¹ Alaɓe Jaamɛrɛ ɓi puu yãa viɓe shɔng ma nawatati ye, shɔng de tãa yãa ɓɔɔ ɓa a koolapa ɓa anaa laa yãa gãagã ² N sɔɔ ze shɔngshoni Laa yii nawatati ɓe yi shile a Laa waating, shɔng sɔɔ ayi gboo nawatati a naa. ³ Shɔngshoni ɓɔɔ eke, yise pii ɓe vi pũnkeni sũnunu, shii a yuu penlɔng pũnkeni sũnunu. Shɔng awu vi pũnkeni sũnunu vɛ̃ɛni aruɓe daa ani gɔ̃ɔreni ɓee Laa shɔng kpelengkpe a yuu vi pũnkeni sũnunu a pelɔng ladong rooni kpanti. ⁴ Zĩngri pũnkeni sũnunu ni gɔ̃ɔreni Laa shɔng kpelengkpe yini de waa Laa tĩng ni awu shɔngshoni Laa yii naa ⁵ Shɔngshoni Laa too pii ɓe pũnkeni sũnunu a yise ni yaa a yuu penlɔng. asɔɔ wɔɔse a koodanga, a mɔng ɓi shɔng tãa yãa kaani zãngla, kakeni viyi, ɓengni yaa, ɓɔɔ ziteni tipi. ⁶ Shɔngshoni Laa yii nawatati ɓeyi yise gboo nawatati mi yii gongte bii aru jɛ̃ɛ ni gboo ɓi. ⁷ Shɔngshoni Laa ɓe shɔɔni jɛ̃ɛwu gboo, jaka yaa ɓɔɔ yaa ɓase ni kpaa ni. Shɔng wɔɔse a koodanga aruɓe tati a titi daa shaare ke, tati ɓe laa yii shaare walikãng, ɓɔɔ wisi yĩngsi walikãng yii shaare ke. ⁸ Shɔngshoni Laa ɓee ziti jɛ̃ɛwu gboo, viɓɔɔ anaa ɓɔrɔ kopo de shaareni ni yaa shɔng sɔɔ looke a vusu waapo. Tati ɓe waapo rii anaa kpaa, ⁹ tati ɓe vitakeni ɓeyi suru bii ani a vusu waapo yii vɔɔyi, ɓɔɔ tati tuusi yii shɔng leseyi. ¹⁰ Shɔngshoni Laa ɓe tati jɛ̃ɛwu gboo, bɔrɔ seng wete a lapa, shaa yaa anaa vi ɓengni yaa, ayu tati ɓee yoo yii ɓɔɔ too mɛɛ yii. ¹¹ Shɔng ɓa seng ɓini laa gãgãk, shɔngzeng yii vɛ̃ɛni yii vɔɔyi aru mɛɛ ɓe la ɓe. ¹² Shɔngshoni Laa ɓee dɛ̃ɛro jɛ̃ɛwu gboo, tati ɓe la yii shɔng nungyi, ni tati ɓe shele ɓɔɔ tati ɓe seng yii. Tati viɓemi yii rii viiki; tati ɓee diki ɓɔɔ tati ɓe zii de kpaa ɓengni ɓa. ¹³ N mile ki, N sɔɔ tãa bɔrɔ mayakn ɓe du a lapa de ɓaa yãa ni kaaka yiri yãa ni, "Vi nugnkɔni, vi nugnkɔni, vi nugnkɔni ayu shɔngɓe yii a koodanga, aruviya jɛ̃ɛni gboo ɓe roo shɔngshoni Laa yii tati yidaa jɛ̃ɛ mi."