¹ N tãa yiriyãa ɓɔɔ ni kaakaa ɓe ɓaa yãa a vusu jaakalaa asɔɔ gãale Laa shɔngshoniyi nawatati ɓemi, “Waa koodanga ta nɔ sɔɔ wɔɔse gbãngtĩng ɓe Laa rinign nawatati ɓemi." ² Laa shɔngshoni ɓee shɔɔni waake asɔɔ wɔɔse wu vii gbãngtĩng a koodanga; nangka ɓɔɔ kɔngni zakĩng kee a shɔngzengyi bii ɓe yii vijĩngti wu vitaseni ani, shɔngɓe yii gbãare wu nungsuru ɓe. ³ Laa shɔngshoni ɓee ziti wɔɔse wu vigbãngting a vusu waapo. Sɔɔ rii kpaa, ana kpaa vɔɔ shɔngzeng, visurubi ɓe yii a vusu waapo walikãng yii vɔɔyi. ⁴ Laa shɔngshoni ɓee tati wɔɔse wu vigbãngting a vusu yooyi ɓɔɔ a nungmɛɛ, yii sɔɔ rii kpaa. ⁵ N tãa Laa shɔngshoni ɓee mɛɛ shãngni, "Mɔ ɓi shɔng yato ɓolongɓo-shɔngɓe ɓi wuko hãmi, ɓɔɔ wuko sii ɓe ɓɔɔ shɔng Ɓolongɓo Goro- aruviya mɔ ɓoore viyi yoori ye. ⁶ Aruviya yiko yii wɔɔse kpaa ɓee Laa shɔng ɓolongɓoyi ɓɔɔ wu shɔngzeniyi, mɔ aa yii kpaaye yii ɓooyi; ɓi viɓe waaye yii kpaayi." ⁷ N tãa alta tɔɔni, "Anangko, Daayere Laa Yurangko, mɔ yoori ɓooreniyi yii nungoko ɓɔɔ ɓolongɓo." ⁸ Laa shɔngshoni ɓee dɛ̃ɛrɔ wɔɔse wu vigbãngtĩng a vusu la, shɔng sɔɔ aa wu dɔ̃rɔng wu shaare shɔngzengyi ni yaa. ⁹ Yii shaare shɔng ni ɓalaɓa yaa vĩm, yii sɔɔ dãa Laa rĩng, ɓe wu kaakanaa ani a yuu vikpãareniyi. Yii de yaayi ruvĩni ɓa yii aa wu bongni a bii. ¹⁰ Alaɓiko Laa shɔngshoni ɓee maani wɔɔse wu vigbãngtĩng a yuu vijĩngti wu ladong kpanti, mɔngtĩngri sɔɔ kuuke wu roonikpanti. Yii shaa yii rɛɛte aru kɔngni. ¹¹ Yii dãa Laa ɓee koolapa aru yii kɔngni ɓe ying tãa ɓe ɓɔɔ zãkĩngyi ɓe yii bii, yii sɔɔ ɓɛ̃ɛ yii yaayi ruvĩni ɓee yii vipeleni. ¹² Laa shɔngshoni ɓee maangoro wɔɔse wu vigbãngtĩng a vusu boro yoo, ɓe Yufireti. Wu mɛɛ yii sɔɔ waate aruɓe daa gɔnte dɔ̃rɔng aru kpantiyi ɓe ying ɛ a dii ɓe. ¹³ N ze rĩngti suruyi tati ɓe yii dee ana vɔkɔ yii de keni a sɔkãng yãa, ɓee vijĩngti, ɓɔɔ ɓee shɔngzeni jĩngniyãa. ¹⁴ Aruviya yii ɓi suru vĩnivĩvĩ rãmangyi ɓe ying pele vibizaani taseniyi. Yising waa kpantiyi ɓee koodanga walikãng yii bii aruɓe yii daa muse yii a yãawee aru nungnisii a bɔrɔ diki ɓee Laa Yurangko. ¹⁵ ("Milepĩǃ N teni ana shɔngɓɔɔǃ Zuuku ɓi shɔngɓe wu a vusu lereni, ɓe ɓoose fara a bii aruɓe daa kn ɓa bii waati ɓa ɓɔɔ aruɓe yii daa ze wu ɓa a vusu viyuusɛ̃ ɓa.") ¹⁶ Yii ɛse yii a yãawee amɔngɓe shɔng ɓaani Amagedɔng a vusu yãa Ibirayi. ¹⁷ Alaɓiko Laa shɔngshoni ɓee nawatati wɔɔse wu vigbãngtĩng a vusu zãasi. Alaɓiko yiriyãa ɓɔɔ kee a vusu jaakalaa ɓɔɔ a vusu ladong kpanti, ashãngni, "Peleyeǃ“ ¹⁸ Shɔngze kɔɔni yaa, gbugbulugbu, kaaniyãa zãngla, ɓɔɔ vĩnivĩvi zitenitipi - zitenitipi bɔrɔngbɔ ɓee jãa gãasi ɓee pele tɛ̃ɛtɛ̃ɛ alaɓe shɔngzeng wɔ̃ng a koodanga ɓemi, anangko bɔrɔngbɔ zitenitipi ɓemi wɔ̃ng. ¹⁹ Bɔrɔngbɔ ɓundang ɓi vaase a titi tati, ɓɔɔ ɓundangiyi ɓee lakooyi yii ziileke. Alaɓiko Laa yenungn a bɔrɔ Babila, asɔɔ aa ɓundangɓi jewa ɓe yiiye ni mɛɛrɛnila ɓe shɔng pele a wu bɔrɔngbɔ rinign ²⁰ Titi mɔng ɓe mɛɛ ɓaniɓa walikãng yii rĩng, shɔng de ze kɔpɔyi tɔɓa. ²¹ Bɔrɔngbɔ jetatarayi, ɓe kpiteke a waa talenti, yii lɔɔle a lapa a shɔngzengyi yuu. Yii sɔɔ dãa Laa aru vikpãareni ɓi ɓee jetatarayi aruviya vikpãareni ɓi sii shang vɛ̃ɛni.