¹ Yide yaa waapo Garasina ni. ² Alaɓe Yeso lɔɔ ye a tuusi, shɔngɓɔɔ, ani ɓe vĩnivĩvĩ rãmang ɓoo wu ke a yusa a e wu bii. ³ Wu wɔ̃ngni a yusa ko. shɔngɓɔɔ daa zenung wu mani ɓa kɔ ni saka maani shɔng. ⁴ Shɔng sii maa wu kɔtɔ ni dĩngre ɓɔɔ saka maani shɔng gbanke dĩngre ɓɔɔ saka maani shɔng mi jɔ ananko ɓiriɓi. Shɔngɓe ɓa goro ɓe daa kpaa kaaka wu yini ɓa. ⁵ Zii ni la ni wu mɔng wɔ̃ngni jɔ a yusa ɓɔɔ yuu kɔpɔ ko, langke yãa a gbanke wu bii ni tagãasivi. ⁶ Alaɓe ze Yeso ye dong e fefe, a yuu a wu bii a gbãa yuu a wu tĩng. ⁷ A langyãa ni kaka a tɔɔ ni, "N daa pele vi ni mɔni viya, Laa Jaa bɔrɔ ɓee a lapa? N gɔ̃ɔre mɔ ni Laa bibi, mɔ na kpãareng ɓa." ⁸ Aruviya watĩng a shangshe wu ni, "Keta mɔ yaase wu bii, mɔko vĩnivĩvĩ rãmang." ⁹ A yɛ̃ɛ wu ni "Mɔ rĩng ni viya?" A kose wu ni, "N rĩng ni vɛ̃ɛni, aruviya wo shang kɔtɔ. ¹⁰ Paase wu gɔ̃ɔreni tɔti a sɔɔ gɔ̃ɔre wu tɔti ni, wu na langteyi ɓa a kaa tipi ɓini ɓa. ¹¹ A mɔng wa gãyã ɓɔɔ yii ani ɓe shɔng gaayi a dii dooli. ¹² yii gɔ̃ɔre wu a tɔɔ wu ni, "Dɔ̃ɔ wo ta a gãyã waa yii bii aruɓe wo daa ɓoo ayi bii ɓe." ¹³ De sɔɔ yayi ni, vĩnivĩvĩ rãmang mi yide sɔɔ ɓooni a gãyã ɓiyi bii, yide see weni ɓɔkɔkɔ awa ku a waapo pɔ̃p, gãyã ɓemi yii labɔng zit ɓe yii ku a waapo ɓe. ¹⁴ Shɔngɓe yising gaa gãyã ɓemi yide yule ni a ɓo koo ɓɔɔ jekoo wodot, shɔng de e ni hami a e ze viɓe watĩng ɓe ¹⁵ Yide e Yeso bii ni hami a e ze shɔngɓe rãmang sii ɓoo wu bii ɓe, ɓe shɔng gante wu ɓe, ɓe rãmang sii awu bii dɔrɔrɔ viɓi de sɔɔ zayi bii ni. ¹⁶ Shɔngɓe yii ze viɓe watĩng ni shɔngɓe vĩnivĩvĩ rãmang sii ɓoo wu yii sɔɔ shang viɓe yii ze ni yii nung, a sɔɔ shang ɓɔɔ tɔ aru gãyã ɓemi yii. ¹⁷ Yii sɔɔ gɔ̃ɔre wu ni wu yaaseyi tipi ta. ¹⁸ Laɓe de ɓo tuusi ni shɔngɓe vĩnivĩvĩ rãamang sii ɓoo wu mi de gɔ̃ɔre wu ni wu wɔ̃ng ta ni wuni. ¹⁹ Yeso de ya wu ɓa, a tɔɔ wu ni, "Waa yee ta mɔ waa kpaa mɔ shɔng bii yii mɔ gãleyi viɓe Daayere pele mɔ ɓe, ɓɔɔ dɔɔɓe tasemɔ vi nugn kɔngni ɓe." ²⁰ De keni a waa gaa waani ruu Laa a Dekapoli aru viɓe Yeso pele wu ɓe, viɓi sɔɔ za shɔngzeng walikãng bii. ²¹ hami aaɓe Yeso tuu dang gaa ye a tuusi, bɔrɔ mɔɔ de museni a vusu tuusi a dang gaa, a yãa yang. ²² Yubɔrɔ mɔng yuu museni