¹ “Mɔ binke Laa shɔngshoni ɓe wu a jakalaa ɓe Afisaː 'Ruu shɔng ɓe yise seng nawa tati a wu nashang ɓɔɔ shɔng ɓe kn a titi lashĩngni yaa ɓee gɔli nawa tati, ² "N zenɔ vipeleni ye, mɔ kpãareni, ɓɔɔ mɔ lemɓa maanign, ɓɔɔ seni shɔng ruu nanka yii, mɔ maa shɔngɓe yii too yii yuu ni yiko jaarɔkeni yii tɔti ɓa ananko ɓa, mɔ kpayi ye yii shãng yãa jĩngni kɔvɛ̃. ³ Mɔ maagn lemɓa aru N rĩng, mɔ gbingti na kaake ɓa. ⁴ N yimɔ ni vi goro, aru ɓe mɔ loke mɔ kaseni ɓee mɔ gaani ye. ⁵ Yee nugn ta a mɔng ɓe wete ɓe. Yamɔ ruvĩni ta mɔ pele vi tɔ̃ɔving ɓe mɔ sii gaa ɓe. Mɔ na de yamɔ ruvĩni ɓa, N e mɔ bii ng zɔ̃ mɔ lashĩngni yaa jaka a wu mɔng wɔ̃ngni. ⁶ Mɔ vimi ko dangː Mɔ bɛ̃ɛ vi nanka shɔng Nikolata, N bibi N bɛ̃ɛyi ye jɔ. ⁷ Shɔng ɓe shoo ani wu tãa viɓe suru ng gãale shɔng jakalaa. Aru shɔng ɓe shaa sii ɓe ng ya kɔtɔ wu shaa renila surubi, ɓe a Laa paradasi." ⁸ “Mɔ binke Laa shɔngshoni ɓe wu a jakalaa ɓee Siminaː Ruu shɔngɓe wuko shɔɔni, wuko tũmpu, shɔngɓe vɔɔye sɔɔ taye tɔti. ⁹ "N zemɔ kpãareni ye ɓɔɔ mɔ rang ye, mɔ ɓi shɔng vinaa, N sɔng ze shɔng leseni shɔng rĩng ɓe yii tɔni yiko shɔng Yahudayi, yii ɓa ananko ɓa, yii ɓi mɔngmɔɔni Shelan. ¹⁰ Mɔ na za vɔɔ kpãareni ɓe ng e ɓa. Milepĩnǃ vĩnivĩvĩ rãmang kpaaye wu ɓa nɔ dɔɔ a gãyã aru ɓe daa maa nɔ, diki kopi nɔ a kpãare ni. Mɔ maagn wu waa laa vɔɔ, N amɔ vi gini yuu ɓe surubi. ¹¹ Shɔngɓe shoo ani wu tãa viɓe Suru ng gãale shɔng jakalaayi. Shɔngɓe na shaa sii ye ng kpãare vɔɔni ɓe ziti ɓa.'” ¹² Mɔ binke Laa shɔngshoni ɓe wu a jakalaa ɓe a Pagamoː 'Ruu shɔngɓe wu yewa ɓe yãa ka ziti a wu naː ¹³ "N ze mɔng ɓe mɔ wɔ̃ng ye, mɔng ɓe ladong Shelan ani ɓe. Ni ɓemi mɔ shii ye ni kaaka ang rĩng. N ze ye mɔ de yaa shĩngnign ang bii ɓa, kↄ a laa diki Antipa N shɔng yãa ani, shɔng shãngni yãa nungoko, ɓe shɔng nung wu vɔɔ anɔ titi, a mɔng ɓe Shelan wɔ̃ng ɓe. ¹⁴ Vizeni wuko N yii mɔ ni vi potaː Shɔngɓɔɔ yii ani nɔ titi ɓe yii yini kaaka vi manteni Ɓaalam, ɓe mante Balaki wu shĩng vi kɔɔseni dɔɔ a jaa Israyilayi tĩng aruɓe yii shaa vishang ɓe shɔng yaase vaa ɓe yii sɔɔ pele kↄng. ¹⁵ A dɔ̃rɔng gorong ko, nɔ kpaa anɔ titi shɔngɓɔɔ yii yise ni kaaka Nikolata vi manteni. ¹⁶ Nɔ yaa ruvĩni, arugokoǃ Nɔ na de yaa ɓa, N eni nɔ bii ni dɔɔni, N sɔɔ taasii ni yini ni yewa ɓe ang yãa. ¹⁷ Shɔngɓe shoo ani wu tãa viɓe Suru ng gãale shɔng jakalaa. Aru shɔngɓe shaa sii ɓe, N awu mana vɔse ɓɔɔyi, N sↄɔ awu puru tara ni polo rĩng ɓe shɔng binke a bii tara, rĩng ɓe shɔng de ze ɓa na ɓa shɔng ɓe tee ɓa”. ¹⁸ "Mɔ binke Laa shɔngshoni ɓe wu a jakalaa ɓee Tayatiraː 'Ɓemi ɓi ruu Jaa Laa, ɓe wu nung anaa reete yaa, ɓe wu dɔɔ shɔng zũngre kɔtɔ anaa saasurɛ̃ng. ¹⁹ "N ze mɔ vipeleni yeː mɔ kaseni ɓɔɔ shĩngnign ni shoni lemɓa ɓee maanign. N ze viɓe mɔ pele hãmi ye jãa ɓe mɔ pele kɔtɔ a shɔng tĩng. ²⁰ Vipeleni wuko N yimɔ ni vi goroː Mɔ tase sooye Jazabeli mi kaseni, ɓe too wu yuu ni sooyezeni. Awu vi mante ni lake N jaadɔɔ shooniyi yii pele kɔng yii sↄɔ shaa viɓe shɔng a vaa ɓe. ²¹ N a wu laye wu yaa ruvĩni, de kase ɓa wu yaa ruvĩni peleni kɔng. ²² Zepĩn! N loke wu a kↄnsi vɔɔ ni shɔngɓe yii pele kↄng ni wuni a bɔrɔ kpãare ni, yii na de yaa ruvĩni vi peleni ɓa. ²³ N nung ke wu jaayi vɔɔ, jakalaa walikãng ying ze kɔtɔ ni Mikɔ shɔngzeni lereni gn ɓɔɔ sĩngsĩng . N anɔ vi dɔɔ yɔɔni anaa viɓe nɔ pele ɓe. ²⁴ Vizeni wuko aru nɔ shɔng gãasi ɓe yii a Tiyatira, N sɔɔ a shɔngɓe yii de yise vi manteni ɓa nɔ sɔɔ de ze viɓe shɔngɓɔɔ yi ɓani vi vɔ̃seni Shelan ɓa- N gãale nɔko, 'N de shĩngshe nɔ vi kpiteni ɓɔɔ ɓa a yuu ɓa.' ²⁵ Kɔni dɔ̃rɔng ɓeweya, Nɔ shii ni kaaka wu waa laɓe N daa e ɓe. ²⁶ Aru shɔngɓe shaa sii ɓe sɔɔ pele N shoni a de mike yãa ɓa, wuko N awu kaaka naa ani ayuu koo totok. ²⁷ 'N roo kpanti ayi yuu ni bala saka, wu wɔngke yii takata anaa gãasi gbãngtĩng'. ²⁸ Anaa ɓe N tee Maadaa naa, N sɔɔ awu jɔ seng gandi. ²⁹ Shɔng ɓe shoo ani wu tãa viɓe Suru N gãale shɔng jakalaa.