¹ Atũmpu viɓemiyi N ze Laashɔngshoni ɓɔɔ de lɔɔni a vusu koolapa. Wu bɔrɔngbɔ kaakanaa ani, koodanga sɔɔ ɓengke aru wu bɔngni. ² A kaayãa ni kaaka yiriyãa ni, "Weteye, bɔrɔngbɔ Babila weteyeǃ “Sɔɔ rii mɔngwɔ̃ngni ɓe vĩnivĩvĩ rãamangyi ye, yee gãayãa aru virĩngte suru, yee gãayãa aru rĩngte jenung, yee gãayãa aru virĩngte ɓɔɔ vibɛ̃ɛni vivayi. ³ Aruviya yãakooyi walikãng yii wũngteye ni mɛɛrɛnila ɓee wu peleni kɔng. Kpantiyi ɓee koodanga yii pele kɔng ye ni wuni. Shɔngnumɔɔ ɓee koodangaa yii rii shɔngvinaaye ni wu kaakanaa ɓee wu kɔng peleni. ⁴ Alaɓiko N tãa yiriyãa ɓɔɔ a koolapa ng shãng ni, “Nɔ keta a wu bii, ng shɔngzengyi, aruɓe nɔ daa vaase wu ruvĩniyi ɓa, ɓɔɔ aruɓe nɔ daa tee wu vikpãareniɓa kɔ goro. ⁵ Wu ruvĩni dɔngseye vɔ̃ng paaye waa koolaapaye, Laa sɔɔ yenugnye aru wu vĩnivĩvĩ ɓe vipeleniyi. ⁶ Shoore wuta anaɓe shoore shɔng gãasiyi ɓe, nɔ shoore wu nɔ sɔɔ pãngse wu ɓɔɔ a yupa wu vipeleniyi; a jewa ɓe duure ɓe, nɔ duure wu nɔ sɔɔ pãngse wu a yupa. ⁷ Anaɓe bɔngse wu yuu asɔɔ wɔ̃ng a vusu tɔ̃ɔrenibi, nɔ aa wu kpãareni vɛ̃ɛni ɓɔɔ vikiyato. Aruviya shãng a wu sĩngsĩng, 'N wɔ̃ngye ana sookpang; N ɓa soovɔɔ ɓa, N sɔɔ ze wɔ̃ngi vikiyato ɓa. ⁸ Arugoko a vusu diki goro wu vikpãreniyi ying ɛː vɔɔ, wɔ̃ngi vikiyato, ɓɔɔ wɔ̃ko. Shɔng shaare wu ni yaa, aruviya Daa wu ɓi Daayere yurangko ɓɔɔ wu ko wu shɔng yoori ɓooreni." ⁹ Kpantiyi ɓee koodanga ɓe yii pele kɔng ni wuni asɔɔ de kɔɔ bii ɓa aru wuni ɓa ying kaayãavɔɔ ɓɔɔ kaakeni aru wu ni alaɓe yina ze wu zĩngri ɓe wu shaareni ye. ¹⁰ Ying shii a gaa fefe, yii zaa wu kpãareni, yii shãng ni, "Ɓivi nugnkɔngni, ɓivi nugnkɔngni a bɔrɔ ɓundang, Babiila, bundang ɓe wu kaakanaa aniǃ Aruviya a vusu la goro mɔ ɓooni yoori ɛye." ¹¹ Shɔngnumɔɔyi ɓee koodanga yii kaayãavɔɔ ta yii sɔɔ pele vikiyato ta aruviya shɔngɓɔɔ ɓa ɓe daa wooyi vi numɔɔ tɔɓa. ¹² vinumɔɔ ɓee gɔli; siliva, tara kpɛ̃rereyi, wãngsetuuyi, lini tɔ̃ɔvingyi, ɓee biyangyi, sorososoyi, rãaniyi, kɔ zɔng gãasi la ɓeweya, kɔ vituuseniyi ɓee vitãari, kɔ vituuseniyi ɓee shɔng pele ni kpɛ̃rere la, ɓee saasũre, ɓee saaka, ɓee tara, ¹³ ɓee sinnamon, vitɔ̃ɔni, gãasi, murr, gãasifiranki, mɛɛrɛnila, nung, zuumang