¹ N shãng ni, Laa sɔɔ bɛ̃ɛ wu shɔng kɔtɔ ya? Na wɔ̃ng ɓa ananko ɓa. Aru N jɔ shɔng Israyila ko, Ibirayi jetãri, a laye Biliyamu. ² Laa de bɛ̃ɛ wu shɔng yii ɓa, ɓe ze yii ye tɛ̃tɛ̃. Nɔ de ze viɓe labini shãngni aru Iliya ɓa ya, anaa ɓe gɔ̃ɔre Laa a yuu shɔng Israyila? ³ "Daayere, yii nung mɔ shɔng zeni ye, yii wɔ̃ngke mɔ alta ye. Miko goro N roo ke, yide sɔɔ beng surubi ni." ⁴ Laa sɔɔ kase wu yãa nuko viya? "Shɔng gãasi yii ani ɓe yii waa labɔng nawa tati ɓe N vɔ̃se yii ɓe yide tang ɓa ni gɓinti a Baal bii ɓa." ⁵ Jɔ ananko, a laa ɓemi shɔng ani ɓe yii roo aru rɔɔni pãnti. ⁶ Vizeni wuko na ɓi ni pãnti, ɓa ni dɔ̃rɔng pele shooniyi ɓa. Na ɓa ananko ɓa pãnti ng wɔ̃ng ɓa pãnti ɓa. ⁷ Ɓi tɔti viya? viɓe shɔng Israyila yii sii bee ɓe, yide kpaa ɓa, shɔng ɓe shɔng rɔɔyi ko shee yii kpaa ke, shɔng gãasi yii lake sĩngsĩng. ⁸ Wɔ̃ng anaa ɓe shɔng binke niː "Laa de a yii suru ɓee zeni vi ɓa, nung ani aru ɓe yidaa ze ɓa, ɓɔɔ shoo ani aru ɓe yidaa tãa ɓa, awaa diki ɓemi." ⁹ Dawuda sɔɔ shãng ni, "Yii teburu wu sɔɔ rii jejang ɓɔɔ jang, tara koseni dɔɔ ɓɔɔ vi rini bang aru yini. ¹⁰ Yii nung wu wɔ̃ng ta viiki gbĩtĩngbĩ aru ɓe yii daa ze mɔng ɓa, a sɔɔ gbeng yii kuku ɓa ɓɔɓɔ." ¹¹ N sɔɔ shãng ni, "Yii kɔse dɔɔ aru yii wete ya? Na wɔ̃ng ɓa ananko ɓa. Viɓe yii pele wuko, aru yii ruvĩni, kpengseni e shɔng ɓe yii de ze Laa ɓa bii ye, aru ɓe yii pele gnkaani ni yini. ¹² Hãmi yii ruvĩni na shĩng ye yii kpaa vinaa ɓee koodanga ɓemi, yii lɔrenivi na wɔ̃ngye vinaa a shɔng ɓe yii de ze Laa bii, yii dũngni yãa daa ayi pãnti nuko viya? ¹³ Vizeni wuko hãmi N shãngshe shɔng ɓe yide ze Laa ɓa yãa, nang dong wɔ̃ng jaarɔɔni ɓee shɔng ɓe yii de ze Laa ɓa, N toseni yuu ani a N shooni. ¹⁴ Aru ɓe vi ɓi daa shĩng yii kaanign shɔng ɓe yii a vusu gigiribi. Kɔ wo daa kpengse pota ɓɔɔ yii kɔtɔ a yii titi. ¹⁵ Aru yii bɛ̃ɛni na wɔ̃ng ye koodanga tɔ̃ɔre ni, yii teni da wɔ̃ng nukoviya na ɓa surubi a shɔng ɓe yii sii vɔɔ ye ɓa viya? ¹⁶ Reni ɓee shɔɔni na kpelengkpe, gãasi ɓee tũmpu ying wɔ̃ng jɔ ananko. Dĩngli la na kpelengkpe, wu nasɛ̃ɛng ying wɔ̃ng jɔ ananko. ¹⁷ Vileseni wuko shɔng na sɔɔ zĩngle wu naasɛ̃ɛngyi ye, nɔ bibi, nɔ ɓi naasɛ̃ɛng lazetu ɓee jĩngti, ɓe shɔng ɓose nɔ a yii titi, nɔ na sɔɔ vase yii vinaa dĩngli ɓee lazetu ye, ¹⁸ nɔ na toose yuu ɓa a yuu naasɛ̃ɛngyi ɓa. Nɔ na toose yuu ye, ɓa nɔ ko nɔ yise dĩngli ɓa, ɓi dĩngli yise nɔ. ¹⁹ Nɔng sɔɔ shãng ni, "Shɔng zĩngle naasɛ̃ɛngyi aru ɓe shɔng daa ɓoseng a vusu." ²⁰ Ɓemi nungoko. Aru yii kara ani zɔng shĩng ke shɔng kakeyi, nɔ sɔɔ shii ni kaaka aru nɔ shĩngnign. Nɔ na wɔ̃ng shɔng nanka ɓa a nɔ lereni gn, nɔ zaa vɔɔ. ²¹ Aru Laa nade kpengse naasɛ̃ɛngyi ɓe tikiki ɓa, ng kpengse nɔ jɔ ɓa. ²² Mile pĩn, hãmi, Laa zɔng ani tɔ̃ving ɓɔɔ wu leseni yato vɛ̃ɛniː Wu leseni yato vɛ̃ɛni aru shɔng Yahuda yii ɓe yii wete ɓe, Laa wu tɔ̃ving taseni e a nɔ yuu, nɔ na waatĩng ye ni wu tɔ̃ving tase ni. Na ɓa ananko shɔng zĩngle nɔ jɔ ananko. ²³ Ɓɔɔ kɔ ɓi yiko, yina de waatĩng ɓa ni ani zɔng ɓa, shɔng ɓose yii tɔti. Aru viya Laa daa zenung yii ɓose ni kɔtɔ tɔti. ²⁴ Aru shɔng na zĩngle nɔ ye a gaa aru viɓe tikiki lazetu jĩngti, ɓe ɓa tɔ̃ving ɓa ni tikiki ɓe shɔng ɓose a vusu tɔ̃ving lazetu, nukovi viɓemi, tikiki nasɛ̃ɛngyi, shɔng daa ɓose yii tɔɓa a yii vusu lazetu ɓa ya? ²⁵ Aru ɓe N de kase ɓa nɔ wɔ̃ng anaa shɔng ɓe shɔng de gãaleyi ɓa, mazũngyi, aru ruu vɔ̃seni ɓemi, aru ɓe nɔ daa rii shɔng kpɛ̃ɛni ɓa anɔ lereni ɓaː Lakeni sĩngsĩng pota ɓe e a yuu shɔng Israyila a waa yini gãani shɔng ɓe yide ze Laa ɓa eni. ²⁶ Arugoko shɔng Israyila walikãng ying kpeng kɔtɔ, anaa ɓe shɔng binke niː "A vusu Sihiyona ko Shɔng Kpengseni ng e. N kese ruu nanka a Yaakubu bii, ²⁷ ɓemi wuko ng wɔ̃ng N yãa maani ni yini, alaɓe N too yii ruvĩni ni gaa." ²⁸ Anaa ɓe waani yãa ruu Laa, yii ɓi shɔngpong aru nɔni. Vileseni wuko anaa ɓe ruu rɔɔni shɔng wɔ̃ng ɓe, shɔng kaseyi aru yeebongyi. ²⁹ Aru Laa ani vii ɓɔɔ wu ɓani yãa kɔse ɓa. ³⁰ Anaaɓe nɔ sii ɓa shɔng dũngni Laa yãa ɓa, hãmi nɔ tewu gnkɔngni ye aru yii bɛɛni yãa. ³¹ A dɔ̃rɔng gorong ko, hãmi shɔng Yahudayi bɛ̃ɛni yãa. Vii taseni wuko aru kɔngnign ɓe shɔng tase nɔ ɓe yii daa sɔɔ kpaa kɔngnign jɔ kɔtɔ. ³² Aru ɓe Laa kuu shɔng yãa ye walikãng a vusu bɛ̃ɛni yãa aru ɓe daa tase wu gnkɔngni a shɔng bii walikãng. ³³ Nn, ranteni viina ɓe ɓase ni kpɛ̃ɛni ɓɔɔ zeni Laaǃ Nukɔvi zong ze wu booni yooriyi, ɓɔɔ wu dɔ̃rɔng vipeleni rante ni zeniǃ ³⁴ "Aru ɓi wee ze Daayere lereni kɔ ɓi wee daa rii wu shɔng gãaleni wu ruu weya? ³⁵ Kɔ ɓi wee shɔng shɔɔni ɓe a Laa vii ɓɔɔ, ɓe Laa daa sɔɔre wu weya?" ³⁶ Aru a wu bii ko ɓɔɔ tɔti ni wu bii ko vii walikãng wɔ̃ng ke. Bongseni wu wɔ̃ng wu ɓee ko dongdong. Ananko.