¹ Alaɓiko N ze Laa shɔngshoni-de lɔɔni a koolapa. Wu vinɔrɔng puuni ɓee diyeeni too ani a naa, wuu bɔrɔ dĩngre saka ani a wu naa. ² A yii tuu sɔkãng ɓi, gbengti sɔkɔwa, ɓe wuko vinivĩvĩ rãmang, kɔ Shelan, asɔɔ maa wu ɓee saa labong labong. ³ A looke wu a vusu diyeenni too. A kuu yãa asɔɔ bɔɔyãa ɓi a wu yuu. Ɓemi watĩngke aruɓe daa laake yãakooyi tɔɓa naɓa saa labong labong yii tuukeye ɓa. Atũmpu ɓikɔ, shɔng yaa wu naa kɔvɛ̃ ɓee la wodot. ⁴ Alaɓiko N ze ladongkpantiyi. Shɔngɓe yii wɔ̃ng a yupa ɓi shɔngɓe shɔng aa yii kaakanaa yii ɓoore shɔng yoori. N sɔɔ ze surubiyi ɓe shɔngɓe shɔng kooyi yuu aru aniyãa aru Yeso ɓɔɔ aru Laa ruu. Yii de gbãare vijĩngti ɓi ɓa kɔ wu nungsuru ɓa, yii sɔɔ bɛ̃ɛ yii tee wu shĩngnizɔng a yii wating kɔ a yii naa. Yii ɛni surubi ni, asɔɔ rookpanti ni Kirisi ɓee saa labong labong. ⁵ Gãasi vɔɔ yii de yupa ɓa awa laɓe saa labong labong sɔ̃ɔyãaye. Ɓemi wu ko yunipa ɓee shɔɔni. ⁶ Ɓi shɔng zuukuyi ɓɔɔ shɔng kpɛlengkpɛyi shɔngɓe yii ɓɔɔ titi yunipa ɓee shɔɔniǃ A yuu shɔngɓemiyi vɔɔ ɓee ziti wu kaakanaa ɓaniɓa. Yii wɔ̃ng pirisiyi ɓee Laa ɓɔɔ ɓee Kirisi yii sɔɔ rookpanti ni wu ni ɓee saa labong labong. ⁷ Alaɓe saa labong labong na sɔ̃ɔyãaye, shɔng yaa Shelan naa a vusu gãayãa. ⁸ N kee gaa wuwa laake yãakooyi ɓe yii a yãakaati dɛ̃ɛrɔ ɓee koodanga-Gog ɓɔɔ Magog- aru wu museyi ayãawe aru taani sii. Ying shang vɛ̃ɛni ana sɛ̃ɛli ɓee waapo. ⁹ Yii vɔ̃ng paa teli ɓee koodanga, asɔɔ kĩngte mɔngwɔ̃ngni ɓee Laa shɔng kpɛlɛngkpɛ-kaseni ɓundang. Vizeniwuko yaa sɔɔ lɔɔ a koolapa asɔɔ shaare yii. ¹⁰ Vinivĩvĩ rãmang, ɓe laake yii ɓemi, shɔng looke wu a vusu dii shaani mumushellengyaa, amɔngɓe shɔng looke vijĩngti ɓɔɔ shɔngzeni yãajĩngni a vusu. Shɔng kpãare yii zii ɓɔɔ la ni dongo ɓɔɔ dongdong. ¹¹ Alaɓiko N ze bɔrɔ puru ladongkpanti ɓɔɔ shɔngɓe wɔ̃ng a yupa. Koodanga ɓɔɔ koolapa yii yuule a wu watĩng, vizeniwuko yii mɔng waani ɓɔɔ tɔɓa. ¹² N ze vɔɔyi- bɔrɔ ɓɔɔ naarãti-yii shiiye a tĩng ladongkpanti, shɔng sɔɔ puu labiniyi. Alaɓiko shɔng sɔɔ puu labini ɓɔɔ- wuko Labini Surubi. Shɔng ɓoore vɔɔyi yoore ni viɓe shɔng binke a vusu labiniɓiyi, anaɓe yii dɔɔknni tase ɓe. ¹³ Waapo aa vɔɔ ɓe yia a wu vusu ɓe. Vɔɔ ɓɔɔ Hadisi yii aa vɔɔ ɓe a yii vusu ɓe, shɔng sɔɔ ɓoore vɔɔyi yoori anaɓe yii dɔɔknni tase ɓe. ¹⁴ Vɔɔ ɓɔɔ Hadisi shɔng looke yii a vusu waapo ɓee yaa. Ɓemi wuko vɔɔni ɓee ziti-Yaa waapo. ¹⁵ Shɔngɓe shɔng na de kpaa wu rĩng ɓa a vusu Labini ɓee Surubi ɓa, shɔng looke wu a vusu yaa waapo.