tɔ̃ɔving, alikama, napɔ ɓɔɔ mɛɛrɛ, gbangtangyi ɓɔɔ wu gbangsaakayi biyi ɓɔɔ surubiyi ɓee shɔngzengyi. ¹⁴ Rɛnila ɓe nɔ bee ni nɔ kaaka walikãng sɔ̃ɔyãaye a nɔ bii. Mɔ vi tɔ̃ɔreni ɓɔɔ vitɔ̃ɔvingyi yii rĩngye, shɔng kpaayi tɔɓa. ¹⁵ Shɔngnumɔɔyi ɓee vii tɔ̃ɔvingyi ɓe yii rii shɔngvinaaye ni wu kaabi ying shii amɔng fefe aru wu zaanivɔɔ kpãareni, yii kaayãavɔɔ asɔɔ kaayãavɔɔ vikiyato ni kaaka. ¹⁶ Ying shãng ni "Ɓivi nugnkɔngni, ɓivi nugnkɔngni bɔrɔ ɓundang ɓee sii ɓoose fara tɔ̃ɔving ɓee lini, a vusu biyang, ɓɔɔ rãani, ɓɔɔ shɔng sangse wu ni gɔli, kpɛ̃rere vituseni tɔ̃ɔvingyi, ɓɔɔ wãngsetuuyiǃ ¹⁷ A la goro wu vinaayi walikãng yii leseye." Yubɔrɔ zaani tuusi ɓeweya, shɔngshoni a vusu mɛɛ, shɔng zaani tuusiyi, ɓɔɔ shɔngɓe yii pele shoni a vusu waapo yii shii a gaa fefe. ¹⁸ Yii kaayãavɔɔ alaɓe yii ze wu zĩngriyaa shaareniye. Yii shãng ni, "Ɓi zɔng ɓundang ɓewe waa bɔrɔ ɓundang ɓemi weya?" ¹⁹ Yii tɛ̃ɛ zangbu a yii yuu, asɔɔ kaayãavɔ, a kaayãavɔɔ ɓɔɔ kaani vikiyato, “Ɓivi nugnkɔngni, ɓivi nugnkɔng bɔrɔ ɓundang ɓee sii a wu vusu ko shɔngɓe yii tuusi ani yii shĩng yii tuusi asɔɔ rii shɔngvinaa aru wu vinaa. Aruviya a la goro yii leseye walikãng." ²⁰ "Nɔ tãa puruyatɔ ta a wu yuu, koolapa, nɔ shɔng kpelenkpeyi ɓɔɔ jaarɔɔkeniyi ɓɔɔ shɔngzeniyi, aruviya Laa ɛse yoori ɓooreniye a wu yuuǃ" ²¹ Bɔrɔ Laa shɔngshoni ɓɔɔ too tara ɓe ana bɔrɔ tararee asɔɔ looke a vusu waapo, a shãngni, "A dɔ̃rɔng ɓemi ko, bɔrɔ ɓundang ɓee Babiila, ng wete a tipi ni kaaka shɔng sɔɔ ze wu tɔɓa. ²² Yãakaani ɓe shɔng waani vũngta yii pele ɓe, shɔng tãngnisooyi, shɔng jɛ̃ɛni jegongyi, shɔng jɛ̃ɛni gbooyi shɔng tãayi tɔɓa a wu vusu ɓa. Shɔng ze shɔngvisɛɛni ɓɔɔ ɓa kɔ zɔngɓeweya a mɔ vusu ɓa. Shɔng tãa kaaniyãa ɓee nangni viɓɔɔ ɓa a mɔ vusu ɓa. ²³ Ɓengkeni ɓee viyaaɓengni ng ɓengke tɔɓa a mɔ vusu ɓa. Shɔng tãa yiriyãa ɓee veeyegɓaare ɓɔɔ soogɓaare tɔɓa a mɔ vusu ɓa, aruviya mɔ shɔngnumɔɔyi sii yiko jaakpantiyi ɓee koodanga, ɓɔɔ shɔng laake yãakooyi ni mɔ shaani yĩngva ko. ²⁴ A wu vusu ko shɔng kpaa shɔngzeniyi ɓɔɔ Laa shɔng kpelengkpeyi kpaa, ɓɔɔ kpaa ɓee shɔngɓe shɔng nungyivɔɔ walikãng a koodanga."