¹ Jɔ ananko tɔti shɔngshoni Laa ɓee maani jɛ̃ɛwu gboo. N sɔɔ ze seng ɓɔɔ a lapa ɓe lɔɔ a koodanga. Shɔng a seng ɓi vi yɔ̃rɔng puuni too ɓee dooseni shɔng. ² Puu yãato dooseni shɔng, zĩngri yaa ke a vusu too anaa yaa wĩngteni vi. La ɓɔɔ zãasi yirii viiki aru zĩngri ɓe ke mi. ³ A vusu zĩngri yaa zɔrɔ yii kele a vusu a ɓole vusu koodanga, shɔng ayi kaaka takeni shɔng, anaa nɛng a koodanga. ⁴ Shɔng zãareyi leseni wusi a koodanga, kɔ wusi yĩngsi kɔ laa, ni shɔngɓe yii shĩngni naa Laa ɓa ayi yii waatĩng ɓa ko shee. ⁵ Shɔng de ayi dɔ̃rɔng ɓa yii nung shɔng vɔɔ ɓa, yii kpãareyi goko shee ɓee shele maani. Yii kpãareni anaa nɛng ɓe na ta shɔng ye. ⁶ A diki waa yii shɔngzeng ying bee yii vɔɔ ke ying kpaa ɓa. Ying kase ke yina vɔɔ ke vɔni ng sɔɔ yuuyi kɔtɔ. ⁷ Zɔng zɔrɔ mi anaa gbantang ɓe yii shii dɔɔ sii, a yii yuu viɓɔɔ ani anaa kitiri lini ɓee gɔli, yii waatĩng anaa shɔngzeng ɓee. ⁸ Yii shenti yuu anaa sooye ɓee, yii tãri wɔ̃ng anaa zĩngang ɓee. ⁹ Yii yise suliki a shiile ni anaa saka, yii nasɛ̃ng zãsi anaa kani yãa gbantang ɓe ying waa mɔng sii tani. ¹⁰ Yii deng anaa nɛng ɓee; kaaka ayi deng ɓe ying ta shɔng shele maani. ¹¹ Kpanti ɓe mareyi wuko Laa shɔngshoni dooseni shɔng wu rĩng ni yãa Yahuda ni Abada, ɓɔɔ Helena wuko ni Afoliyo. ¹² Vi nugn kɔni ɓee shɔɔni dase ye. Zepĩnǃ A tũmpu ɓemi kpãareni ɓee ziti dong e kɔtɔ. ¹³ Shɔngshoni Laa ɓee maangoro jɛ̃ɛwu gboo, N sɔɔ tãa yãa ke a jee alta gɔli ɓe a Laa waatĩng, ¹⁴ gãale shɔngshoni Laa ɓee maangoro ɓe yii gboo ani, "Yaa shɔngshoni Laa dɛ̃ɛro ɓe shɔng maayi a bɔrɔ waapo Yufireti yii naa ta.” ¹⁵ Shɔngshoni Laa dɛ̃ɛro ɓe yii sɔngre bii aru laa wa, diki wa, shele wa, ɓɔɔ saa wa shɔng keseyi yii nung shɔnzeng vɔɔ. ¹⁶ Sɔja ɓe yii a gbantang dampa yii waa 200,000,000. N tãayi shani. ¹⁷ Ɓemi anaɓe N ze gbantang mi yii a suru ni shɔngɓe yii vɔ̃ng a yupa: yii yãa rãani, viiki ɓɔɔ anaa mɛɛroo. Gbantang ɓi yii yuu ke zĩngang yii yuu, yaa ke a yii yãa, zĩngri, ɓɔɔ mumu shelengyaa.” ¹⁸ Shɔng nungke shɔngzeng ɓe tati yii vɔɔ ni vi kpãare yiniː yaa, zĩngri, ɓɔɔ mumu shelenyaa ɓe ke ayi yãa. ¹⁹ Aruviya kaaka gbantang mi ayi yãa tɔ ayi deng- aruviya yii deng anaa sɔkɔ, ɓɔɔ yii yuu ɓee yini shĩngshe shɔng gbengka a bii. ²⁰ Gãasi shɔngzeng ɓe vi kpãareni mi de nung yii vɔɔ ɓa, yii de yaa ruvĩni viɓe yii pele ni yii naa ɓa, yide sɔɔ yaa gbãareni rãamang ɓɔɔ viɓe yii sɛ̃ ni naa, gɔli, saasũrɛng, tara ɓɔɔ laa sɛ̃ni- viɓe yii mile mɔng ɓa, tãa mɔng ɓa, kɔ kn ɓa ²¹ Yide yayi ruvĩni vɔɔ nungni ɓa, yingvaa shaani, yii kɔng peleni kɔ yii peleni ɓɔɔni.