¹ Shɔng Farisayi ɓɔɔ shɔng labiniyi pota ɓe yii e a Urushalima a e muse a wu kaa bii. ² Yii ze ke wu Jaadɔɔyi ɓɔɔ ying shaa vishang ni naa rĩngte, wuko, yide sɔke ɓa, ³ (Aruviya shɔng Farisayi ɓɔɔ shɔng Yahudayi yii shaa vishang ɓa na ɓa yii sɔke naa ye ɓatata ɓa, aruviya yii yise naa langsi ɓe shɔngbɔrɔyi. ⁴ Shɔng Farisa yina e ye a numɔɔ yii shaa vishang ɓa na ɓa yii sɔke bii sasat ɓa, yii yise vi vɛ̃ɛni ɓe yii tee, ana sɔkeni jewayi, ɓereyi, gbãnting saka ɓɔɔ la wɔ̃ngni ɓe yii shaa vishang a yupa.) ⁵ Shɔng Farisayi ɓɔɔ shɔng labiniyi yii yɛ̃ɛ Yeso ni, "Aruvi mɔ jaadɔɔyi yide kn ɓa a naa langsi ɓee shɔngbɔrɔyi, yii sɔɔ shaa bubula ni naa rĩngteni viya?" ⁶ A sɔɔ gãleyi ni, "Ishaaya waake nungoko anɔ yuu shɔng lakeni shɔng. Anaɓe shɔng binke ni, shɔng ɓemiyi yii ang bɔrɔ a yii rɛtɛ shee, yii sĩngsĩng sɔɔ wɔ̃ng fefe ni mini. ⁷ Yii gbãareng kɔvɛ̃, a mante rudani shɔnzeng ana yii langsi. ⁸ "Nɔ yaa rudani Laa a sɔɔ yise langsi ɓee shɔngzengyi." ⁹ A sɔɔ gãleyi ni, "Aruvi nɔ bɛ̃ɛ rudani ɓee Laa aruɓe nɔ daa yise langsi ɓee shɔnzengyi viyaǃ ¹⁰ Aruviya Musa shãngni, 'Mɔ a mɔ yejaa ɓɔɔ mɔ yĩngti jaa bɔrɔ a bii' ɓɔɔ, shɔngɓe na shãng ruvĩni ye a wu yejaa kɔ yĩngti jaa yuu nungoko shɔng nung wu vɔɔǃ ¹¹ Nɔ sɔɔ shãngni, "Shɔngɓe na gãle wu yejaa ye kɔ wu yĩngti Jaa ye ni, "na yiseni ɓe nɔ na kpaa ye ang bii ɓi Korba'" (wuko, vi Ani' ), ¹² nɔ de sɔɔ ya wu tɔ ɓa wu pele wu yejaa kɔ yĩngti jaa viɓɔɔ ɓa. ¹³ Nɔ rise ruu Laa ye ɓani viɓɔɔ ɓa ni nɔ vi langsi ɓe shɔng dare nɔ ɓe. Ni gãasi zɔng vĩɓemiyi vɛ̃ɛni ɓe nɔ pele." ¹⁴ A ɓaa mɔɔ yãa a gãleyi ni, "We shoo ta, nɔ walikang, a nɔ too ke. ¹⁵ Viɓɔɔ ɓa goro ɓe ni gaa ɓe daa lese shɔngzeng ɓa na ɓoo wu vusu bii ye, Ɓi viɓe ke a shɔngzeng vusu bii ko lese wu ke." ¹⁶ "Shɔngɓe shoo na ani wu too ke." ¹⁷ Hami alaɓe Yeso yaa mɔɔ ye sɔɔ ɓoo yee ye, wu jaadɔɔyi yii yɛ̃ɛ wu aru yãagani ɓemi. ¹⁸ Yeso gãleyi ni, "Nɔ bibi nɔ de too yãagani ɓemi jɔ ɓa keya? Nɔ de ze ɓa ni viɓe ɓoo shɔngzeng vusu bii ni kaa gaa daa lese wu ɓa ya, ¹⁹ aruviya daa zenung ɓooni wu sĩngsĩng ɓa, ɓoo wu buru