓee peleni tɔ̃ving. ¹⁹ N shãng yãa anaa shɔngzeng aru nɔ bii ɓe kaaka ɓa ani ɓa. Aru anaaɓe nɔ a yuu ni bii goro anaa jaadɔɔyi ɓe rĩngte viseyi ɓɔɔ peleni ruudani, ɓe ese leseni ruudani vɛ̃ɛni, a dɔ̃rɔng goro mi ko, hãmi nɔ a nɔ yuu wu wɔ̃ng goro ni biyi anaa shɔng peleni ruu tɔ̃ving aru sɔkeni. ²⁰ Aru alaɓe nɔ foo ɓee ruvĩni, nɔ pele ruu tɔ̃ving ɓa. ²¹ A la wa ko, ɓi reni ɓewe nɔ kpaa ke ɓe hãmi nɔng tãa wu yusɛ̃ɛ mi weya? Aru kpaani ɓee viɓemi yii wuko vɔɔni. ²² Hãmi ɓe shɔng kese nɔ ye a vusu ruvĩni nɔ tɔɓa hãmi foo ɓa nɔ ɓi Laa jaashoniyi, nɔ reni ani ɓee sɔkeni. Wu tase bii wuko surubi dongdong. ²³ Aruviya dɔɔyɔni ruvĩni wuko vɔɔni, Laa ani vi wuko surubi ɓee dongdong a vusu Kirisi Yeso wo Daayere.