¹ Alaɓe shɔng rawo yuu aru wo gnshĩngni, wo kpaa wɔ̃ngni lemɓa ye ni Laa a wo Daayere Yeso Kirisi. ² Aru wuko wo kpaa dɔ̃rɔng ɓoni ni gnshĩngni a pãnti ɓemi ɓe wo shii ani, wo sɔɔ gɔɔreni tenign ɓee bɔngseni Laa. ³ Ɓa ɓemi ko shee ɓa, aru goko wo sɔɔ gɔɔre a wo kpãareniyi. Wo zeye kpãareni ese maanign. ⁴ Maanign ese ruubi tɔ̃ving, ruubi tɔ̃ving sɔɔ ese tenign, ⁵ tenign sɔɔ ese yuu sɛ̃ɛ ɓa aru kaseni Laa ɓe shĩng awo sĩngsĩng a Suru Laa, ɓe shɔng a wo ɓe. ⁶ Alaɓe wo sii a bii jileni, alaɓini Kirisi vɔɔ aru shɔng ɓe yide ze Laa ɓa. ⁷ Aru kpãa kɔtɔ shɔngɓɔɔ wu vɔɔ aru shɔngɓe yato ɓolongɓo, shɔngɓɔɔ na zenung vɔɔni kɔtɔ aru shɔng tɔ̃ving. ⁸ Vizeni wuko Laa tase wu kaseni aru woni, aruviya wo sii shɔng ruvĩni, Kirisi vɔɔ aru woni. ⁹ A jãa, sii, hãmi ɓe shɔng rawo yuu ye ni wu kpaa, sɔɔ kpengse wo a Laa yato leseni. ¹⁰ Aru na ɓa, wo sii dong shɔngpong, shɔng sɔɔ tɔ̃ɔrewo a Laa kaa bii awu Jaa vɔɔ, aru wu Jaa vɔɔni, alaɓe shɔng tɔ̃ɔrewo ye, wong kpaa kpengseni ni wu surubi. ¹¹ Ɓa ɓemi ko shee ɓa, wong sɔɔ pele puru yato ni Laa aru wo Daayere Yeso Kirisi, aru wuko hãmi wo kpaa tɔ̃ɔreni. ¹² Anaa ɓemi, aru shɔngzeng goro ruvĩni ɓo koodanga, ananko vɔɔ ɓo koodanga a ruvĩni. Vɔɔ sɔɔ leng shɔngzengyi walikãng, aru viya shɔngzeng walikãng yii pele ruvĩni ye. ¹³ Alaɓe ruudani ɓa, ruvĩni sii a koodanga, shɔng sii maa ruvĩni ɓa alaɓe ruudani ɓa ani ɓa. ¹⁴ Deleseɓa, vɔɔ roo a Adamu awaa Musa, a sɔɔ waa shɔng ɓe yii de pele ruvĩni ɓa anaa Adamu bɛ̃ɛni yãa, ɓe tase shɔng ɓe daa e ɓe. ¹⁵ Aruɓe wu ani ɓa anaa ruvĩni ɓa. Na aru shɔngzeng goro ruvĩni shɔng vɛ̃ɛni vɔɔye, daa wɔ̃ng nukovi pãnti ɓee Laa ɓɔɔ ani ni pãnti ɓee shɔngzeng goro, Yeso Kirisi, shang ye aru shɔng vɛ̃ɛniǃ ¹⁶ Aru ani ɓa anaa shɔng goro ɓewa ruvĩniɓa. Ɓooreni yoori dũng shɔng goro ruvĩni a sɔɔ ese leseni, aruɓe ani dũng ruvĩni vɛ̃ɛni a sɔɔ ese raniyu. ¹⁷ Na aru, shɔngzeng goro ruvĩni, vɔɔ roo koo aru shɔngzeng goro, daa wɔ̃ng nukovi ni shɔngɓe yii tee bɔrɔngbɔ pãnti ɓɔɔ ani ɓee yato ɓolongɓo roo koo a surubi a shɔngzeng goro mi, Yeso Kirisi. ¹⁸ Anaaɓe shongzeng goro ruvĩni ese leseni shɔngzeng walikãng, jɔ ananko aru shɔngzeng goro wu peleni ɓee yato ɓolongɓo ese raniyuu a sɔɔ a shɔngzeng walikãng surubi. ¹⁹ Anaa ɓe aru shɔngzeng goro wu yãa bɛ̃ɛni shɔngzeng vɛ̃ɛni yii wɔ̃ng shɔng ruvĩni, jɔ ananko aru tãani yãa ɓe shɔngzeng goro shɔngzeng vɛ̃ɛni ying kpaa yato ɓolongɓo. ²⁰ Vileseni wuko ruudani eke aru ɓe ruvĩni daa shang ɓe. Mɔng ɓe ruvĩni na shang ye, pãnti shang jɔ vɛ̃ɛni. ²¹ Viɓemi waatĩng ye, anaaɓe ruvĩni roo koo a vɔɔni, jɔ ananko pãnti daa roo koo aru wɔ̃ngni ɓee surubi ɓee dongdong a Yeso Kirisi wo Daayere.