¹ Mazungyi, N kaseni sĩngsĩng ni N gɔ̃ɔreni a Laa bii wuko, aru yini, ɓɔɔ yii kpengseni. ² Aruviya N ani yãa aru yini, yii kpara a bini aru Laa, ɓa aru zeni nung vi ɓa. ³ Aruviya, mɔna bee zeni ɓolongɓo ɓe a Laa bii ɓe, aɓe yii bee ke yii tase yii ɓolongɓo, yide roore yuu ɓa a Laa ɓolongɓo ɓa. ⁴ Aru Kirisi ɓi wuko yiseni ruudani ɓee ɓolongɓo ɓee shɔngzengyi walikãng ɓe yii azɔng ɓe. ⁵ Aru Muusa binke aru ɓolongɓo ɓe e a ruudani ɓeː "Shɔngɓe na pele viɓemiyi ye ying wɔ̃ng jɔ ni yiko." ⁶ Aruviya ɓolongɓo ɓe e a gnshĩngni shãng niː "Mɔna shãng ɓemi ɓa a mɔ sĩngsĩng ni, 'Ɓi we daa vɔ̃ng lapa wee? (N tɔni, wu lɔɔre Kirisi tipi); ⁷ mɔna sɔɔ tɔɔ ɓa ni, 'Ɓi we daa lɔɔ diiyaa weya?" (N tɔni, wu yuuse Kirisi paa a yuusa). ⁸ Vizeni wuko shãngni viya? "Ruu ɓi maani ni mɔni, a mɔ yãa ɓɔɔ a mɔ sĩngsĩng." Ɓewa wuko ruu shĩngnign, ɓe wo shãng ɓe. ⁹ Mɔna shãngye ni mɔ yãa Yeso ɓi Daayere, mɔ sɔɔ azɔngye a mɔ sĩngsĩng ni Laa yuuse wu paa a yuusa, mɔng kpaa kpengseni kɔtɔ. ¹⁰ Aru ni sĩngsĩng ɓe shɔng azɔng ɓe ng kpaa yato ɓolongɓo, ni yãa ɓe shɔng shãngɓe shɔng kpaa kpengseni. ¹¹ Aruviya labini Laa shãngni, "Shɔng ɓe na azɔngye a wuni ng tãa yusɛ̃ɛ ɓa." ¹² Aruviya zɔng ɓa tok ɓa ni Yahuda ɓɔɔ Giriki ɓa. Aruviya Daayere goro mi ɓi wuko Daayere walikãng, daa sɔɔ a shɔng ɓe yii ɓaawu rĩng vi kɔtɔ walikãng. ¹³ Aru shɔng ɓe na ɓaa Daayere rĩngye ng kpaa kpengseni kɔtɔ. ¹⁴ Yii daa ɓaa yãa nukovi a shɔngɓe yide azɔng ɓa a wuni ɓa viya? Yii daa azɔng nukovi a shɔng ɓe yide tãa wu ɓa viya? Yii daa tãawu nukovi shɔng waani yãa na ɓa viya? ¹⁵ Yida waayãa nukovi shɔng na de shongyi ɓa viya? Anaa ɓe shɔng binke ni, "Aruviya lii tɔna shɔngɓe yii shã̃ngke ruu tɔ̃ving ɓeǃ" ¹⁶ Yii ɓa walikãng yii dũng ruu tɔ̃ving ɓa. Aru Ishaaya shãngni, "Daayere, ɓi wee azɔng awo yãa shãngni weya?" ¹⁷ Ananko gnshingni e a tãani, ɓɔɔ a tãani ɓee ruu Kirisi. ¹⁸ Vizeni wuko N shãng ni, "Yide tãang ɓa ya" Ananko, nunzeng. "Yii zuru yãa waa ye a vusu koodanga walikãng, ni yii ruu shãngni waa ye a yãa mikeni koodanga." ¹⁹ Ɓɔɓɔ, N gãalenɔ ni, "Israyila de ze ɓa ya?" Shɔɔni Muusa shãng ni, "N shĩng nɔ kaagn aru mɔng ɓe ɓa koo ɓa. Aru koo ɓe yii zeni ɓa, N shĩng nɔ lese yato." ²⁰ Ishaaya sɔɔ shii ɓange aɓe shãng ni, "Shɔngɓe yide bengɓa yiko kpang ke. N taase yuu a shɔngɓe yide bengɓa." ²¹ Aɓe shãngshe Israyila ni, "A diki ɓololo walikãng N waareng naa a shɔng yãa bɛ̃ɛniyi ɓɔɔ shɔng yuu lakeni yii.