¹ Hãmi ɓivi liini ɓewe shɔng Yahuda yii kpaa weya? Ɓɔɔ ɓivi kpaani ɓewe shɔng daa kpaa a yuu shaa yeeni weya? ² Ɓi bɔrɔngbɔ vi kɔ ni kawe ya. A shɔɔni walikãng, shɔng a shɔng Yahuda yiko zeni ruu Laa a naa. ³ Shɔng Yahuda gãasi yii anizɔng na ɓa ani ɓa ya? Yii kara anizɔng daa lese Laa wu shãngni nungoko ɓa ya? ⁴ Daa wɔ̃ng ɓa ananko ɓa ya. Viɓe daa wɔ̃ng wuko, Laa ko shee wu wɔ̃ng shɔng nungoko, aɓe shɔngzeng walikãng yiɓi shɔng yãa jĩni. Anaaɓe shɔng binke ɓe, "Aruɓe shɔng daa zemɔ ni nɔ ɓi shɔng ɓolongɓo a nɔ shãngni yãa, nɔ sɔɔ tuuke nɔ na e mɔng ɓooni yoori ye." ⁵ Vizeni wuko wo kara wɔ̃ngni ɓolonɓo na tase Laa wɔ̃ngni ɓolonɓo ye, wo daa shãngni viya? Wo daa tɔɔ kɔtɔ hãmi ni Laa wu ɓi shɔng ruvĩni aɓe ese wu yato leseni a wo yuu ya? (Ɓemi ɓi yãa konseni shɔngzeng.) ⁶ Daa wɔ̃ng ɓa ananko ɓaǃ Laa daa sɔɔ ɓoore koodanga yoori nukoviya? ⁷ Vizeni wuko N jĩni yãa na daa shãngshe Laa bɔngni kɔtɔ, aruvi shɔng dong ɓooreng yoori anaa shɔng ruvĩni viya? ⁸ Aruvi wo daa shãng ɓa ni, anaaɓe shɔng dãwo asɔɔ shãng ni, ɓɔɔ ɓe shɔng gãasi yii a naa ye ni wo shãng ni, "Wo pele ruuvĩni ta, aruɓe tɔ̃ving daa e ya"? Yii ɓooni yoori ɓi tɔ̃ving. ⁹ Ɓi tɔ viya? Wo daa sɔɔ raa wo yuu ya? Ɓa ananko ɓa. Aru wo langse shɔng Yahudayi ye ɓɔɔ shɔng Girikiyi, yii walikãng, aru yii wɔ̃ngni a vusu ruvĩni. ¹⁰ Ɓemi wɔ̃ng anaaɓe shɔng binke ni; "Shɔng goro ɓɔɔ ɓa shɔng yato ɓolonɓo ɓa, ɓa ko goro ɓa; ¹¹ shɔngɓɔɔ ɓa goro ɓe ze viye, shɔngɓɔɔ ɓa goro ɓe bee Laa ɓa. ¹² Yii walikãng waa ye feefe; yii a yãawee yii wɔ̃ngye ɓa tɔ̃ving ɓa. Shɔngɓɔɔ ɓa goro ɓe pele vi tɔ̃ving ɓa, ɓa, ɓa kɔ goro ɓa." ¹³ "Yii vɔ̃ɔre anaa yuusa ɓe yaasi. Yii jĩngyãa ye ni rete. Zɔ̃po ayi yãa anaa sɔɔkɔ ɓee." ¹⁴ Yii yãa yiye ni leseni shɔng ɓɔɔ laniyãa." ¹⁵ "Yii dɔɔ tɛ̃ti a mɔng wɔseni kpaa. ¹⁶ Leseni ɓɔɔ kpãareni ayi dɔ̃rɔng. ¹⁷ Shɔng ɓemi yide ze dɔ̃rɔng wɔ̃ngni ɓatata ɓa." ¹⁸ "Zaani Laa ɓa a yii bii ni ɓa." ¹⁹ Hãmi wo ze ye viɓe walikãng ɓe ruudani shãng ni, shãng aru shɔng ɓe yii dũng ruudani ɓi ɓe, aruɓe shɔngɓɔɔ daa puu yãa tɔɓa, aruɓe koodanga walikãng daa ze ni ruudani a Laa naa ko. ²⁰ Aru shɔngɓɔɔ daa kpaa kpengni ɓa aru dũngni ruudani awu watĩng ɓa. Aru dũngni ruudani ko shɔng ze ruvĩni. ²¹ Vizeni wuko hãmi wɔ̃ngni ɓolonɓo Laa keye ɓani dũngni ruudani ɓa, aɓe ruudani ɓɔɔ Shɔngzeni suruyi a yãa aru ni ɓe- ²² Laa wɔ̃ngni ɓolonɓo ni kaa shĩngnign a vusu Yeso Kirisi aru shɔngɓe yii azɔng ye walikãng. Aru yuu vaseni ɓa, ²³ aru shɔng pele ruvĩni ye walikãng shɔng sɔɔ de aa Laa bɔngni ɓa, ²⁴ shɔng sɔɔ kpengseyi ni wu pãnti aru raani yuu ɓe a vusu Kirisi Yeso. ²⁵ Aruviya Laa e se Kirisi Yeso anaa vi ani shaareni ni dɔ̃rɔng anizɔng a wu vusu kpaa bii. A a Kirisi aru wu taseni nungoko, aru wu yaani ruvĩniyi ɓee tũmpu ²⁶ a wu vusu wɔ̃ngni lemɓa. Ɓemi aru wu tase wu wɔ̃ngni ɓolonɓo a laɓe wo hãmi ani, aruɓe daa wɔ̃ng nungoko ɓɔɔ shɔngɓe raa shɔngɓe wu shĩngnign ani a Yeso kaa bii. ²⁷ Vi tooseni yuu ɓi weya? Shɔng kese wu ye ni gaa. Ni kaa ruudani ɓewe ya? Ɓee vipeleniyi ya? Ɓa, ni kaa ruudani gnshĩngni. ²⁸ Wong sɔ̃ɔre yãa hãmi ni shɔngzeng kpengni shĩngnign ɓani vipeleni ɓee ruudani ɓa. ²⁹ Kɔ Laa ɓi shɔng Yahudayi Laa ko shee ya? Wu ɓa jɔ Laa ɓee shɔngɓe yide ze Laa ɓa ya? Ananko, wu ɓi ɓee shɔngɓe yide ze Laa ɓa ko jɔ walikãng. ³⁰ Na, nungoko, Laa wuko goro, ng kpengse shɔng shaa yeeni ni gnshĩngni, shɔng shaa dĩngli tɔti ni gnshĩngni. ³¹ Wo sɔɔ kese ruudani hãmi aru gnshĩngni ya? Daa wɔ̃ng ɓa ananko ɓa, viɓe wong pele wuko, wo peng ruudani.