¹ Alaɓiko Laa shɔngshoni taseng yoo ɓee mɛɛ surubi, kpelengkpe ana vizenitĩng. Sing zee a Laa ladongkpanti ɓɔɔ ɓee Jaamɛɛ ² a titi dɔ̃rɔng jaa ɓee ɓundang ɓi. A kaati yoo ɓi ɓeweya ɓi la ɓee surubi, ɓe yii rɛɛ jaayi zɔng kɔp atu ziti sɔɔ rɛnung kɔ a shele ɓeweya. Ɓalayi ɓee la ɓi yii ɓi ɓe ganteni yãakooyi. ³ Shɔng kpaa leseni ɓe zɔngɓɔ tɔɓa. Laa ladongkpanti ɓɔɔ ɓee Jaamɛɛrɛ ng wɔ̃ng a vusu ɓundang ɓi, ɓɔɔ wu jaashoniyi ying pele wu shoni. ⁴ Ying ze wu wating, wu rĩng ng wɔ̃ng a yii watĩngyi. ⁵ Zii ng gɔ̃ɔ tɔɓa; ying bee yaa ɓee viɓengkeni kɔ la wu tooyãa tɔɓa, aruviya Laa Daayere ng ɓengke a yii yuu. Ying rookpanti dongo ɓɔɔ dongdong. ⁶ Laashɔngshoni gãaleng ni, "Ruuɓemiyi yiɓi nungoko ɓɔɔ anangko. Daayere, Laa ɓee shɔngzeniyi suruyi, shong wu shɔngshoni wu tase wu shɔngshoniyi viɓe daa watĩng ɓanijangɓaseni ɓa. ⁷ “Milepĩǃ N teni ɓanijangɓaseni ɓaǃ Ɓi shɔng zuuku shɔngɓe dũngyãa ɓee shãngniyãasuru ɓee labini ɓemi” ⁸ Miko, Yɔhana shɔngɓe tãa asɔɔ ze viɓemiyi. Alaɓe N tãake asɔɔ ze yii, N wete a tipi a gbãare Laa shɔngshoni ɓe ng taseng viɓemiyi. ⁹ A shãngsheng ni, "Mɔ pele viɓemi ɓaǃ N jɔ jaashongni ko ana mɔni, ni zũngwayi shɔngzeniyi, ɓɔɔ shɔngɓe yii dũng ruuɓe yii a vusu labini ɓemi. Yii gbãare Laaǃ" ¹⁰ Alaɓiko shãngsheng ni, "Mɔ na kuu ruu yãasuruzeniyi ɓee a vusu labini ɓemi ɓa, aruviya la kpaaye. ¹¹ Shɔngɓe na wuna ruvĩni, wu watĩng ni peleni ruvĩnĩ. Shɔngɓe wu na shɔng virĩngte, wu watĩng ni wɔ̃ngni rĩngteni. Shɔngɓe wu na shɔng kpɛlengkpe, wu watĩng ni pele viɓe kpɛlengkpe. Shɔngɓe wu ɓolongɓo, wu watĩng ni wɔ̃ngni ɓolongɓo." ¹² Milepĩ, N teni ɓanijangɓaseni ɓa. N vividɔɔyɔɔni ni mini, N shoore shɔngɓeweya anaɓe wu dɔɔknni tase ɓe. ¹³ Mikɔ Alpha ɓɔɔ Omega, ɓe shɔɔni ɓɔɔ kuuni, gaani ɓɔɔ sɔ̃ɔniyãa. ¹⁴ Ɓi shɔng zuuku shɔngɓe yii sɔɔke yii farabi aruɓe yii daa kpaa dɔ̃rɔng yii shaa a bii la ɓee surubi yii sɔɔ ɓoo vusu ɓundang ni kaa yɔ̃rɔngyi. ¹⁵ Shɔng gaa yiko zaayi, shɔng shaani yĩngvayi, shɔng kɔng peleniyi, shɔng nungnivɔɔyi, shɔng dũngni naariyi, ɓɔɔ zɔng shɔngɓeweya ɓe kase asɔɔ kase jĩngniyãa. ¹⁶ Miko, Yeso, ng shong jaashaoni aru wu aayãa aru viɓemiyi aru shɔngdũngniyi. Mi ko dĩngli ɓɔɔ shãari Dauda, ɓengkeeni sɛng gandi." ¹⁷ Suru ɓi ɓɔɔ Soogbaare shãng ni “Etaǃ” Shɔngɓe na tãaye wu shãngni, "Etaǃ" Shɔngɓeweya nang tãa sɔ̃ɔti, wu eta, ɓɔɔ shɔngɓeweya na kase kɔtɔ, wu kpaa mɛɛ ɓee surubi ta kɔvɛ̃. ¹⁸ N aayãa a shɔngɓeweya ɓe tãa yãazenisuru ɓe a vusu labini ɓemi, shɔngɓeweya na pãng ɓɔɔyiye a yupa, Laa ng pãngse wu vikpãareni ɓe shɔng binke a vusu labini ɓemi. ¹⁹ Shɔngɓeweya na zɔ̃ɔye ni gaa ruu shãngni ɓee a vusu labini ɓee yãazenisuru ɓemi ye, Laa ng zɔ̃ɔ a wu titi vivaaseni ɓee la surubi ɓɔɔ a vusu kpelengkpe ɓundang ɓe shɔng binke a vusu labini ɓemi. ²⁰ Shɔngɓe aayãa aru viɓemiyi shãng ni, “Anangko, N teni ɓanijangɓaseni ɓa” Anangkoǃ Eta, Daayere Yesoǃ ²¹ Pãnti ɓee Daayere Yeso wu wɔ̃ngni nɔni walikãng. Anangko.