¹ A gãleyi ni, "N gãle nɔ ye nungoko, shɔngɓɔɔ ɓe yii shile a mɔng ɓemi ying vɔɔ ɓa na ɓa yii ze Laa roonikpanti teni ni kaaka ni ɓa." ² Atũmpu diki mangoro, Yeso too Bituru ɓɔɔ Yaakubu ɓɔɔ Yɔhana ni wu ni a vɔ̃ng bɔrɔ kɔpɔ, yii ayi nung. A kɔse ayi watĩng. ³ Wu fara bii rii ana ɓenkeni, puru shang, puru shang a jãa viɓe vi riseni fara puru da zenung riseni kɔtɔ a koodanga ɓe. ⁴ Iliya ɓɔɔ Muusa yii ke a yii bii, yii de shãng yãa ni Yeso. ⁵ Bituru kose Yeso yãa a shãng ni, "Rabbi, lii kɔtɔ ɓe wo a mɔng ɓemi, wo yãa kute tati, goro mɔ ɓe, goro Muusa ɓe, goro ɓɔɔ Iliya ɓe." ⁶ (Aruviya de ze viɓe daa shãng ɓe ɓa, aruviya bii zayi kɔtɔ.) ⁷ Yãasi de e ni a e kuke yii. Alaɓi ko yiri yãa ke a yãasi. "ɓemi ɓing jãa ɓeng kase ɓe. Nɔ tee shoo a wuni." ⁸ Ɓani jang ɓaseni, alaɓe yii raa nung ye, Yii de ze shɔngbɔɔ tɔ ɓa, yii ze Yeso ko shee. ⁹ Alaɓe yii de lɔɔ ni a yuu kɔpɔ ɓe, a nungseyi la a tipi ni yii na gãle shɔngɓɔɔ viɓe yii ze ɓe ɓa na ɓa Jaa Shɔngzeng yupa a yusa sasat ɓa. ¹⁰ Yii yaa ruu ɓi ananko ayi nung, yi tɔngse ruu ɓi kɔ̃vɛ ayi titi ni ɓivi "yuni paa a yusa ɓemi", daa wɔ̃ng viya. ¹¹ Yii yɛ̃ɛ wu ni, "Aruvi shɔng laɓiniyi yii shãngni Iliya ko ing e shɔɔni viya?" ¹² A gãleyi ni. "Iliya e kɔtɔ shɔɔni aru wu sɔre yãa viyi walikang. Aruvi shɔng binke ni Jaa Shɔngzeng daa kpãare vii tok-tok shɔng sɔ ɓẽe wu viya? ¹³ N gãle nɔ ni Iliya e ye, yii sɔɔ pele viɓe yii kase peleni ni wuni, anaɓe shɔng binke aru wu ni ɓe." ¹⁴ Alaɓe yii e jaadɔɔyi bii ye ɓe, yii ze mɔɔ vɛ̃ɛni ayi kaa bii, shɔng labiniyi yii de kongse yãa ni yii ni. ¹⁵ Alaɓe yii ze Yeso ye, bii zaa mɔɔ ɓi yii vɛ̃ɛni yii sɔɔ yuu wu bii a ji wu yãa. ¹⁶ A yɛ̃ɛ wu jaadɔɔyi ni, "Ɓivi nɔng kongse yãa ni yii ni aru ni viya?" ¹⁷ Shɔngɓɔɔ a titi mɔɔ ɓi kose wu ni, "shɔng manteni vi, N eseng jaa a mɔ bii. Wu suru ani awu bii ɓee zãare wu yãa shãngni. ¹⁸ Too wu a loke wu a tipi, sɔɔ kese vi puleni a wu yãa fukuku, shaa wu tãri. wu sɔɔ rii ni kaaka ni. N