¹ Arugoko nɔ vishãngni ɓaniɓa, mɔko shɔngzeng, ɓe mɔ ɓoore shɔng yoori mi, aru viɓe mɔ ɓoore yoori ani mi, mɔng lese mɔ yuu. Aruviya shɔng ɓe mɔ ɓoore yoori mi mɔ pele zɔng vi ɓiko. ² Aɓe woo zeye Laa ɓooni yoori ɓi a yuu tɔ̃ving naa lɔɔye a yuu shɔng ɓe yii pele zɔng viɓemiyi. ³ Vileseni wuko lere ta a yuu viɓemi, mɔko shɔngzeng, mɔ shɔngɓe mɔng ɓoore yoori a shɔngɓe ying pele zɔng viɓemi mɔ pele jɔ zɔng viɓi yiko. Mɔ daa zenung kɔtɔ mɔ kpeng a Laa ɓooni yoori ya? ⁴ Kɔ mɔ lereni wu vinaa ɓe tɔ̃ving mi tɔkɔlɔng, wu kpãareni ɓe de eɓa mi, ni wu lemɓa mi ni ya? Kɔ mɔ de zeɓa wu lemɓa mi kaseke wu kase mɔ kpaa kpengseni ɓa ya?. ⁵ Vileseni wuko aru mɔ lakeni sĩngsĩng ɓɔɔ bɛ̃ɛni yani ruuvĩni mɔng tɛ̃ɛrɛ mɔ yuu leseni a wu diki leseni yato, N tɔɔ, diki ɓe Laa ng tasewo wu ɓooni yoori ɓe dang ɓe. ⁶ Ng shoore shɔngzeng viɓe pele ɓe walikãngː ⁷ shɔngɓe yii de yɔɔ ɓa ni peleni vi tɔ̃ving ɓa yii ruu bɔngni, ɓɔɔ bɔrɔ ani, ɓɔɔ shɔngɓe pele ruu nanka ɓa, ng a surubi ɓee dongdong. ⁸ Aru shɔngɓe yii kaseyi yuu, shɔngɓe yii bɛ̃ɛ tɔ̃ving ɓe ni shɔngɓe yii kase ruuvĩni ɓe, ng tɛ̃ɛrɛyi leseni yato a yuu. ⁹ Laa ng ese kpãareni ɓɔɔ yɔɔreni a suru shɔngɓe ying pele ruuvĩni, a shɔng Yahuda ko shɔɔni, ɓɔɔ shɔng Giriki. ¹⁰ Aruviya bongseni, dooni ɓɔɔ lemɓa ng e a yuu shɔngɓe ng pele vi tɔ̃ving ɓe, ni shɔng Yahuda ko shɔɔni, ɓɔɔ nii Giriki yii. ¹¹ Aruviya Laa vaa kaseni ɓa. ¹² Aruɓe shɔng vɛ̃ɛni yii pele ruvĩni ye ɓani ruudani ɓa shɔng ɓooriyi yoori jɔ ɓani ruudani ɓa, ɓɔɔ anaa ɓe shɔng vɛ̃ɛni pele ruvĩni ye ni zeni ruudani shɔng ɓooriyi yoori ni ruudani ko jɔ. ¹³ Ɓa aru shɔngɓe ying tãa ruudani yiko shɔng yato ɓolongɓo a Laa kaa bii ɓa, ɓi shɔng ɓe yĩng dũng ruudani yii daa kpaa kpengseni. ¹⁴ Aru shɔngɓe yii de ze Laa ɓa, ɓe yii ruudani ɓa ani ɓa, yii pele ni ruubi viɓe ruudani shãng ɓe, yii ɓi ruudani ni yii yuu, aɓe yii ruudani ɓa ani ɓa. ¹⁵ Viɓemi ying tase ni vipeleni ɓee ruudani shɔng binkeye a yii sĩngsĩng. Yii tãani a bii ng wɔ̃ng yii aniyãa, yii lereni kɔ wu lanseyi kɔ wu raayi ¹⁶ a diki ɓe Laa ng ɓoore shɔngzeng walikãng yoori vi vɔ̃ɔseni, anaa N ruu tɔ̃ving, ɓee Yeso Kirisi. ¹⁷ Vizeni wuko nɔna tɔɔni nɔ ɓi shɔng Yahuda nɔsɔɔ shĩngn ye a ruudani ɓɔɔ gɔɔreni a ruu Laa, ¹⁸ ɓɔɔ zeni wu kaseni ɓɔɔ teni viɓe lii kɔtɔ tɔ̃ving aruviya shɔng tase nɔ ye a ruudani; ¹⁹ nɔna mile nɔ yuu nɔ shɔng taseni shɔng nung gbãti dɔ̃rɔng, ɓenkeni a amɔng shɔngɓe yii a mɔng tĩngri, ²⁰ shɔng taseni shɔng wurenyi vi, shɔng manteni wojaa yii, ɓe nɔ kpaa a ruudani zeni ɓɔɔ ɓee nungoko, ɓemi yɔɔre dɔɔɓe mɔ wɔ̃ng mɔ wɔ̃ngni nuko viya? ²¹ Shɔngɓe nɔ mante shɔng gãasi yii, nɔ mante nɔ yuu ɓa ya? Shɔngɓe nɔ waayãa aru ɓɔɔni, nɔ ɓɔɔ ɓa ya? ²² Nɔ shɔng ɓe nɔ tɔɔni shɔng na roo ɓa ni shɔng soo ni ɓa, nɔ roo ɓa ni shɔng soo ni ɓa ya? Nɔ shɔng ɓe nɔ bɛ̃ɛ dũngni jaanari, nɔ ɓɔɔ ɓa a jaaka Laa ɓa ya? ²³ Shɔngɓe nɔ gɔɔre a ruudani, nɔ bɛ̃ɛ Laa bɔrɔ ani kɔtɔ a kani wu ruudani ya? ²⁴ Aruviya "Laa rĩng too ruubɔng ye a titi shɔngɓe yii de ze Laa ɓa aru nɔni," anaɓe shɔng binke ɓe. ²⁵ Aru yeeni shaa ɓi vi tɔ̃ving a nɔ bii nɔna dũng ruudani ye, nɔna ɓi shɔngɓe dũng ruudani ɓa ɓe, nɔ yeeni shaa wɔ̃ng shaa dĩngli. ²⁶ Na, tɔti, shɔng ɓe shaa dĩngli dũng ruudani ye, wu shaa dĩngli wɔ̃ng ɓa anaa shaa yeeni ɓa ya? ²⁷ Ɓa shɔngɓe wu shaa dĩngli ko daa lese nɔ na dũng ruudani ye ɓa ya? Ɓemi aru nɔ ruudani ɓɔɔ yeeni shaa ani, nɔ ɓi shɔng kani ruudaniǃ ²⁸ Aɓe wu ɓa shɔng Yahuda ɓee bii kɔvɛ̃ ɓa; ɓɔɔ ni yeeni shaa ɓa ɓee bii kɔvɛ̃ ɓa. ²⁹ Vileseni wuko wu ɓi shɔng Yahuda ɓe wu a gigiribi, ɓɔɔ wu yeeni shaa ɓee sĩngsĩng, a Suru, ɓa a binkeni ɓa. Dooni shɔngzeng ɓemi ke ɓa a shɔngzengyi bii ɓa, ke a Laa bii.