¹ A nashang shɔngɓe wɔ̃ng a ladɔng kpanti, N sɔng ze labini ɓɔɔ shɔng binke vusu ni gaa ni, shɔng shĩng naa vi shĩngni kpanti nawatati. ² N sɔɔ ze bɔrɔ jaashoni Laa ɓɔɔ ng waayãa ni kaaka a shãng ni, “Ɓiwee daa zenung puuni labini mi, wu sɔɔ wãngke wu naa shĩngni kpanti we ya?" ³ Shɔngɓɔɔ ɓa a koolapa kɔ a koodanga, kↄ a vusu tipi, ɓe daa ze nung puuni labini, wu mile viɓe a vusu. ⁴ N wete a yãavɔɔ ɓe N de kpaa shɔngɓe waa ye wu puu labini, kↄ wu ze vusu ɓa, kↄ goro. ⁵ Goro a vusu shɔngbɔrɔ mi yii gãalen ni, “Mɔ na kaa ɓa. Zeta wuko zĩngang mi ɓe a lakoo Yahuda, Shãri Dawuda, shaa sii ye wu kaaka ani wu puu labini mi ni wu shĩngni naa kpanti nawatati”. ⁶ N sɔɔ ze Jaamɛrɛ ɓɔɔ shii a titi ladong rooni kpanti ɓi, shɔngɓe yii suru ani dɛ̃ɛro ɓɔɔ shɔng bɔrɔngbɔ mi, jaamɛrɛ mi wu anaa ɓe shɔng ye ɓe, wu je ni nawatati ɓɔɔ nung nawatati, shɔng ɓe yii a Laa suru yii nawatati, ɓe shɔng shong a koodanga walikãng. ⁷ Sɔɔ waa ke a too labini mi ɓe a nashang shɔngɓe wɔ̃ng a yuu ladong kpanti mi. ⁸ Alaɓe too labini mi ye, vitakeni suru dɛ̃ɛro ɓɔɔ shɔng bɔrɔbɔ bãti--atu dɛ̃ɛro mi yii wete a Jaamɛrɛ mi waatĩng. Shɔngzeng ɓeweya ayi titi mi yii yise vĩngta ɓɔɔ gbãnti gɔli gãasi a vusu ɓooli, ɓe wuko gɔ̃ɔreni Laa shɔng ɓolongɓo yii. ⁹ Ying tãng polo soo, ying shãng ni, “Mɔ tisenung ɓe mɔ daa too labini mi mɔ sɔɔ puu vishĩngni naa kpantiyi. Aru shɔng yemɔ tuu, tɔ ni mɔɔ kpaa ko mɔ woore shɔngzeng Laa yãakoo ɓeweya, yãashãngni, shɔngzeng, ɓɔɔ koo. ¹⁰ Mɔ rise yii roonikpanti ɓɔɔ Firisi yii dũng wo Laa, yii sɔɔ rookoo a koodanga.” ¹¹ N sɔɔ mile ke, a sɔɔ tãa yãa Laa shɔngshoniyi vɛ̃ɛni, yii kinte ladong kpanti mi a titi ɓɔɔ vitakeni mi ɓe yii suru ani, ɓɔɔ shɔng bɔrɔbɔ mi. Yii shani waa labɔng kopi yaa labɔng kopi ɓɔɔ labɔng labɔngyi. ¹² Yii shãng ni kaaka yiri yãa ni, “Mɔ tisenung ye Jaamɛrɛ, ɓe shɔng sii yewu tuu, wu tee kaaka naa, vinaa, kpɛ̃ɛni, kaaka, bɔngni, bɔngseni, ɓɔɔ dɔɔni.” ¹³ N sɔɔ tãa vi takeni ɓeweya ɓe yii koolapa, ɓɔɔ koodanga, ɓɔɔ vusu tipi, ɓɔɔ ɓe a yupa waapo, -- ni viɓe walikãng a vusu --ying shãng ni, “Dɔɔni, bɔngni, bɔngseni, ɓɔɔ maareni yii ɓee shɔng ɓe wɔ̃ng a ladɔng kpanti, ɓɔɔ Jaamɛrɛ, dongo ɓɔɔ dongdong.” ¹⁴ Vitake dɛ̃ɛro ɓe yii suru ani yii shãng ni, “Ananko!" ɓɔɔ shɔng bɔrɔbɔ yii wete a gbãarewu.