¹ Shɔng sɔɔ ang laata anaa bala mani mɔng. A gãalen ni, “Yuupaa ta mɔ maa jaka Laa ɓɔɔ alta, ɓɔɔ shɔngɓe yii gbãare a vusu. ² Mɔ na maa kaagaa ɓa, aruɓe shɔng aa shɔngɓe yide ze Laa ɓa yii ye. Ying naale ɓundang kpelengkpe mi ni yii dɔɔ shele --atu ziti. ³ N a ng shɔng yãa ani ziti yii naa yii a zeni shãngni diki 1,260, yii shii ni fara yato viiki." ⁴ Shɔng yãa ani ziti mi yii anaa laa gbee ɓɔɔ laaya ɓeni ziti ɓe shii a Daayere ɓe yise koodanga tĩng. ⁵ Shɔngɓe na tɔɔye ni lese yii, yaa ke a yii yãa a shaayi shɔngpong. Shɔng ɓe na kase ye ni lese yii, shɔng nung yii vɔɔ ni dɔ̃rɔng mi ko. ⁶ Shɔng yãa ani ɓemi yii naa yii kuu lapa mɛɛ na sãa ɓa, a diki ɓe ying a yãa ɓe. Yii kaaka ani yii rise mɛɛ wu wɔ̃ng kpaa ying ese zɔng vɔɔ kɔ ɓeweya a koodanga ɓe yii kase ɓe. ⁷ Alaɓe yina sɔ̃ɔre yãa ani ye, viijĩngti ɓe ke a yaa dooseni shɔng yii e taa sii ni yini. Wu shaayi nii sii a nung yii vɔɔ. ⁸ Yii gigiribi vɔɔ ng roo a dɔrɔng bɔrɔ ɓundang (ɓe shɔng ɓaa ni Sɔdɔm ɓɔɔ Masari) a mɔng ɓe shɔng ɓayi Daayere naa a lajisheng ɓe. ⁹ A diki tati ɓɔɔ yãagãgã, shɔngzeng ɓewaya, layee, yãakoo, ɓɔɔ koo ying ze yii vɔɔ. Ying yaa ɓa shɔng gbãayi a yuusaa ɓa. ¹⁰ Shɔngɓe yii wɔ̃ng a koodanga mi ying tãa puru yato ɓɔɔ tɔ̃ɔreni bii. Ying sɔɔ shongshe wee vii ani aru shɔng zeni yãajĩngni ziti mi yii kpãare shɔng ɓe yii wɔ̃ng a koodanga mi vɛ̃ɛni. ¹¹ A tũmpu diki tati ɓɔɔ yãagãgã suru wɔ̃keni Laa ɓoyi bii, yii sɔɔ shii ni yii dɔɔ. Bɔrɔ bizani sɔɔ yii shɔngɓe yii zeyi ɓe. ¹² Ying sɔɔ tãa yiri yãa a koolapaa tɔɔyi ni , “Nɔ vɔ̃ng ta a mɔmi” Ying sɔɔ waa koolapa a vusu yãasi, ɓe yii shɔng pong ying mile yii. ¹³ Alaɓini bɔrɔ tipi ziteni ng pele kɔtɔ, gãasi tenteni ɓundang ɓi ying zile kɔtɔ. Shɔngzeng laɓɔng nawatati ying vɔɔle a vusu tipi ziteni, shɔng ɓe yii dong ni nung paa bii ying zaayi ying sɔɔ aa Laa ring bɔrɔ a koolapa. ¹⁴ Vii nugn kɔni ɓee ziti daseye. Miletaǃ vii nugn kɔni ɓee tati teeni tɛ̃ti. ¹⁵ Alaɓe Shɔng shoni Laa ɓee nawatati jɛ̃ɛwu gboo ye, Shɔng shãng yiri yãa a koolapa ni kaaka a shã̃ng ni, "Rooni kpanti koodanga wɔ̃ngye rooni kpanti wo Daayere ɓɔɔ wu Kirisi, ng sɔɔ roo koo dongo ɓɔɔ dongdong." ¹⁶ Alaɓi yebɔng bãti atu dɛ̃ɛro, ɓe yii wɔ̃ng a ladong kpanti a Laa waatĩng, yii wete ni yii waatĩng a gbãare Laa. ¹⁷ Ying shãng ni "Wo dɔɔre mɔ ye, Daayere Laa Yuuranko, shɔngɓe ani, shɔngɓe sii wa, aruɓe mɔ temɔ bɔrɔ kaaka ye, mɔ gaa rooni kpanti ye. ¹⁸ Kooyi a yato leseni, alaɓe mɔ taseni sĩngsĩng leseni eye. Laɓe shɔng daa ɓoore vɔɔ yii yoori eye, ɓe mɔ daa shoore mɔ jaadɔɔ shɔngzeniyi dɔɔyɔɔni ɓɔɔ shɔngɓe yii zaa mɔ rĩng, shɔngɓe yiɓa viɓɔɔ ɓa ɓɔɔ shɔng kaakayi. La eye ɓe mɔ daa lese shɔngɓe yii lese koodanga ɓe." ¹⁹ Alaɓi jaka Laa ɓe a koolapa puu ye kalesaka ɓee rudani N ze a jakalaa. Yaa ɓengreni, yãakãra, zãngla, tipi ziiteni ɓɔɔ jetatara bɔrɔbɔ.