¹ “Mɔ binke Laa shɔngshoni ɓe wu a jakalaa ɓee Sadisi: 'Ruu shɔng goro ɓe yise suru nawa tati ɓee Laa ɓɔɔ sengyaa nawa tati. "N ze mɔ vipeleni ye. 'Mɔ rĩng ani ɓe tase mɔ surubi, mɔ vɔɔ ɓee ye. ² Yupaa ta mɔ maa sĩngsĩng viɓe yase ɓe kpaa ye wu vɔɔyi, aru viya N de kpa mɔ vipeleni ɓa walikãng a Laa waatĩng ɓa. ³ Yenugn ta, arugoko, viɓe mɔ tee a sɔɔ tãa ke. Mɔ dũng, mɔ sɔɔ yaa ruvĩni. Mɔ na de yupa ɓa, N e anaa shɔngɓɔɔ, mɔng sɔɔ ze laɓe n daa e mɔ yuu ɓa. ⁴ Mɔ shɔng ɓeyi rĩng ani pota a Saridisi ɓe yii de bɔle rĩngte ɓa ayi fara ɓa, ying kn ni mini, yii tuuse puru fara, aru viya yii dɔ̃rɔng waa kɔtɔ. ⁵ Shɔngɓe shaa sii ɓe shɔng ɓoose wu puru fara, N sɔɔ ale wu rĩng ɓa a Labini Suru ɓa, N shãng wu ruuɓi a maa Daa waatĩng, ɓɔɔ wu jaashoni waatĩng. ⁶ Shɔngɓe shoo ani wu tãa viɓe suru ng gãale shɔng jakalaayi.'" ⁷ “Mɔ binke Laa shɔngshoni ɓe wu a jakalaa ɓee Filadapiyaː 'Ruu shɔng ɓe wu kpelengkpe ɓɔɔ nungoko-shɔng ɓe yise Dawuda vi yɔ̃rɔng jaka, na kuuye, shɔngɓɔɔ ɓa goro ɓe daa puu ɓa. ⁸ "N ze mɔ vipeleni ye. Zep̃in, N shĩng a mɔ tĩng yɔ̃rɔng puuni ɓe shɔngɓɔɔ ɓa goro ɓe daa zenung kuuni ɓa. N ze ye mɔ kaaka ani tɔkɔlɔng, mɔ sɔɔ dũng N yãa shãngni ye mɔ de bɛ̃ɛ N rĩng ɓa. ⁹ Zepĩn! N shĩng shɔng ɓe yi a mɔngmuseni Shelan, shɔngɓe yii ɓaayi yuu ni yiɓi shɔng Yahudayi ɓe tɔti ɓa ananko ɓa, yii shɔng jĩngni yãa, N shĩng yike yii kuute a mɔ dɔɔ, yii sɔɔ ze ke N kase mɔ kɔtɔ. ¹⁰ Aɓe mɔ yiseng ani yãa ye mɔ tii maani lemɓa ye, N yii mɔ kɔtɔ a la maaseni ɓe ng e a koodanga walikãng, aru wu maa shɔngɓe yii wɔ̃ng koodanga. ¹¹ N teeni laɓim. Yise viɓe a mɔ na ta aruɓe shɔngɓɔɔ daa tee mɔ vi gini yuu ɓa. ¹² Shɔngɓe shaa sii N shĩng wu wɔ̃ng Maada la yĩngti jaka. Daa sɔɔ ke ga tɔɓa a vusu ɓa, N sɔɔ binke Maada rĩng a wu yuu, Rĩng ɓe Maada bɔrɔ ɓundang (Polo Urushalima, ɓe ng lɔɔ a Maada yee lapa), ɓɔɔ N polo rĩng. ¹³ Shɔng ɓe shoo ani wu tãa viɓe Suru N gãale shɔng jakalayi.” ¹⁴ “Mɔ binke Laa shɔngshoni ɓe wu a jakalaa ɓe a Ladesiː 'Ruu ɓee Ananko, shɔng ani yãa tikeni ɓɔɔ nungoko, yuuranko a yuu viɓe Laa takeyi ɓe. ¹⁵ “N ze mɔ vi pele ni ye mɔ ɓa zangzang ɓa mɔ tɔɓa ɓalaɓa ɓa. N kase mɔ na wɔ̃ng kɔ zangzang kɔ ɓalaɓaǃ ¹⁶ Ɓe mɔ kiti hãmi lurang lulu mi--mɔ ɓa ɓalaɓa kɔ zangzang ɓa-- N kpaaye N tuule mɔ ang yãa. ¹⁷ Aruviya Mɔ shãng ni, 'N ɓi shɔng vinaa, N vinaa ani vɛ̃ɛni, N bee viɓɔɔ ɓa.' Vileseni wuko mɔ de ze ɓa mɔ shɔng kpãareni, vi nugnkɔngni, shɔng rãng, shɔng nungbãti, zĩngwati kɔvɛ̃ ɓa. ¹⁸ Weshoo ta ang yãaː Mɔ woo gɔli ang bii ɓe shɔng zuuye ni yaa aruɓe mɔ daa rii shɔng vinaa, ɓɔɔ puru fara ɓolongɓo ɓe mɔ daa tuuse amɔ bii aru ɓe mɔ zozo rang daa tase shɔng ɓa a gaa ɓa, mɔ sɔɔ sɔke mɔ nung aruɓe mɔ daa ze mɔng gbang. ¹⁹ N gɔ̃ɔ yuushoo a sɔɔ kpɛ̃re shɔng ɓe N kaseyi ɓe. Arugoko, mɔ a kaaka mɔ sɔɔ ya ruvĩni. ²⁰ Zepĩn, N shii ang nung yɔ̃rɔng jaka. Shɔng ɓe na tãng yãa ye puu yɔ̃rɔng ye, N ewu yee N shaa vishãng ni wuni, wu bibi jɔ ni mini. ²¹ Shɔngɓe shaa sii N yase wu dɔ̃rɔng wu wɔ̃ng ni mini ang ladong kpanti, anaa ɓe N shaa sii jɔ a sɔɔ wɔ̃ng ni Maada awu ladong kpanti. ²² Shɔngɓe shoo ani wu tãa viɓe Suru ng gãale shɔng jakalaayi.'''''