¹ Yaa mɔng waa a e mɔng ɓe shɔng ye wu ani ɓe, wu jaadɔɔyi yii sɔɔ dũng wu. ² Alaɓe diki Wɔ̃keni tiseye, a mantevi a mɔng gɔ̃ɔreni. Shɔngzeng vɛ̃ɛni ɓe yii tãa wu yii yii naa a yãa a tɔɔ ni "Kpaa manteni vimi a mɔ weya?" "Ɓiwe aa wu zɔng kpɛ̃ɛni mi weya?" "Vii zaa ni bii ɓe a wu naa ɓemi keni kaa weya?" ³ ɓemi ɓa shɔng la ɓani mi, Mɛrɛyamu jaa ɓɔɔ Yaakubu ni Josesi ni Judah ɓɔɔ Simani zũngɓi ɓaya? Ɓa naɓi yiko ni woni mi ɓaya? Yii lese yato ni Yeso ni. ⁴ Yeso de sɔɔ tɔɔyi ni, "Shɔng shɔngzeni kpaa bɔrɔ ɓa awu koo ɓɔɔ, wu shɔng bii ɓɔɔ tɔti yii yee ɓa." ⁵ De pele bɔrɔ vipeleni ɓɔɔ tɔɓa, na ɓa ɓe shĩngshe shɔng vɔɔ pota yii naa a yuu a gante yii. ⁶ Bii zaa wu aruɓe yii de a zɔng ɓa. Sɔɔ waa jekoo ɓɔɔyi a mante vi a mɔni. ⁷ A ɓaa kop atu ziti mi yii yãa a shongyi ziti-ziti, a aa yii kaaka naa a yuu vĩnivĩvĩ rãmangyi, ⁸ a waase yii yãa ni, yii na too viɓɔɔ ɓa a naa ɓa a yii dɔ̃rɔng kn ni ɓa, yii yise bala ko she-bubula ɓa, duku ɓa, yii na sɔɔ too saka ɓa ayi soozũng ɓa- ⁹ yii ɓoose rãati a dɔɔ, yii na sɔɔ pãnse fara bii ɓa. ¹⁰ A gãleyi ni, "Yee ɓe nɔ na ɓoo ye, nɔ wɔ̃ng a mɔni wu waa laɓe nɔ na de ke ni a mɔni. ¹¹ Koo ɓe na de te nɔ ko na de wese nɔ shoo ɓa, alaɓe nɔ na de ke ni nɔ kuute zampu ɓe a nɔ dɔɔ wu wɔ̃ng vii taseni ayi bii." ¹² Yii keke a wa waayãa ni shɔngzeng yii yaayi ruvĩni ta. ¹³ Yii kese vĩnivĩvĩ rãmangyi, a sɔɔ bɔɔle shɔng vɔɔ yii nung a sɔɔ ganteyi ke. ¹⁴ Alaɓe Kpanti Hiridu tãa ruumi ye, aruviya Yeso rĩng keye a gaa gbang. Shɔngɓɔɔ yide shãng ni, ¹⁵ "Ɓi Yɔhana shɔng Batizima yupa a yusa, arugoko vi zani bii ɓee kaaka ing watĩng ni wu kaa bii ana ɓemi. "Shɔngɓɔɔ yii shãng jɔ ni," Ɓi Iliya" Shɔngɓɔɔ yii sɔɔ shãng tɔti ni, "Wuɓi shɔngzeni, ana goro a titi shɔngzeni ɓe yii sii tɛ̃ɛtɛ̃ ɓe." ¹⁶ Alaɓe Hiridu tãa vĩmi ye a shãng ni, "Yɔhana, ɓe N zɔ̃ɔ wu yuu, shɔng yuse wu paa yaa" ¹⁷ Aruviya Hirudu shĩngke shɔng yii Yɔhana a maa wu dɔɔ a gãyã aru Hirudiya (Zũngɓi Filibusi soo) aruviya yɛ̃ɛ wu kɔtɔ. ¹⁸ Aruviya Yɔhana gãle Hirudu ni, "De lii ɓa wu too zũngɓi soo ɓa." ¹⁹ Hirudiya lese yato ni wuni a sɔɔ bee dɔ̃rɔng ɓe daa nung wu vɔɔ ɓe, de