¹ A sɔɔ watĩng ni manteni vi a kaa waapo, mɔɔ sɔɔ muse yuu a wu kaa bii. A ɓoo vusu tuusi ɓe a yuu mɛɛ, a wɔ̃ng a vusu. Mɔɔ walikãng yii a kaa waapo. ² A mante yii vi vɛ̃ɛni ni yãa gãni, a wu manteni vi, ɓemi ɓi viɓe shãngshe yii ɓe. ³ "Wee shoo taǃ Shɔng langni mɔng wa ke ing ruu lɔkɔ. ⁴ Laɓe ruu ye, lɔkɔ ɓɔɔ yii lɔɔ a yãa dɔ̃rɔng, jenung yii e ke a ingle walikãng. ⁵ Lɔkɔ ɓɔɔ yii lɔɔ a tipi tara, ɓe de kpaa tipi ɓa vɛ̃ɛni. Yii ke ke ɓani jang ɓaseni ɓa, aruviya yii de kpaa yeeni tipi ɓa. ⁶ Laɓe la too yãa ye, a nung ke vi ruuni ɓi vɔɔ, aruviya yii dĩngli ɓa tipi ɓa, yii wate kiti. ⁷ Lɔkɔ bɔɔ yi lɔɔ a ɓuu kɔɔkɔ. Kɔɔkɔ ɓi ɓɔng ke a lese yii, yii de sɔɔ rɛnung ɓa. ⁸ Lɔkɔ ɓɔɔ yii lɔɔ a tipi tɔ̃ɔving a sɔɔ rɛnung ɓe yii bɔng a sɔɔ shang a rɛnung bãati atu kop, la tati, ɓɔɔ yii wa la maani." ⁹ A sɔɔ shãng ni, "Shɔngɓe wu shoo tãani ani, wu tãa ruumi taǃ" ¹⁰ Alaɓe Yeso wu a ɓĩni, shɔngɓe yini wu ni ɓɔɔ kop atu ziti ɓemi yii yɛ̃wu aru yãa gãni ɓi." ¹¹ A gãleyi ni, "Nɔ bibi shɔng aa nɔ ze ni vi vɔ̃seni ɓee Laa roonikpanti ye. Shɔngɓe yii a gaa vi walikãng ni yãa gãni, ¹² aruɓe yii na mile ye, ananko ying mile, ying zee ɓa, aruɓe yii na sɔɔ tãaye, ananko ying tãa, ying ze ɓa, na ɓa ananko ɓa yii daa rinung Laa wu sɔɔ yase yii ruvĩni." ¹³ A gãleyi ni, "Nɔ na de ze yãa gãni ɓemi ɓa? Nɔ da ze yãa gãni ɓemiyi nuko viya?" ¹⁴ Shɔng ruuni vi ruu ruu. ¹⁵ Ɓemi ɓi ɓe yii lɔɔ a yãa dɔ̃rɔng, a mɔng ɓe shɔng ruu ruumi. Alaɓe yii tãa ye, Shelan e ke ɓani jang ɓaseni ɓa a see ruu ɓe shɔng ruu a yii bii mi. ¹⁶ Ɓemi yii ko lɔkɔ ɓe shɔng ruu a tipi tara; ɓe, ɓani jang ɓaseni ɓa alaɓe yii tãa ye yii teni puru yato. ¹⁷ Yii dĩngli ɓa a bii ɓa, yii maa sĩngsĩng pota. Alaɓe yuyɔreni kɔ kpãreni yupa ye aru Laa ruu, yii wete ɓani jang ɓaseni ɓa. ¹⁸ Gãsiyi yiko ɓe shɔng ruu a ɓuu kɔɔkɔ. Yii ko shɔng ɓe yi tãa ruu, ¹⁹ Vi koodanga ɓɔɔ lakeni viyee ɓɔɔ kaseni viɓɔɔyi e ke a lese ruu, yii de sɔɔ kese vi gba ɓa. ²⁰ Ɓe shɔng ruu a tipi tɔ̃ɔving ɓi shɔng ɓe yi tãa ruu, a teke a sɔɔ ye jaa bãati atu kop, la tati kɔ la maani. ²¹ Yeso gãleyi ni, "Nɔ shĩng yaa zeni