¹ Shɔng zee bɔrɔ vitaseni ɓɔɔ a vusu koolapa, sooyeɓɔɔ kuu bii ni la, ɓɔɔ ni shele a wu ɓuu dɔɔ ɓɔɔ kitiri ɓee sɛng kopi atu ziti a wu yuu. ² Wu jaa a yato, sing kaa yãavɔɔ aru jaayeeni kɔngni, wu a vusu tãani kɔngni jaayeeni. ³ Alaɓiko shɔng ze vitaseni ɓɔɔ tɔti a vusu koolapa; Zepĩnǃ Ɓɔrɔ sɔkãng ɓɔɔ ani ni yuuyi nawatati ɓɔɔ jeeyi kopi ni kitiri nawatati a wu yuuyi. ⁴ Wu deng ale sɛngyi vɛ̃ɛni ɓee a vusu koolapa asɔɔ wɔɔse yii a koodanga. Sɔkãng ɓi shiike a sooye ɓe kpaaye wu yeejaa, aruɓe naa yee jaaye, wu lese wu jaa. ⁵ Yeejaa, ɓi jaa veeye, ɓe wuko daa rookpanti a yãakooyi walikang ni labala saka. Shɔng raa wu jaa a waare Laa a wu ladong roonikpanti, ⁶ Sooye ɓi sɔɔ yuuke a ɓoo vusu jĩngti, amɔngɓe Laa gɔnte mɔng aru wuni, aruɓe daa yiise wu naa ɓe dikiyi 1,260. ⁷ Hãmi sii yupa ke a Koolapa. Mikalu ɓɔɔ wu shɔngshoniyi yii nung bang ni sɔkãng, sɔkãng ɓi ɓɔɔ wu shɔngshoniyi yii nungbang jɔ. ⁸ Vizeniwuko sɔkãng ɓi yii de kpaa kaaka ɓa vɛ̃ɛni ɓe yii daa shaa sii ɓi ɓa. Arugoko de kpaa mɔng wɔ̃ngni tɔɓa a koolapa ɓa ni wu shɔngshoniyini ɓa. ⁹ Bɔrɔ sɔkãng ɓi-gbenti sɔkɔ wa ɓe shɔng ɓaawuni Vĩnivĩvĩ rãmang kɔ Shelan, ɓe lake koodanga walikang-shɔng looke wu a vusu koodanga, ɓɔɔ wu shɔngshoniyi shɔng lookeyi ning wuni. ¹⁰ Alaɓiko N tãa yiriyãa ni kaaka a vusu koolapaː "Hãmi ko ɛ kpengseni ɓɔɔ kaakana ɓɔɔ roonikpanti ɓee wo Laa, ɓɔɔ kaakanaa ani ɓee wu Kirisi. Aruviya shɔngɓe langse wo zũngyi shɔng looke wu ye a tipi, shɔngɓe langse yii a wo Laa watĩng la ni zii ni. ¹¹ Yii jaã wu kaaka ni kpaa ɓee Jaa mɛrɛ ɓɔɔ ni yii yãashãngni ɓee yii aniyãa, aruviya yii de too yii surubi ɓa ana viɓɔɔ ɓa asɔɔ vɔɔyi. ¹² Arugoko nɔ pele puruyato, koolapayi ɓɔɔ shɔngɓe yii a wu vusuǃ Vizeniwuko ɓivinugnkɔngni koodanga ɓɔɔ a wa waapo, aruviya vĩnivĩvĩ rãmang lɔɔ nɔ biiyeǃ Yiiye ni leseniyato bãati-bãati ɓɔɔ aruviya zeye ni wu la yaye tɔkɔlɔng. ¹³ Alaɓe sɔkãng ɓi zeye shɔng looke wuye a koodanga, asɔɔ langte sooye ɓe yeejaa veeye ɓemi. ¹⁴ Vizeniwuko shɔng aa sooye ɓi naasɛ̃ng ziti ɓee bɔrɔ yaakn aruɓe daa yuu asɔɔ waa mɔngɓe shɔng gɔnte wu a ɓuujĩnti ɓe. Ɓemi ɓi mɔngɓe shɔng yise wu naa ani, ɓee la pota, layi, ɓɔɔ la yãagãagãa - amɔngɓe sɔkɔ ɓi wu ɓa mɔni ɓa. ¹⁵ Sɔkɔ ɓi jeng mɛɛ a wu yãa ana mɛɛyoo aruɓe daa shĩng mɛɛ tuuving wu shaa wu ɓe. ¹⁶ Vizeniwuko tipi sɔɔ yise sooye ɓi naa, Tipi ɓi sɔɔ puuyãa a ɓoo mɛɛyoo ɓe sɔkãng jeng a wu vusu yãa ɓe. ¹⁷ Alaɓiko sɔkãng ɓi lese yato ni sooye ɓini asɔɔ waake wu taa sii ni wu gãasi shãariyini, shɔngɓe yii dũng Laa rudangniyi ɓɔɔ ɓe yii yise aniyãa aru Yeso. ¹⁸ Alaɓiko sɔkãng ɓi sɔɔ shii a yuu sɛ̃ɛli ɓee yãa waapo.