¹ N mile alaɓe Jaamɛrɛ ɓi puu vishĩngni naa kpanti goro a titi nawatati, N sɔɔ tãa goro a titi vitakeni ɓe yii surubi ani dɛ̃ɛro mi shãng ni yiri yãa anaa zãngla, "Etaǃ" ² N mile ke puru gbantang a mɔni. Shɔng vɔ̃ngni ɓi yise taka a naa, shɔng sɔɔ awu vi gini yuu. Ke anaa shɔng sii tani aruɓe daa shaa shɔng ni sii ɓe. ³ Alaɓe Jaamɛrɛ puu vishĩngni naa kpanti ɓee ziti ye, N tãa vitakeni ɓe yii surubi ani ɓee ziti shãng ni, "Etaǃ" ⁴ Gbangtang ɓɔɔ sɔɔ ke ke wu bii rãni. Shɔng a shɔngɓe aa shɔngɓe vɔ̃ngni ɓi dɔ̃rɔng tooni wɔ̃ngni ɓatata a koodanga, aruɓe wu shɔng bii yidaa yele wee gorogo ɓe. Shɔng aa shɔng vɔ̃ngni ɓi bɔrɔ yeewa ɓe yãa lang kɔtɔ. ⁵ Alaɓe Jaamɛrɛ puu vi naashĩngni ɓee tati ye, N tãa vitakeni ɓe yii surubi ani ɓee tati shãng ni, "Etaǃ" N ze viiki gbangtang, shɔng vɔ̃ngni ɓi yise vi mani mɔng awu naa. ⁶ N tãa anaa yãa kaani a titi vitakeni dɛ̃ɛro ɓe yii surubi ani shãng ni, "Jewa vishãng dinari goro, jewa ɓee zumang tati dinari goro. Mɔna lese nung ɓɔɔ mɛɛ reni laa ɓa." ⁷ Alaɓe Jaamɛrɛ ɓi puu vi maani ɓee dɛ̃ɛro ye, N tãa yãa vitakeni ɓe yii surubi ani ɓee dɛ̃ɛro shãng ni, "Etaǃ" ⁸ N sɔɔ ze kili gbangtang. Shɔngɓe vɔ̃ngni ɓi shɔng awu rĩng ni Vɔɔ, ɓɔɔ Hadesi de dũng wu tũmpu ni. Shɔng ayi kaaka naa a yuu goro a titi dɛ̃ɛro ɓee shɔngɓe yii a koodanga, yii nungyi vɔɔ ni yewa, ni wɔ̃ko ɓɔɔ vɔɔ bii, ɓɔɔ tɔti nangka viyãɓa ɓee koodanga. ⁹ Alaɓe Jaamɛrɛ ɓi puu vi mani yãa ɓee maani ye, N ze a ɓuu alta suru shɔngɓe shɔng nungke yii vɔɔ aru Laa ruu ɓɔɔ shãngni ruu tɔ̃ɔving ɓe yii yise ɓe. ¹⁰ Yii kaa ni kaaka yãa, "A lawe, Kpanti ɓe roo koo ɓe, tɔ̃ɔving ni nungoko, wu waa laɓe mɔ ɓoore shɔngɓe yii wɔ̃ng a koodanga yoori, wu e laɓe mɔ kɔngse nung wo kpaa weya?" ¹¹ Yii gorogo shɔng ayi puru fara, shɔng sɔɔ gãale yini yii gata pota wu waa laɓe yii gãani daa waayi gãasi jaadɔɔyi ɓɔɔ yii mazũngyi ɓe shɔng daa nungyi vɔɔ, anaɓe shɔng na sɔ̃ɔre yii nungni vɔɔ ye ɓe. ¹² Alaɓe Jaamɛrɛ ɓi puu vi mani ɓee maangoro ye, N ze bɔrɔ tipi ziteni. La rii viiki ɓiriɓi anaa fara viiki, shele sɔɔ rii anaa kpaa. ¹³ Seng ɓee koolapa yii tɛ̃ɛ a koodanga, anaɓe la sĩngri wu rɛni ɓe de zũngɓa na zitiye ni zãsi. ¹⁴ Lapa rĩngke anaɓe shɔng ling sii ɓe. Kɔpɔ ɓɔɔ tipi ɓe a titi mɛɛ walikãng ying gise ayi mɔng wɔ̃ngni. ¹⁵ Alaɓi ko kpanti koodanga ɓɔɔ shɔngzeng tɔ̃ɔvingyi, yuubɔrɔ tani sii, ɓɔɔ shɔng vinaa, ɓɔɔ shɔng kaaka, ɓɔɔ shɔng yii walikãng, jaadɔɔyi ɓɔɔ shɔng yii kɔvɛ̃, yii vɔ̃ɔ a vusu puru ɓɔɔ a titi tarayi ɓɔɔ kɔpɔyi. ¹⁶ Yii gãale kɔpɔyi ɓɔɔ tarayi, "Lɔɔ ta awo yuuǃ Vɔ̃ɔse wo ta a waatĩng shɔngɓe wɔ̃ng a yuu vi wɔ̃ngni kpanti ɓɔɔ a Jaamɛrɛ mi wu leseni yato. ¹⁷ Aru pãnti diki ɓee yii leseni yato e ye. Ɓiwe daa zenung shiini weya?