kpaa ɓa, ²⁰ aruviya Hirudu zaa Yɔhana kɔtɔ; zeye wuɓi shɔng yato ɓolongɓo ɓɔɔ shɔng tɔ̃ɔving, a sɔɔ shĩng wu ɓatata. Aru wu tãani ruu tɔ̃ɔre wu bii kɔtɔ vɛ̃ɛni, ni viɓemi walikang tãa wu yãa ni yato puru. ²¹ Mɔng dɔɔ naa ni e ke alaɓe Hiridu wu diki yeni e ye ɓe sɔɔ wãa vishang tɔ̃ɔreni bii aru wu yubɔrɔɓɔyi ɓɔɔ wu yubɔrɔ sɔmɛrɛ ɓɔɔ yubɔrɔ ɓee yi a Galili ɓe. ²² Hirudiya Jaasooye ni wu yuu e ke a yãari yii sang, tɔ̃ɔre Hirudu ɓɔɔ wu shɔng zanti mi yii a bii. Kpanti gãle jaasooye ɓemi ni, "Gɔ̃ɔre viɓe mɔ kase ang na ta ing a mɔ kɔtɔ." ²³ A tengsewu a tɔɔ ni, "Viɓe mɔ na yɛ̃ng ye, N aa mɔ, kɔ daa waa vaseni a titi ɓe ing roonikpanti." ²⁴ A yuu yĩngɓi bii a tɔɔ wu ni, "N daa yɛ̃ɛ hami viya?" A shãngni, "Yɔhana shɔng Baptizima yuu." ²⁵ A yu kpanti bii hami ɓani jang ɓaseni ɓa, a sɔɔ yɛ̃ɛ wu, ni, "N kase mɔ ang, hami, Yɔhana shɔng Baptizima yuu a laa pii," ²⁶ Vimi yɔre kpanti vɛ̃ɛni, de kpaa dɔ̃rɔng bɛ̃ɛni viɓe gɔ̃ɔre mi ɓa aruviya sii teng ye a wu shɔng zangtiyi tĩng. ²⁷ Kpanti sɔɔ shong wu sɔmɛrɛ ni yii waa ese Yɔhana yuu ta. Shɔng gaani mɔng yiwa ye Yɔhana yuu a vusu gãyã. ²⁸ A ese yuu ɓi a yuu pii a e aa jaasooye mi, jaasooye mi sɔɔ aa yĩngɓi. ²⁹ Alaɓe wu Jaadɔɔyi yii tãa ruumi ye, yii e ke a too wu gigiri bii a waa shĩng a yusa. ³⁰ Jaarɔkeniyi yii e a yãawe ni Yeso a sɔɔ gãle wu walikãng viɓe yii pele a sɔɔ mante ɓe. ³¹ A sɔɔ gãleyi ni, "Nɔ eta ni nɔ yuu wo wa mɔngɓe shɔng ɓa ani ɓa wo wɔ̃ke pota." Aruviya shɔng vɛ̃ɛni yii de e ni yii de wani, yii de sɔɔ kpaa dɔ̃rɔng shaani vishang ɓa. ³² Yii sɔɔ ɓoo vusu tuusi a wa mɔngɓe shɔng ɓa ani ɓa ni yii yuu. ³³ Yii zeyi ke alaɓe yii de daa mɔng ɓini a tooyi zɔng, yii yuu a yãawe ni dɔɔ a koo ɓini walikãng, yii sɔɔ too mɔng ɓi shɔni a yini. ³⁴ Alaɓe yii ke yãa gaa ye, a ze pãnti mɔɔ a sɔɔ tãayi nugn kɔngni aruviya yii wɔ̃ng ye ana viva ɓe shɔng gaani ɓani ɓa. Arugoko gaa yii manteni vii vɛ̃ɛni. ³⁵ Alaɓe nung de langni a bii, wu jaadɔɔyi yii de e wu bii ni a tɔɔ ni, "Bemi ɓi jĩngti nung de lang ni tɔti. ³⁶ Vaaseyi yãa ta aruɓe yii da waa kaa tipi ɓɔɔ jekoo ɓe ayi bii maani yii waa bee viɓe yii daa shaa