ɓɔɔ wu rĩng ni Jairusi, laɓe ze wu ye a wete a wu dɔɔ. ²³ A gɔ̃ɔre wu ɓɔɔɓɔ a tɔɔ ni, "N jaasooye tɔkɔlɔng wu a yãto vɔɔ, e ta mɔ shingshe wu naa a yuu wu gante ke." ²⁴ De keni ni wuni mɔɔ de sɔɔ dũng wuni a sɔɔ tɔ̃ɔse a wu kaa bii. ²⁵ Shɔng soro ɓɔɔ a mɔni ɓe kpaa tɛ̃ɛ a wu bii ɓe saa kop atu ziti, ²⁶ ɓe kpãareye a mɔng gãng zɔng zɔng, rĩngse wu vi naa ye walikãng, de kpaa ganteni ɓa vɔɔ ɓi sɔɔ waani tĩng. ²⁷ Alaɓe tãaye aru Yeso a kpaa bii a wu bii maani a titi mɔɔ a liwu fara. ²⁸ Aruviya shãng ni, "Nang liwu fara ye N gante kɔtɔ." ²⁹ Alaɓe liwu ye, wu kpaa tɛ̃ɛni mi de zini, a tãa a wu bii dongoro ni ganteye a wu yuu kpãareni. ³⁰ Ɓani jang ɓaseni ɓa Yeso ze ye ni kaaka keye a wu bii, de raa nung ni a mɔɔ a yɛ̃ɛ ni, "Ɓiwe ling fara weya? ³¹ Wu jaadɔɔyi yii de kose wu ni, "Mɔng ze kɔtɔ shɔng shang vɛ̃ɛni, mɔng yɛ̃ɛ aru vini ɓiwe limɔ fara weya viya?" ³² Yeso de ranung ni a yi titi wu ze ke kɔ ɓiwe pele vimi weya. ³³ Sooye ɓi, alaɓe ze viɓe kpaa wu mi ye, de eni ni vɔɔ zaa ni, a kute a wu watĩng, a shangshewu nungoko. ³⁴ Yeso de tɔɔ wu ni, "Jaasooye, mɔ zɔng ani gante mɔ ye, waata ɓatata mɔ sɔɔ gante a mɔ kpãareni." ³⁵ Laɓe Yeso shang ruumi ye, jaa shoni ɓe yi e a Yairus yee yide e ni a gãle wu ni, "Mɔ jaa vɔɔ ye aruvi mɔng yɔre shɔng manteni tɔti viya?" ³⁶ Yeso de yɔre yuu ɓa ni yii yãa shãngni ni ɓa, a gãle wu ni, "Mɔ na yɔre yuu ɓa mɔ a zɔng." ³⁷ De yaa shɔngɓɔɔ ɓa ni yii waani wuni ɓa a too Bituru ɓɔɔ Yakupu ɓɔɔ, zũngɓi Yɔhana. ³⁸ Yii de wa Yairusi yee ni, Yeso waa kpaa shɔng rise yuu ye a mɔng kaani yãa vɔɔ. ³⁹ Alaɓe ɓoo yee ɓi ye ɓe, a gãleyi ni, "Nɔng kaa yãa vɔɔ aruviya? Jaa ɓemi de vɔɔ ɓa kɔtɔ ɓa ing roo nungrooniǃ" ⁴⁰ Yii de lare wu ni, de sɔɔ keseyi ni gaa, a too jaami yeɓi ɓɔɔ yingɓi ɓɔɔ tɔti wu jaadɔɔyi tati ɓemiyi, a waa ɓoo jaaka ɓe shɔng yɔɔ jaa ɓemi ani ɓe. ⁴¹ A too wu a naa a tɔɔ wu ni, "Talita, kumi, ɓe shɔng koseni," Jaasooye, N tɔɔ ni yupa taǃ" ⁴² De yupa ni hami tɛ̃ti a gaa kĩni ke. (aruviya wu saa sii kop atu ziti). Ɓani jang baseni ɓa bii zayi vɛ̃ɛni. ⁴³ Yeso de nungseyi la ni a tipi a shãng ni yina daa shɔngɓɔɔ ɓa wu ze viɓe watĩng ɓa. A sɔɔ gãleyi ni yi aa wu viɓɔɔ ta wu shaa ke."