¹ A diki wayi, mɔɔ ɓɔɔ yii tɔti ani vɛ̃ɛni, ɓe yii vi shaani ɓa ani ɓa. Yeso ɓa wu jaadɔɔyi yii yãa a gãleyi ni. ² "N tãa mɔɔ ɓemiyi nugn kɔni ye aruviya yii pele diki tati ye ni mini yide shaa viɓɔɔ ɓa. ³ Nang vaseyi yãa ye ni yii waa yee ta yide shaa viɓa, yid wete a dɔ̃rɔng. Aruviya shɔngɓɔɔ yii e a mɔng fefe." ⁴ Wu jaadɔɔyi yii kose wu ni, "Wo daa kpaa bubula a mɔ we vɛ̃ɛni a jĩngti ɓemi ɓe daa tise shɔngzeng ɓemiyi weya?" ⁵ A yɛ̃yi ni, "Bubula dɛ̃ɛ anɔ naa weya?" Yii gãle wu ni, "Nawa tati." ⁶ A gãale mɔɔ yini yii wɔ̃ng ta a tipi. A too bubula nawa tati, a dɔɔre Laa a yupa, a sɔɔ daale, a aa wu jaadɔɔyi ni yii shĩng ta ayi tĩng, yii sɔɔ shĩng a mɔɔ tĩng. ⁷ Yii Jezũng pota tɔti ani, alaɓe tase dɔɔreni ye a yupa, a gãle wu jaadɔɔyi ni yii dake shɔng ta tɔti. ⁸ Yii shaa walikãng a puu, yii muse gãsi daleni tɔkɔlɔng tɔyi, bɔrɔ ɓiti nawa tati. ⁹ Yii waa shɔngzeng labɔng dɛ̃ɛro kɔtɔ a mɔni, A sɔɔ vaaseyi yãa. ¹⁰ Ɓani jang ɓaseni ɓoo vusu tuusi ni wu jaadɔɔ yini, a sɔɔ waa kaa tipi Dalmanutha. ¹¹ Shɔng Farisayi yii eke a gaa gongseni yãa ni wuni. Yii bee ke wu tase yii vi taseni a koolapa, aru yii maase wu. ¹² A shoo nugn femĩ a wu suru a sɔɔ shãngni, "Aruvi shɔng lakomi ɓemi ying bee vi taseni viya? Nungoko N shangshe nɔ, shɔng daa aa shɔng lakomiyi zɔng vi taseni ɓɔɔ ɓa." ¹³ A yayi, a vusu ɓoo tuuse tɔti, a sɔɔ waani dang kaɓɔ. ¹⁴ Hami nugn de kuse jaadɔɔyi tooni bubulani ni yini. Bubula ɓe a tuusi ɓi de jãa goroɓa a vusu tuusi ɓa ɓi ɓa. ¹⁵ A waaseyi yãa a gãleyi ni, "Nɔ shĩng nung nɔ sɔɔ kɔɔ bii aru yisiti shɔng Farisayi ɓɔɔ yisiti ɓee Hiridu." ¹⁶ Jaadɔɔyi yide gongse yãani ni weni aruɓe yii bubula ɓa ani ɓa. ¹⁷ Alaɓe tooyi ruumi ye, a yɛ̃ɛyi ni, "Aru vii nɔng gongse yãa aruɓe nɔ bubula ɓa ani ɓa viya? Nɔ de ze ɓa kɔ nɔ sɔɔ too ɓa ya? Nɔ sĩngsĩng lake kɔtɔ ya? ¹⁸ Nɔ nung ani, nɔng ze ɓa ya? Nɔ shoo ani, nɔng tãa ɓeya? Nɔ de yee nugn ɓaya? ¹⁹ Alaɓe N daale bubula maani a titi shɔngzeng labɔng maani, gãsi daaleni kpatakpa bubula ɓiti dɛ̃ɛya nɔ sele weya? Yii gãle wu ni, "Kop atu ziti." ²⁰ "Alaɓe N daale bubula nawa tati a titi shɔngzeng labɔng dɛ̃ɛro, daaleni