ɓe." ³⁷ A koseyi yãa a shãngshe yini, "Nɔ ayi viɓɔɔ ta yii shaa ke. Yii kose wuni, "Wo daa waa woo bubula ɓe waa dinari laa kop a aa yii yii shaa yaa?" ³⁸ A gãleyi ni, "Bubula dɛ̃ɛ ya a nɔ naa weya?" Nɔ wata nɔ zeyi." Alaɓe yii ze ye, a gãle wu ni, bubula maani ɓɔɔ jezũng ziti." ³⁹ A gãle shɔngzengyi walikãng ni yii wɔ̃ng ta a wisi yĩngsi a jeve jeva. ⁴⁰ Yii wɔ̃ng a jeve laa maani ɓɔɔ la ziti atu kop. ⁴¹ De too bubula maani ɓɔɔ jezũng ziti mi ni, a too nung ni paa a shing pãnti ani a daale bubula mi a aa wu jaadɔɔyi yii dake shɔng. A sɔɔ vase jezũng ziti mi a yii titi walikang. ⁴² Yii walikãng yii shaa a wa laɓe yii puu ɓe. ⁴³ Yii see gãasi kakeni bubula, ɓe yii ɓiti kop atu ziti, ɓɔɔ tɔti daaleni jezung. ⁴⁴ Shɔngɓe yii shaa bubula mi yii wa shɔngzeng labɔng maani. ⁴⁵ Ɓani jang ɓaseni ɓa gãale wu jaadɔɔ ni yii ɓoo tuusi ta yii waa dang kaa bɔɔ a Baisada a wu tĩng, aɓe sɔɔ vaase mɔɔ yãa. ⁴⁶ Laɓe yayi ye, a waa yuu kɔpɔ aru gɔ̃ɔreni Laa. ⁴⁷ Alaɓe lasãni tiseye, tuusi ɓi sii waa ye a titi yang, ɓe wu dong a bĩni a tipi. ⁴⁸ Alaɓe zeyi ye a mɔng ɓe ying kɔngbang ni la zaani tuusi ni, aruviya zãnsi sing wungse yii kɔtɔ. Ni la lasaka dɛ̃ɛro ɓee zii a e yii bii, de kñ ni a yuu waapo, de sɔɔ peleni wu dase yii. ⁴⁹ Alaɓe yii ze wu ye de kn ni a yuu waapo, a yii ze ni ɓi rãmang a sɔɔ kaa yãa, ⁵⁰ aruviya yii ze wu ye viɓe sɔɔ a yii zaa ni bii. Ɓani jang ɓaseni a shang yãa ni yini a gãleyi ni, "Nɔ maa sĩngsĩng taǃ Ɓi Mikoǃ Nɔ na zaa ɓaǃ" ⁵¹ A ɓoo vusu tuusi ni yini, zãasi sɔɔ yaa wungseni. Viɓi zaayi bii walikãng ⁵² Aruviya yide too viɓe bubula mi tase ɓa, viɓe yi pele wuko, yii sĩngsĩng lake vɛ̃ɛni. ⁵³ Alaɓe yii tuu dang gaa ye, yi e lɔɔ a tipi Janisarata a maa tuusi ɓi a a mɔni. ⁵⁴ Alaɓe yii ke ye a vusu tuusi, shɔngzeng yii de too wu zɔng ni ɓani jang ɓaseni ɓa, ⁵⁵ yii sɔɔ yule a raa koo ɓi walikang a gaa eseni shɔng vɔɔyi a yii siironi a ware yii mɔng ɓe yii tãaye wu ani ɓe. ⁵⁶ Alaɓe na ɓoo jekoo, ɓɔɔ ɓundang, kɔ vusu tipi ɓɔɔ, yii shĩng shɔng vɔɔ a numɔɔ. Yii gɔ̃ɔre wu ni wu daayii ta yii lii wu yãa fara, shɔngɓe yii lii wu walikãng yii kpaa ganteni.