jaaka a vusu kalesaka ya kɔ a ɓuu kɔngsi? Nɔ e se a vusu nɔ sɔɔ shĩng a la shĩngni yaa zeni jaaka. ²² Aruviya viɓɔɔ ɓa ɓe shɔng vɔ̃se ke ɓe shɔng da ze ɓa ɓe, vi vɔ̃seni ɓɔɔ ɓa ɓe shɔng da kese gaa ɓa gbang ɓa. ²³ Shɔngɓe wu shoo tãani ani, wu tãa taǃ" ²⁴ A gãle yi ni, "We shoo ta a viɓe nɔ tãa ɓe, aruviya viɓe mɔ maase shɔng vini ɓe shɔng maase mɔ jɔ ananko, shɔng sɔɔ pãnse mɔ ɓɔɔ a yupa. ²⁵ Aruviya shɔng ɓe wu vi ani, shɔng pãnse wu ɓɔɔ ani vɛ̃ɛni, shɔng ɓe viɓɔɔ ɓa, kɔ ɓe a wu naa shɔng te a kati." ²⁶ A sɔɔ shãng tɔti ni, "Roonikpanti Laa wɔ̃ng ana shɔng ɓe ruu lɔkɔ a tipi. ²⁷ Roo nurong ni zii a yupa ni gandi, lɔkɔ sɔɔ buu a bong; de ze dɔɔɓe bong ɓe ɓa. ²⁸ Koodanga kese vishang ni wu yuuː Gaa ni shɔng keseni, shoo sɔɔ pãng, nɛrɛng sɔɔ bong a shoo. ²⁹ Alaɓe vishang na zũng ye, ɓani jang ɓaseni ɓa shong shɔng zãngsĩng aruɓe la yeeni tiseye." ³⁰ A shãng tɔti ni "Wo daa tise Laa roonikpanti nuko viya, kɔ ɓi yãa gãni ɓewe ya wo da shang weya? ³¹ Wɔ̃ng ana jenung jangjari, ɓe, alaɓe shɔng na ruuye, wu tɔkɔlɔng a titi lɔkɔ ɓe koodanga. ³² Shɔng na ruuye, bong a rii bɔrɔ a jãa la gãsi a guru walikãng, wu sɔɔ buu nasɛ̃ngyi, aruɓe jenung lapa da maa yee a wu yĩngsi ɓe. ³³ Ni yãa gãni vɛ̃ɛni shãngshe yii ruu ana ɓemi, a dɔɔɓe yii da tãa ɓe, ³⁴ shãngshe yii ruu ɓɔɔ ɓa kɔvɛ̃ ɓa, na ɓa ni yãa gãni ɓa. Laɓe wu a bĩni ɓe, shãngshe wu jaadɔɔ yii ruu a ga gbang. ³⁵ A diki wa, ɓe lasãani tiseye, a gãleyi ni "Wo gɔ̃ bii ta ni kawa." ³⁶ Yii ya mɔɔ, a too Yeso ni yini, anaɓe wu sii a vusu tuusi. Tuusi ɓɔɔ yii ani ɓe yi wani wuni. ³⁷ Yii de wa ɓa fefe ɓa zãsi nanka yupa, a wũngse tuusi ɓi weni da vase kɔtɔ a shĩng ke mɛɛ de yii vusu tuusi ni. ³⁸ Yeso wu bibi a tũmpu, N roo nurong a la wɔ̃ng ni. Yii yuse wu pa, a shãng ni, "Shɔng manteni, mɔ de yɔɔre yuu ɓa ni wo kpaa vɔɔni ye ɓa ya?" ³⁹ Yupa pula, a shiire zãsi, a gãle waapo ni, "Ɓatataǃ Shii ta kiri-kirikǃ" Zãsi ziyãa hami, a shii kiri-kirik. ⁴⁰ A gãleyi ni, "Nɔng zaa vɔɔ aru viya? Nɔ shĩngni gn tɔ ɓa ya?" ⁴¹ Yii yii ni bɔrɔ zãani a gãle we ni, "Bemi ɓi weya ɓe mɛɛ waapo dũng wu yãa weya?"