yato wu sɔɔ kee a too goti?" Ni yãa shãngni ɓemi ko Yeso rise vishani walikãng ɓani rĩngte ɓa. ²⁰ A shãngni, "Ɓi viɓe ke a shɔngzeng bii ko lese wu. ²¹ Aruviya a shɔng bii ko, a vusu sĩngsĩng, ke ruvĩniyi, peleni kɔng, ɓɔɔnivi, nungni vɔɔ, ²² beeni shɔng soo, peleni sũnɔ, kpãrivava, lakeni shɔng, nung gɛ̃ni, gñ kaani, seeni shɔng dɔɔ, tooseni yuu, vii wureni. ²³ Vĩ nanka ɓemiyi walikãng yii ke a shɔng vusu bii, yiko sɔɔ lese shɔngzeng." ²⁴ A yupa a mɔng wa a sɔɔ waa kaa tipi Taya ɓɔɔ Sidon. A mɔng wa ko ɓoo yee ɓɔɔ, a de sɔɔ kase ɓa shɔng wu ze ke wu a mɔni ɓa, ni vimi walikãng de zenung vɔ̃ni ɓa. ²⁵ Ɓani jang ɓaseni ɓa shɔng soro ɓɔɔ ani ɓe wu jaa sooye tɔkɔlɔng wu ni nanka suru tãa wu ruubi a e a sɔɔ wete awu yuu dɔɔ. ²⁶ Sooye ɓemi wu ɓi shɔng Heleniya, wu tɔ shãari Finikiya. A gɔ̃ɔre wu ni wu kese nanka suru mi a wu jaa sooye bii. ²⁷ A gãle wu ni, "Daa jaa kpatakpa ta yii shaa vishang shɔni. Aruviya de lii ɓa shɔng too jaa kpatakpayi bubula shɔng sɔɔ loke zaa yii ɓa." ²⁸ A kose wu a shãngni ni, "Ananko, Daayere, kɔ vishang ɓe lɔle a dɔɔ teburu a wejaa kpatakpa naa zaayi kpaa kɔtɔ a shaa." ²⁹ A gãle wu ni, Aru viɓe mɔ shang ɓemi, waa ta ɓatata, Nanka suru waa ye daa mɔ jaa sooye ye." ³⁰ Sɔɔ yee ke a wa kpaa wu jaa roo ye a yuu kɔnsi, nanka suru daa wu ye. ³¹ A sɔɔ ke gaa tɔti a tipi Taya, a jãa tipi Sidon a waa waapo Galili a sɔɔ too kaa tipi Dikafolisi. ³² Yide ese wu shɔngɓɔɔ ni shɔng shooɓa wu tɔti shɔng yãa zɔzɔ, yide gɔ̃ɔre wu ni wu shĩngshe wu naa ta a bii. ³³ A sɔɔ gɔ̃wu ni kati fefe ni mɔɔ a mɔng ɓe shɔng ɓani ɓa, a shĩng wu jenaayi a wu shoo, a tule sãari a lii wu rɛtɛ. ³⁴ A mile lapa, a sho nugn, a gãle wu ni, "Ephphatha" wuko taseni, "Puta." ³⁵ Wu shoo sɔɔ puu tɛ̃ti, wu rɛtɛ kpiteni de rokeni, a sɔɔ gaa shangni yãa gbang. ³⁶ Yeso sɔɔ kɔseyi yii yãa ni yina gãle shɔngɓɔɔ ɓa. laɓe na kɔseyi yãa ye ni yina shãng ɓa alaɓi ko yii waa tĩng ni waareni yãa a gaa. ³⁷ Viɓi zaayi bii vɛ̃ɛni, yii sɔɔ shãngni, "Pele viɓemiyi ye walikãng ɓatata. Sɔɔ shĩng shɔng shooɓa tãa mɔng ɓɔɔ shɔng yãa ɓa shang yãa."