¹ A tũmpu vi ɓemiyi walikãng N mile, a sɔɔ ze yɔ̃rɔng koolapa puu ye. Yãa shɔɔni ɓe N tãa shãng yãa ni mini anaa gboo, ni, “Eta a mɔng, N tase mɔ viɓe daa waatĩng a tũmpu vi ɓemiyi walikãng.” ² La goro N a Suru, a ze ladong wɔ̃ngni kpanti a koolapa, shɔngɓɔɔ wɔ̃ng awu yupa. ³ Shɔngɓe wɔ̃ng a yupa mile weni ɓi jaspa ɓɔɔ kaneliya. Bala takɔng a ka ladong wɔ̃ngni kpanti. Bala takɔng ɓi dee anaa biyiri. ⁴ A kaa ladong wɔ̃ngni kpanti ɓi ladong wɔ̃ngni kpanti yii bãti atu dɛ̃ɛro, shɔngɓe yii wɔ̃ng a ladong wɔ̃ngni kpanti ɓi yuubɔrɔ yii bãti atu dɛ̃ɛro, yii ɓose fara a bii puru, ni vi gini gɔli a yii yuu. ⁵ A mɔng ladong ɓi yaa ɓengkeni kpɛ̃rere, gini ɓɔɔ langkeni yãa zãngla. Ɓengkeni reete yaa nawa tati ying shaa a tĩng ladong kpanti ɓi, Yaa jaka zeni nawa tati mi yiko suru Laa nawa tati. ⁶ A tĩng ladong wɔ̃ngni kpanti ɓi ɓi waapo gilasi, anaa vi nung mile ni. A titi ladong wɔ̃ngni kpanti ɓɔɔ ɓe kn tee ladong wɔ̃ngni kpanti ɓi zɔng vi takeni dɛ̃ɛro ɓe yii surubi ani, ni nung mileni a bii walikãng, tĩng ɓɔɔ tũmpu. ⁷ Vi takeni shɔɔni ɓee suru ani wu anaa zingãng, vi takeni ziti ɓee suru ani wu anaa jaa napo, vi takeni tati ɓee suru ani wu waatĩng anaa shɔngzeng ɓee, vi takeni dɛ̃ɛro ɓee suru ani wu anaa mayakn ɓe duu ɓe. ⁸ Vi takeni dɛ̃ɛro ɓee suru yii nasɛ̃ng ani maangoro, nung vɛ̃ɛni a paa ɓɔɔ dii, la ni zii yii shii shãngni ɓa ni, "kpelengkpe, kpelengkpe, kpelengkpe Daayere Yuuranko Laa, ɓe wuko sii, wuko hãmi, wuko ng sɔɔ eke." ⁹ Alaɓe vi takeni suru yina a shɔng ɓe wɔ̃ng a ladong kpanti ɓɔɔ shɔng ɓe wu wɔ̃ngni ani dongdong, bɔngseni, dɔɔni, ɓɔɔ dɔɔreni ye, ¹⁰ shɔng yuubɔrɔ yii bãti atu dɛ̃ɛro mi yi wete a shɔngɓe wɔ̃ng goro a yuu ladong kpanti mi waating a sɔɔ gbãre shɔngɓe wɔ̃ng dongdong. Yii shĩng yii vi gini a tĩng ladong wɔ̃ngni kpanti, a shãng ni, ¹¹ "Bɔrɔ ɓi mɔ ɓee ko, wo Daayere ɓɔɔ wo Laa, mɔ tee bɔngseni ɓɔɔ bɔrɔ ani ɓɔɔ kaaka, aruɓe mɔko take vi walikãng, aru mɔ kaseni ko yii wɔ̃ng mɔ sɔɔ takeyi”.