¹ Goro a titi Laa shɔngshoniyi ɓe sii yise vigbãngting nawatati ɛke a shãngsheng ni, "Eta, N taase mɔ leseni ɓee bɔrɔ sooraani ɓe wɔ̃ng a yuu mɛɛyi vɛ̃ɛni, ² ɓe ni wuko kpantiyi ɓee koodanga yii pele kɔng ni wuni, ɓɔɔ ni wu mɛɛrɛnila ɓee wu kɔng peleni ko shɔng wɔ̃ngni koodanga yii wũngteni." ³ Alaɓiko Laa shɔngshoni tong a vusu Suru a waareng vusu jĩngti, N sɔɔ ze sooye ɓi wɔ̃ngye a yuu bɔrɔ vijĩngti ɓee wu bii yiiye ni dãani rĩngyi. Vijĩngti ɓi wu yuu ani nawatati ɓɔɔ jeeyi kopi. ⁴ Sooye ɓi ɓoose farabi biyang ɓɔɔ rãani, sɔɔ gonte bii ni gɔli, tarakpɛ̃rɛrɛ, ɓɔɔ wãngsɛtuuyi. Sii yise a wu naa jewa gɔli yiiye ni vii bɛ̃ɛniyi ɓɔɔ virĩngteyi ɓee wu kɔng peleni. ⁵ Shɔng binke rĩng a wu watĩng, vivɔ̃seniː “Bɔrɔ Babiila, sooraniyi yĩngtijaa ɓɔɔ vii bɛ̃ɛni ɓee koodanga.” ⁶ N zeke sooye ɓi wũngteye ni kpaa ɓee Laa shɔng kpelengkpeyi ɓɔɔ ni kpaa ɓee shɔngɓe yii roovɔɔ aru Yeso. Alaɓe N ze wuye, N tãa bɔrɔ bizaani. ⁷ Vizeniwuko Laa shɔngshoni shãngsheng ni, "Aruvi mɔng zaavɔɔ viya? N shãngshe mɔ dĩngli vivɔ̃seni ɓee sooye ɓi ye ɓɔɔ ɓee vijĩngti ɓe too wu a naa ye, vijĩngti ɓe wu yuuyi ani nawatati ɓɔɔ jeeyi kopi ɓemi. ⁸ Vijĩngti ɓe mɔ zemi wu sii ani, wu tɔɓa hãmi ɓa, sɔɔ kpaaye wu kee a vusu yeeni dii too. Alaɓiko ng waake wu leseviyi. Shɔngɓe yii wɔ̃ng a vusu koodanga, shɔngɓe yii rĩng ɓaniɓa a vusu labini ɓee Surubi alaɓe shɔng taake koodanga ɓe – ying zaakebi alaɓe yii na ze vijĩngti ye, aruɓe wu sii ani, hãmi wu tɔɓa niɓa, ɓɔɔ niɓemi walikãng ng ɛ tɔɓa. ⁹ Ɓemi ɓi ɓaaniyãa a sĩngsĩng ɓe kpɛ̃ɛni ani ɓe. Yuuyi nawatati ɓemi yiko jekɔpɔyi nawatati ɓee sooye ɓi wɔ̃ng a yupa ɓe. ¹⁰ Yiko tɔti kpantiyi nawatati. Kpantiyi maani yii weteye, goro dong ani; goro ɓɔɔ de ɛ ɓa, ɓɔɔ alaɓe naa ɛye, ng wɔ̃ng ɓee la wodot. ¹¹ Vijĩnti ɓe wu sii ani mi, wu tɔɓa, ɓi wuko kpanti ɓe nawadɛ̃ɛro. Wu titi nawatati mi ng waa wu mɔng leseni. ¹² Jeeyi kopi ɓe mɔ ze ɓemi yiko kpantiyi kopi ɓe yii de tee roonikpanti ɓa, vizeniwuko ying kpaa kaakanaa ani ɓee kpantiyi ɓe la goro ayãawee ni vijĩngti. ¹³ Yii lereni goro, yii sɔɔ aa vijĩngti ɓi yii kaakanaa ɓɔɔ kaakanaa ani. ¹⁴ Ying nungbang ni Jaamɛɛrɛ. Vizeniwuko Jaamɛɛrɛ ɓi ng jãayi ni kaaka aruɓe wu ko Daayere ɓee Daayereyi ɓɔɔ Kpanti ɓee Kpantiyi-ɓɔɔ shɔngɓe yini wuni shɔng ɓaa yini, shɔng rɔɔniyi, ɓɔɔ shɔng gnshĩngniyi." ¹⁵ Laa shɔngshoni gãaleng ni, "Mɛɛyi ɓe mɔ zemi, amɔngɓe sooraanimi wɔ̃ng ɓemi, ɓi shɔngzengyi, mɔɔyi, yãakooyi, ɓɔɔ yãashãngniyi. ¹⁶ Jeeyi kopi ɓe mɔ ze ɓemi- yii zĩngzini ni vijĩngti ying bɛ̃ɛ sooraani ɓi. Ying yaa wu ɓani viɓɔɔ ɓa ɓɔɔ bii waati, yii shaa wu wɔpɔ bii, yii sɔɔ shaare wuni yaa walikãng. ¹⁷ Aruviya Laa ko shĩng a yii sĩngsĩngyi yii pele wu vikase amɔng ɓaaseniyãa yii aa yii kaake aru wu rookpanti a vijĩngti yuu wuwa laɓe Laa ruuyi watĩngye ɓatata ɓe. ¹⁸ Sooye ɓe mɔ ze mi wu ko bɔrɔ ɓundang ɓe wu kaakanaa ani wu rookpanti a yuu kpantiyi ɓee Koodanga.”