kpatakpa bubula ɓiti dɛ̃ɛya nɔ sele weya?" Yii gãle wu ni, "Nawa tati." ²¹ A shãngni, nɔ de too tɔti ɓa ya?" ²² Yide e Baisaida ni. Shɔng ese wu shɔng nung bãati a gɔ̃ɔre Yeso ni wu lii wu ta. ²³ Yeso yii shɔng nung bãati ɓemi naa a waare wu jekoo ɓɔɔ, Alaɓe tule wu sãari ye a wu nung sɔɔ shĩng wu naa ye a wu yuu. a yɛ̃ɛ wu ni, "Mɔ ze viɓɔɔ ye ya?" ²⁴ A mile lapa, a shãngni, "N ze shɔngzengyi ye yii ana la ying knle." ²⁵ A sɔɔ shĩngshe wu naa tɔti a nung, shɔng ɓemi sɔɔ puu wu nung, a kpaa zeni mɔng tɔti, a sɔɔ ze vi walikãng gbang. ²⁶ Yeso vaase wu yãa wu wa yee a sɔɔ gãle wu ni, "Mɔ na ɓoo jekoo ɓemi ɓa." ²⁷ Yeso keni wu jaadɔɔ yini a waa jekoo ɓe shɔng ɓaani Kaisariya Filibi. A dɔ̃rɔng waani a yɛ̃wu jaadɔɔ yini, "Shɔngzeng yii shãng ni Miko weya?" ²⁸ Yii kose wu a gãle wu ni, "Yɔhana shɔng Batizima. Shɔngɓɔɔ yii tɔɔ ni, "Iliya,' shɔngɓɔɔ yii jɔ ni, 'Goro a titi shɔngzeni."' ²⁹ A sɔɔ yɛ̃ɛyi ni, "Nɔ bibi nɔ tɔɔ ni Miko weya? "Bituru gãle wu ni, "Mɔko Kirisi." ³⁰ Yeso nungse wu la a tipi ni, yina gãle shɔngɓɔɔ ɓa aru wu ni ɓa. ³¹ A gaa yii manteni ni Jaa Shɔngzeng daa kpãare kɔtɔ a vi vɛ̃ɛni, ni shɔngbɔrɔ ying bɛ̃ɛ wu ɓɔɔ yubɔrɔ firisiyi ɓɔɔ shɔng labiniyi, ying sɔɔ nung wu vɔɔ, a tũmpu diki tati daa sɔɔ yupa. ³² Gãleyi ruu wa a gaa gbang. Bituru sɔɔ gɔ̃ wu ni gaa a kɔse wu yãa. ³³ Yeso sɔɔ ranung a mile wu jaadɔɔyi yii a sɔɔ kɔse Bituru yãa a shãng ni, "Sɔ ta ni N tũmpu, Shelanǃ Mɔ shĩng sĩngsĩng ɓa a vi Laa ɓa mɔ shĩng a vii shɔngzengyi." ³⁴ A sɔɔ ɓa mɔɔ ɓɔɔ wu jaadɔɔyi yãa a yãwee, a sɔɔ gãleyi ni, "Shɔngɓɔɔ na kaseng dũngni, wu bɛ̃ɛ wu yuu, wu too wu la jisheni, wu sɔɔ dũng. ³⁵ "Shɔngɓe na kase kpengseni wu surubi ye daa kpaa ɓa, shɔngɓe na sɔɔ bɛ̃ɛ wu surubi ye aru mini ɓɔɔ polo ruu Laa ing kpengse wu kɔtɔ. ³⁶ Ɓivi shɔngzeng daa kpaa viya na kpaa koodanga ye walikãng sɔɔ bɛ̃ɛ surubi ye viya? ³⁷ Ɓivi shɔngzeng daa aa aru kɔseni wu surubi viya? ³⁸ Shɔngɓe na tãng yusɛ̃ɛ ye ɓɔɔ ing ruu shãngni ye a koo pele ni kɔng ɓemi ɓɔɔ ruvĩni lakomi ye, Jaa Shɔngzeng daa sɔɔ tãa wu yusɛ̃ɛ jɔ alaɓe na e wu Daa bongni ye ni wu tɔ̃ɔving shɔng shongni yini."