¹ Atũmpu viɓemiyi N tãa yãakaani ɓe ana yiriyãa ɓee shɔngzengyi vɛ̃ɛni a vusu koolapa de ɓaayãa ni, “Halliluyaǃ kpɛngseni, bɔngseni, ɓɔɔ kaakanaa ɓi wo Laa ɓee. ² Wu ɓooreni yoori ɓi nungoko ɓɔɔ dang. Aruviya wu ko ɓoore bɔrɔ sooraani ɓe lese koodanga ni wu peleni kɔng. Wu ko kɔngsenung wu jaadɔɔyi kpaa a wu naa.” ³ Yii shãngyãa ɓe ya zitiː Halliluyaǃ Zĩngri yupaye a wu bii dongdong ɓɔɔ dong. ⁴ Yebɔngyi bãati atu dɛ̃ɛrɔ ɓɔɔ vitaakeni ɓe yii surubi ani dɛ̃ɛro yii weteye a tipi a gbãare Laa ke, ɓe wɔ̃ng a yupa ladong kpanti ɓe. Yising shãng ni, "Anangko. Haliluyaǃ" ⁵ Alaɓiko yiriyãa ke a vusu ladong kpanti, a shǎng ni, "Dɔɔ wo Laa ta, nɔ wu jaashoniyi walikãng, shɔngɓe nɔ zaa wu vɔɔ, zĩngzĩni ni shɔng naarãati ɓɔɔ shɔng kaakanaayi.” ⁶ Alaɓiko N tãayãa ɓe kaayãa ana yiriyãa ɓee shɔngzengyi vɛ̃ɛni, ana wuuni mɛɛyi vɛ̃ɛni, ɓɔɔ ana bɔrɔngbɔ kaaniyãa ɓee zãngla, ni, Halliluyaǃ Aruviya Daayere rookpantiye, wo Laa, wu ko Yurangko. ⁷ Wo pele puruyato ta wo tãatɔ̃ɔving wo sɔɔ aa wu bɔngni a biiǃ Aruviya tɔ̃ɔrenibi ɓe Jaamɛɛrɛ wu gbaare ɛye, ɓɔɔ wu soogbaare gonte wu bii ɓatata. ⁸ Shɔng yaase wu dɔ̃rɔngye wu sangse farabi a vusu ɓengke ɓɔɔ fara lini tɔ̃ɔving." (aruviya lini tɔ̃ɔving wu ko dɔ̃knniyi ɓee Laa shɔng kpelengkpeyi). ⁹ “Laa shɔngshoni gãaleng ni, “Binke viɓemi taː Shɔng zuuku yiko shɔngɓe shɔng ɓaa yii yãa yii waa mɔng shaani vishãng gbaare ɓee Jaamɛɛrɛ.” A sɔɔ gãaleng tɔti ni, “Ɓemi yii ɓi Laa ruu nungoko”. ¹⁰ N weteye a tipi a wu dɔɔ aru ng gbãare wu, vizeniwuko a shãngshenng ni, "Mɔ pele viɓemi ɓaǃ N jɔ mɔɔ shɔɔ jaashoni ko mɔ ning zũngwa yiini, ɓee yii yise aniyãa aru Yeso. Nɔ gbãare Laa ta, aruviya aniyãa aru Yeso wu ko suru ɓee shãngniyãasuru ¹¹ Alaɓiko N ze koolapa puuni, N mileke asɔɔ ze gbangtang puru amɔni. Shɔngɓe vɔ̃ngni gbangtang ɓi wu rĩngni shɔngshĩngnign ɓɔɔ nungoko. Ɓoore shɔng yoori asɔɔ taa sii ni peleni vinungoko. ¹² Wu nungyi ana duuni rɛtɛyaa, a wu yuu ɓi kitiriyi vɛ̃ɛni. Rĩng ani ɓe shɔng binke a yupa ɓe shɔngɓɔɔ goro ɓee ze naɓa wu bibi ɓa. ¹³ Tuuse fara a bii ɓe shɔng lungse a vusu kpaa, ɓɔɔ shɔng ɓaa wu rĩng ni Ruu Laa. ¹⁴ Sojayi ɓee koolapa yii dũng wu atũmpu ni puru gbangtangyi, yii tuuse fara lini tɔ̃ɔving, purushang ɓɔɔ rĩngte ɓa. ¹⁵ A wu vusu yãa kee shaani yewa ɓe ni wuko nungke yãakooyi yini, ɓɔɔ ni wu ko ng rookpanti a yii yuu ni la saka. Wu ko nale ni dɔɔ vikãngni ɓee shangni ɓee rinign ɓee Laa Yurangko. ¹⁶ Wu rĩng ani ɓe shɔng binke a wu farabi ɓɔɔ a wu dɔɔsɔ̃leː Kpanti ɓee kpantiyi ɓɔɔ Daayere ɓee daayereyi. ¹⁷ “N ze Laa shɔngshoni ɓɔɔ shiiye a vusu la. A ɓaayãa ni kaaka yiriyãa a jenungyi walikãng ɓee ying duule a wu yuu a lapa, "Eta, muse ta mɔngoro aru bɔrɔ shaani vishãng ɓee Laa. ¹⁸ Eta nɔ shaa sɛ̃ɛ ɓee kpantiyi, sɛ̃ɛ ɓee yubɔrɔ sojayi, sɛ̃ɛ ɓee bɔrɔngɓɔ shɔngzengyi, sɛ̃ɛ ɓee gbangtangyi ɓɔɔ yii shɔngvɔngniyi, ɓɔɔ sɛ̃ɛ bii ɓee shɔngzengyi walikãng, zĩngzĩni ɓee shɔng wɔ̃ngniyuu ɓɔɔ foo, shɔng naarãti ɓɔɔ shɔng kaakanaa." ¹⁹ “N ze vijĩngti ɓɔɔ kpantiyi ɓee koodangaa ni yii sojayi. Yii museye mɔngoro aruɓe yii daa taa sii ni shɔngɓe vɔ̃ng gbangtang ɓɔɔ wu sojayi. ²⁰ Shɔng yii vijĩngti ɓi ayãawee ni shɔngzeni yãajĩngni ɓe yii pele vitasenii ɓoo a wu watĩng. Ni vitaseni ɓemiyiko laake shɔngɓe yii tee vijĩngti wu shĩngnizɔng ɓɔɔ shɔngɓe yi gbãare wu nungsuru. Yii zĩngzĩni shɔng looke yii ni surubini a vusu shaani yaa ɓee mumushelengyaa. ²¹ Yii shɔng gãasi shɔng nungyivɔɔ ni yewa ɓe kee a shɔngɓe vɔ̃ng gbangtang yãa. Jenungyi walikãng yii shaa yii sɛ̃ɛ vɔɔ.