¹ N sɔɔ ze bɔrɔ Laa shɔngshoni ɓɔɔ teni a koolapa. Yãsi kuwu, takɔng ɓɔɔ awu lapa yuu. Wu waatĩng tɔ anaa laa yinti jaka yaa. ² Yise koovibini tɔkɔlɔng, ɓe puuye a wu naa. Shĩng dɔɔ naashãng a yuu mɛɛ waapo ɓɔɔ wu dɔɔ naagãng a tipi. ³ A lang yãa ni kaaka anaa zĩngang. Laɓe lang yãa ye, zãngla nawatati yide shãng yãa ni yii zɔng yãa. ⁴ Alaɓe zãngla nawatati yii lang yãa ye, N sii de binkeni, N sɔɔ de tãa yãa ni a koolapa de shãngni, “Kuu viɓe zãngla nawatati mi yii shãng ta. Mɔna binke ɓa." ⁵ Laa shɔngshoni ɓe N ze wu shii a yuu waapo ɓɔɔ a koodanga peng wu naashang ni paa. ⁶ A teng ni shɔngɓe wɔ̃ng dongdong, shɔngɓe take koolapa ni viɓe ani ɓe walikãng, koodanga ɓɔɔ viɓe a vusu walikãng, ɓɔɔ mɛɛ waapo ni viɓe a vusu walikãng, Laa shɔngshoni sɔɔ tɔɔni, "Shɔng ɓaa jang tɔɓa. ⁷ A diki ɓi Laa shɔngshoni ɓee nawatati daa jɛ̃ɛwu gboo a laɓiko vi vɔ̃ɔseni Laa daa wɔ̃ng ke, anaaɓe waa ruu tɔ̃ɔving ni wu jaadɔɔ shɔngzeniyi. ⁸ N tãa yiri yãa a koolapa shãngsheng tɔti niː "Waata, mɔ te koovibini ɓe a shɔngshoni Laa naa ɓe shii a yuu waapo ɓɔɔ tipi." ⁹ N sɔɔ waa shɔngshoni Laa bii asɔɔ gãalewu wu ang koovibini tɔkɔlɔng mi ta. Sɔɔ gãaleni, "Te koovibini mɔ shaa ke. Ng shing mɔ yato wu layi, a mɔ yãa ng sɔɔ wãngke anaa nung wara". ¹⁰ N de te koovibini tɔkɔlɔng mi ni a shɔngshoni Laa naa a shayi. Wãngke anaa nung wara, laɓe N shaaye N yato sɔɔ la kɔtɔ. ¹¹ Shɔngɓɔɔ sɔɔ shãnsheng ni, “Yimɔ ye a tuu mɔ waa yãa aru shɔngzengyi vɛ̃ɛni, kooyi, yãakooyi, ɓɔɔ kpantiyi.”