gãle mɔ jaadɔɔyi yii kese wu ta a wu bii, yii de zenung ɓa." ¹⁹ A kaseyi ni, "Lako ɓe yii ani zɔng ɓani ɓa, N wɔ̃ng a lawe ni nɔ ni ana ɓemi weya? N daa tii nɔ ana ɓemi nuko viya? Nɔ eseng wu ta a mɔmi." ²⁰ Yii ese wu jaa veeye ɓi. Alaɓe suru ɓemi ze Yeso ye, ɓani jang ɓaseni ɓa de loke wu ni hami a tipi weni vɔɔ ye. Jaa veeye ɓemi de weteni hami a de sɔɔ kese wu ni a yãa fukuku. ²¹ Yeso yɛ̃ɛ yeɓi ni, "Vimi kpaa wu alaɓe weya?" yeɓi shãng ni, "Alaɓe wu sii dɔng tɔkɔlɔng" ²² Loke wu dikidi a yaa kɔ a mɛɛ a sɔɔ bee ke wu lese wu. Mɔ na daa zenung peleni viɓɔɔ kɔtɔ, tãa wo nugn kɔngni ta mɔ yise wo naa ani." ²³ Yeso gãle wu ni, "Mɔ na daa zenung kɔtɔ'? Vi walikãng daa wɔ̃ng kɔtɔ a shɔngɓe goro na a zɔng ye." ²⁴ Ɓani jang ɓaseni ɓa jaa ɓi yeɓi de kaa yãa ni a sɔɔ shãngni, "N azɔng yeǃ Yiseng naa ta a mɔng ɓe ing de azɔng ɓa ɓeǃ" ²⁵ Alaɓe Yeso ze mɔɔ ye yii de yuni ni yii bii, kɔse nanka suru ɓemi yãa a shãng ni, "Suru yãa ɓa ɓɔɔ shoo ɓa ɓemi, N gãle mɔ, keta a wu bii, mɔ na sɔɔ ɓoo wu bii tɔɓa." ²⁶ A kaa yãa a zite jaa ɓi ni kaaka bii a sɔɔ ke. Jaa veeye ɓi sɔɔ dee weni shɔngɓe vɔɔ ye ɓe, shɔngzeng vɛ̃ɛni yii de shãng ni. "Vɔɔ ye." ²⁷ Yeso sɔɔ yii wu naa a peng wu ni paa, jaa veeye ɓemi sɔɔ shii ni dɔɔ. ²⁸ Alaɓe Yeso e ye a vusu yee ɓi, wu jaadɔɔyi yii de gɔ̃ wu ni gaa a yɛ̃ɛ wu ni, "Aruvi wo de zenung keseni suru ɓemi ɓa viya?" ²⁹ A gãleyi ni, "Zɔng ɓemi da ke ɓa kɔvɛ̃ ɓa na ɓa ni gɔ̃reni Laa ɓa." ³⁰ Yii ke gaa mɔng wa a sɔɔ jãa ni Galili. A de kase ɓa shɔngɓɔɔ wu ze mɔngɓe yii ani ɓe ɓa, ³¹ aruviya sing mante wu jaadɔɔyi vi. A gãle yi ni "Shɔng aa Jaa shɔngzeng a shɔngzengyi naa, yii sɔɔ nung wu vɔɔ. Alaɓe shɔng na nung wu vɔɔ ye, atũmpu diki tati ing yupa tɔti." ³² Yii de ze viɓe ing shãng ɓemi ɓa, yii sɔɔ za vɔɔ yɛ̃ɛni wu ni. ³³ Yii sɔɔ e Kafanahu. Atũmpu ɓe ɓoo yee ye a yɛ̃ɛ yii ni, "Nɔ sing tɔngse ruu ɓe we a dɔ̃rɔng weya?" ³⁴ Yii de sɔɔ koo yãa ɓa. Aruviya yii sing gongse yãa aru buseni wɔ̃ngni