¹ A tũmpu vĩɓemi N ze shɔngshoni dɛ̃ɛro yii shile a kaa jaka dɛ̃ɛro ɓee koodanga, yii ma zãsi koo ka dɛ̃ɛro ɓee koodanga aruɓe zãsi daa wungse ɓa a koodanga, a yuu waapo, kɔ wu wɔ̃ng a yuu laa ɓɔɔ ɓa. ² N ze goro Laa shɔngshoni ɓɔɔ de eni a dii, ɓe wu vi mani ani ɓee shɔng suru Laa. A kaa yãa ni kaka yiriyãa a Laa shɔngshoni dɛ̃ɛro mi ɓe shɔng ayi dɔ̃rɔng leseni koodanga ɓɔɔ waapoː ³ "Nɔ na lese koodanga ɓa, waapo ɓa, kɔ layi ɓa wo na de shĩng vi mani ɓa a Laa jaadɔɔyi waatĩng ɓa." ⁴ N tãa gãani shɔngɓe shɔng mayi ɓeː labɔng 144,000, ɓe shɔng mayi a yãa koo ɓee shɔng Isrela yiiː ⁵ labɔng kopi atu ziti a yãakoo Yahuda ɓe shɔng mayi tĩng, labɔng kopi atu ziti a yãakoo Ruben, labɔng kopi atu ziti a yãakoo Gati, ⁶ labɔng kopi atu ziti a yãakoo Ashiru, labɔng kopi atu ziti a yãakoo Nafitali, labɔng kopi atu ziti a yãakoo Manase, ⁷ labɔng kopi atu ziti a yãakoo Saminu, labɔng kopi atu ziti a yãakoo Lawi, labɔng kopi tu ziti a yãakoo Isaka, ⁸ labɔng kopi atu ziti a yãakoo Zabaluna, labɔng kopi atu ziti a yãakoo Yuusu, ɓɔɔ labɔng kopi atu ziti a yãakoo Biliyaminu ɓe shɔng mayi. ⁹ A tũmpu viɓemi yii N ze, mɔɔ yii vɛ̃ɛni ɓe shɔngɓɔɔ daa zenung yii gãani ɓa a yãakoo walikang, yãakoo, shɔngzengyi, ɓɔɔ yãakoo- yii shii a tĩng ladong kpanti ɓɔɔ wu Jaamɛrɛ waatĩng. Yii ɓose fara puru a bii a sɔɔ yise nasɛ̃ng kaka ayi naa, ¹⁰ yii sɔɔ kaa yãa ni yiriyãaː "Raaniyuu ɓi wo Laa ɓee, ɓe wɔ̃ng a ladong kpanti, ɓɔɔ Jaamɛrɛ." ¹¹ Laa shɔngshoniyi walikãng yii shiile a kati ladong kpanti ɓɔɔ a yuubɔrɔyi kaagn ɓɔɔ tɔti vitakeni dɛ̃ɛro ɓe yii surubi ani, yii sɔɔ wete a waatĩng ladong kpanti. Yii gbãare Laa, ¹² ni, " Anankoǃ Dɔɔni, bɔngseni, kpɛ̃ɛni, taseni dɔɔreni, ani bɔrɔ, kaaka, ɓɔɔ kaakabi ɓi wo Laa ɓee dongo ɓɔɔ dongdongǃ Anankoǃ" ¹³ Alaɓi goro yuubɔrɔ mi yii yɛ̃ng ni, "Ɓemi ɓi wee yii, ɓe yii ɓose fara puru mi weya, yii sɔɔ ke a mɔng ɓe weya?" ¹⁴ N gãale wu ni, "Yebang, mɔ ze ye," asɔɔ gãaleng ni, "Ɓemi ɓi shɔngɓe yii ke a vusu bɔrɔ kpãareni. Yii sɔke yii fara bii ye yii riseye puru ni kpaa Jaamɛrɛ. ¹⁵ Aru viɓemi ko, yii a waatĩng ladong kpanti Laa, yii gbãare wu zii ni laa ni walikãng a wu jaka. Shɔngɓe wɔ̃ng a yuu ladong kpanti mi daa kɔyi kɔtɔ. ¹⁶ Ying tãa wɔ̃ko tɔɓa, kɔ yii tãa sɔ̃ɔti mɛɛ tɔti ɓa. Ying sɔɔ tãa laa tɔɓa, kɔ shaareni wãani ɓa. ¹⁷ Aruviya Jaamɛrɛ ɓe a titi ladong kpanti daa gaayi ke, wu sɔɔ gaayi wu waareyi toomɛɛ ɓee surubi, Laa wu sɔɔ sɔ̃ɔreyi mɛnung ɓe ayi nung walikãng."