¹ Alaɓiko N ze vitaseni ɓɔɔ a vusu koolapa, bɔrɔ ɓɔɔ vii bizaaniyi; Laa shɔngshoniyi ɓɔɔ ani nawatati yini vikpãareni nawatati, ɓe yiko vikpãareni ɓe sɔ̃ɔniyãa, aruviya ni yiko Laa rinign sɔ̃ɔyãa. ² N ze viɓɔɔ ɓe dee weni gilaasi ɓe waapo shɔng duure nii yaa. Shɔngɓe yii shii a kaati waapo ɓi shɔngɓe yii jaa vijĩngti ni kaaka ɓɔɔ wu nungsuru ɓɔɔ a yuu jaagãani ɓe tase wu rĩng ɓe. Yii yise vũngtaa ɓe Laa aa yii ɓe. ³ Yising tãng Musa soo, shɔngshoni Laa, ɓɔɔ jaamɛɛrɛ wu sooː "Bɔrɔ ɓɔɔ vibizaani ɓi mɔ vipeleni ko, Daayere Laa, Yurangko. Tɔ̃ɔving ɓɔɔ nungoko ɓi mɔ dɔ̃rɔngyiko, Kpanti yãakooyi. ⁴ Ɓiwe daa zaa mɔ ɓa weya? wu sɔɔ aa mɔ rĩng bɔrɔ ɓa weya, Daayere? Aruviya mɔko gɔrɔ mɔ kpelengkpe. Yãakooyi walikãng ying ɛ yii sɔɔ gbãare a mɔ wating aru mɔ vipeleni ɓee yato ɓolongɓo ɓe taase ɓe. ⁵ Atũmpu viɓemiyi N mileke, shɔng sɔɔ puu jaakalaa ɓee tabanaku ɓee aniyãa a vusu koolapa. ⁶ A vusu jaakalaa ɓi ko Laa shɔngshoni-nawatati yii yise vikpãareniyi nawatati. Yii tuse fara ni kpelengkpe, puru lini yii sɔɔ maa vimaani ɓee goli a yii yãarignyi. ⁷ Goro a titi vitakeniyi ɓee yii surubi ani dɛ̃ɛro ɓemi aa Laa shɔngshoniyi nawatati gbãngtĩng ɓee yini Laa rinign, ɓe wɔ̃ng dongdong ɓɔɔ dondong. ⁸ Jaakalaa ɓi yini zĩngri ɓe bongni ɓee Laa ɓɔɔ wu kaakanaa. Shɔngɓɔɔ ɓa goro ɓe zenung ɓooni vusu naɓa vikpãareni nawatati ɓee Laa shɔngshoniyi nawatati ɓemi sɔ̃ɔyãa ɓa.