bɔrɔ. ³⁵ Alaɓe yi wɔ̃ng ye a tipi ɓe ɓa wu jaadɔɔyi kop atuu ziti ɓemi yii yãa a yãawe a sɔɔ gãleyi ni, "Shɔngɓe na kase wɔ̃ngni shɔɔni, wuko ing wɔ̃ng shɔng tũmpu walikãng ɓɔɔ jaa shongni ɓee shɔng walikãng ." ³⁶ A too wejaa ɓɔɔ je tɔkɔlɔng a shĩng wu ayi titi. A sɔɔ too wu a naa ɓala a shãngshe yii ni, ³⁷ "Shɔngɓe na te zɔng wejaa ɓemi ye ang rĩng te miko; shɔngɓe na teng ye de te ɓa miko ɓa te shɔngɓe shɔngɓe." ³⁸ Yɔhana shãngshe wu ni, "Shɔng manteni vi, wo ze shɔngɓɔɔ ing kese vĩnivĩvĩ rãmang ni mɔ rĩng wu zãare wu, aruviya wu ɓa a wo titi ɓa." ³⁹ Yeso sɔɔ shãng ni, "Nɔ na zãare wu ɓa, aruviya shɔngɓɔɔ ɓa goro ɓe daa pele bɔrɔngbɔ vii zãani bii ang rĩng ɓe daa sɔɔ shãng vĩni ang yuu atũmpu ɓa. ⁴⁰ Shɔngɓe wu na ɓa wo shɔng pɔng ɓa wu ɓi wo ɓee. ⁴¹ Shɔngɓe na aa nɔ mɛ̃ɛ ye a jewa ni nɔ ɓoo aru ing rĩng aruviya nɔ ɓi Kirisi ɓee, N gãle nɔ nungoko, ing kpaa wu vi dɔɔ yɔɔni kɔtɔ. ⁴² Shɔngɓe na shĩng wejaa kpatakpa ɓemi yii ye ɓe yii azɔng ang bii yii kose dɔɔ, ing lise wu kɔtɔ shɔng maase wu bɔrɔ tara rɛɛ vii nankeni a wu tuu shɔng sɔɔ loke wu a mɛɛ waapo. ⁴³ Mɔ naa na da shĩng mɔ weteni, mɔ zĩng wu, ing lise mɔ kɔtɔ mɔ ɓɔɔ Laa yee ni naa gburukat ɓe mɔ daa ɓoo yee yaa ni naa ka zĩngzĩng, a vusu yãa ɓe shɔng zenung rĩngseni ɓa. ⁴⁴ Mɔng ɓe yii yɔngli vɔɔ ɓa, yãa ɓi sɔɔ rĩngke ɓa. ⁴⁵ Mɔ dɔɔ na daa shĩng mɔ kɔseni dɔɔ, mɔ zĩng ni gaa. Ing lise mɔ kɔtɔ mɔ ɓoo Laa yee ni dɔɔ gburukat ɓe shɔng daa loke mɔ a yee yaa ni dɔɔ ka zĩngzĩng. ⁴⁶ Mɔng ɓe yii yɔngli vɔɔ ɓa, yaa ɓi sɔɔ rĩngke ɓa. ⁴⁷ Mɔ nung na daa shĩng mɔ kɔseni dɔɔ, mɔ zɔ̃ni gaa. Ing lise mɔ kɔtɔ mɔ ɓoo Laa yee ni nung kaa goro ɓe shɔng daa loke mɔ a yaa ni nung ka zĩngzĩng. ⁴⁸ Mɔngɓe yii yɔngli vɔɔ ɓa, yaa ɓi sɔɔ rĩngke ɓa. ⁴⁹ Aruviya shɔng walikãng shɔng rise yii táayɛ̃ng ni yaa, ⁵⁰ Tãayɛ̃ng likɔtɔ, tãa ɓi na sɔɔ leseye ɓe, mɔ daa rise wu wɔ̃ngkeni tãa tɔti nuko viya? Mɔ kpaa tãa a nɔ titi, nɔ sɔɔ wɔ̃ng ɓe lemɓa ni shɔngzeng ni walikãng.