¹ Aɓe N ze polo koolapa ɓɔɔ koodanga, aruviya koolapa ɓee shɔɔni ɓɔɔ koodanga ɓee shɔɔni yii tuukeye, mɛɛyang tɔ ɓa. ² N zeye kpelengkpe ɓundang, polo Urushelima, ɓe ke a koolapa a Laa bii, gonte bii anaa soogbaare aru wu jere. ³ N tãa bɔrɔ yãaye gbolok a ladongkpanti shãng ni, “Milepĩnǃ Laa mɔng wɔ̃ngni hãmi ni shɔngzengyi, ng sɔɔ wɔ̃ng ni yini. Yii wɔ̃ng wu shɔng bii, Laa bibi ng wɔ̃ngni yini, ng wɔ̃ng yii Laa. ⁴ Ng ãle yii mɛɛnung a yii nung walikãng, vɔɔ ng wɔ̃ng tɔɓa kɔ viikiyato kɔ yãavɔɔ kɔ bikɔni vi gbenti yii tuukeye. ⁵ Shɔngɓe wɔ̃ng a ladongkpanti mi shãng ni, “Milepĩnǃ N pele vi walikãng polo.” Shãng ni, “Bii viɓemi ta aruɓe ruum yii nungoko ɓɔɔ nungzeng.” ⁶ Shãngsheng ni, viɓemi yii peleyeǃ Miko Alipha ɓɔɔ Omega, shɔɔni ɓɔɔ yãasɔ̃ɔni. Shɔng nang tãa sɔ̃ɔti wu e ɓoo a mɛɛ surubi, ɓani shooni ɓa. ⁷ Shɔngɓe na shaa sii ye ng mare viɓemiyi, N sɔɔ wɔ̃ng wu Laa, wu wɔ̃ng N jaa. ⁸ A shɔng vɔɔzaniyi, shɔng zɔng ani ɓa, “Shɔngvi nugnzaniyi, shɔng vɔɔnungniyi, shɔng kɔngpeleniyi, shɔng paayi, shɔng dũngni laasɛngniyi, shɔng jĩngniyãayi, yii mɔng wɔ̃ng a shaani ɓee mumusheleng yaa. Ɓewa ɓi wuko vɔɔni ɓee ziti. ⁹ Goro ɓee shɔngshoni ɓee nawatati eye ang bii, goro ɓe wu pii nawatati ɓe yini vi kpãareniyi, a shãng ni, "Eta a mɔmi. N tase mɔ soogbaare, Jaamɛɛrɛ soo. ¹⁰ Aɓe sɔɔ toongye a suru waareng ye a bɔrɔ yuu kɔpɔ taseng kpelengkpe ɓundang Urushelima de lɔɔ tipi ni a vuzu koolapa a Laa bii. ¹¹ Urushelima wu ɓi Laa vi bɔngseni, wu kɔseni mɔng puru, kpɛ̃rɛrɛ a naa sooye vituu, anaa tara ɓee kirita--liini jasipa. ¹² Wu bɔrɔ, mɔngmaani knteni a paa ni viyɔ̃rɔng kopi atu ziti, ni shɔngshoni Laa kopi atu ziti a yɔ̃rɔngyi. A yɔ̃rɔng ɓiyi shɔng binke rĩng ɓee laakoo kopi atu ziti ɓee jaa Isrela. ¹³ A dii yɔ̃rɔng tati, a paa yɔ̃rɔng tati, a naashang yɔ̃rɔng tati, ɓɔɔ a naagãng yɔ̃rɔng tati. ¹⁴ Maani knteni ɓee ɓundang wu loni tung, a yii yupaa rĩng jaa rɔɔkeni kopi atu ziti ɓee Jaamɛɛrɛ ani. ¹⁵ Shɔngɓe shãng yãa ni mini wu laasaka maani vi ɓe shɔng gonte ni gɔli aru maani ɓundang ɓi, wu yɔ̃rɔngyi, ɓɔɔ wu maani knteni. ¹⁶ Shɔng maa ɓundang ɓi a maani; wu biini ni wu bɔni yii goro. Maa ɓundang ɓi ni laasaka vi mani, kpaye labɔng kopi atu ziti sitadiyo a wu biini (wu biini, shani, ɓɔɔ wu bɔni yii goro). ¹⁷ Maa wu mani knteni ye, kpaye 144 ɓee mani shɔngzeng (ɓe wuko tɔti mani Laa shɔngshoniyi). ¹⁸ Knteni maani ɓi ni Jasipa ɓundang ɓi ni gɔli kpɛ̃rɛrɛ, anaa gilasi ɓe gbang. ¹⁹ loni tung maani knteni ɓundang ɓi shɔng gonte ni zɔng tara lii vɛ̃ɛni. Ɓee shɔɔni ɓi jasipa, ɓee ziti ni safira, ɓee tati ni agate, ɓee dɛ̃ɛro ni emerald, ɓee maani ni onisi ²⁰ ɓee mangoro ni sardiyusi, ɓee nawatati ni Kirisoliti ɓee nawadɛ̃ɛro ni biril, ɓee nungkobɛ̃ɛgoro ni tɔpasi, ɓee kopi ni Kirisoparasi, ɓee kopi atu goro ni yakinta, ɓee kopi atu ziti ni ametisi. ²¹ Yɔ̃rɔng kopi atu ziti yiko lu'ulu'u kopi atu ziti; kɔ yɔ̃rɔng ɓeweya shɔng gonte a lu'ulu'u goro. Dɔrɔng ɓundang ɓi ni gɔli ɓolong kpɛ̃rɛrɛ anaa gilasi. ²² N de ze jakalaa ɓa a vusu ɓundang ɓi ni ɓa aruviya Daayere Yuurangko Laa ɓɔɔ Jaamɛrɛ yiko jakalaa. ²³ Ɓundang ɓi de kase laa kɔ sheele aru puseni mɔng ɓa aruviya bɔngseni Laa ko puse mɔng, wu yaa ɓeni ɓi Jaamɛɛrɛ. ²⁴ Lakoo ying kn a mɔng puru ɓee ɓundang waa. Kpanti koodanga ying ese vi bɔngseni a wuni. ²⁵ Shɔng kuwu yɔ̃rɔng ɓa ni laa ɓa, mɔng sɔɔ gɔ̃ɔ ɓa a mɔng waa ɓa. ²⁶ Ying ese bɔngseni ɓɔɔ bɔrɔ ani ɓee lakooyi ani, ²⁷ Vizeni wuko vi nungnzaani ɓɔɔ ng ɓo vusu ɓa, kɔ shɔngɓe pele vi yuusɛɛ kɔ yaajĩngni, vizeni wuko ɓi shɔngɓe yii rĩng binkeni a vusu Jaamɛɛrɛ Labini ɓee Surubi ko shee.